အမေရိကန် လေတပ်ဟာ အနီးကပ် လေကြောင်းပစ်ကူ တိုက်ခိုက်ရေး လေယာဉ်တွေဖြစ်တဲ့ A-10တွေကို အနည်းဆုံး ၂၀၃၀ ထိ သက်တမ်းတိုးပြီး ဆက်လက် အသုံးပြုစေဖို့ ဆုံးဖြတ်လိုက်ပါတယ်။
Thunderbolt II၊ Warthogစတဲ့ နာမည်ပြောင်တွေနဲ့ လူသိများတဲ့ လေယာဉ်တွေဟာ အီရန်စစ်ပွဲမှာလည်း ပါဝင် တိုက်ခိုက်နေပါတယ်။ မူလက A-10တွေကို မကြာခင် အနားပေးဖို့ ရည်ရွယ်ထားပေမယ့် အရှေ့အလယ်ပိုင်း ဒေသက စစ်ဆင်ရေးတွေကြောင့် ၂၀၃၀ လောက်ထိ ဆက်လက် အသုံးပြုသွားမယ့်အကြောင်း ဧပြီ ၂၀ ရက်နေ့မှာ အမေရိကန် ကာကွယ်ရေး ဝန်ကြီးဌာနရဲ့ လေတပ် ညွှန်ကြားရေးမှူး ထရွိုင်မိန့်ခ်က အတည်ပြု ပြောကြားခဲ့ပါတယ်။
ကာကွယ်ရေးဝန်ကြီး ပိထ်ဟက်ဂ်ဆက်သ်နဲ့ လေတပ်ထိပ်တန်း အရာရှိတွေ ဆွေးနွေးခဲ့တဲ့နောက် A-10တွေရဲ့ စစ်ဆင်ရေး တာဝန်ထမ်းဆောင်မှု ကာလကို သက်တမ်းတိုးဖို့ သဘောတူခဲ့တယ်လို့ မိန့်ခ်က ဆိုပါတယ်။ သူက သမ္မတ ဒေါ်နယ်လ်ထရမ့်ဟာ အမေရိကန်ရဲ့ စစ်အင်အားကို ချဲ့ထွင်ဖြည့်တင်းဖို့ လျင်မြန်တဲ့၊ ထိရောက်တဲ့ ဦးဆောင်မှုမျိုး ပြသပြီး ကောင်းမွန်တဲ့ ဆုံးဖြတ်ချက်တွေ ချမှတ်ပေးနေတယ်လို့လည်း ချီးကျူးခဲ့ပါတယ်။
အရုပ်ဆိုးသလောက် မြေပြင်တိုက်ပွဲတွေကို အနီးကပ် ပစ်ကူပေးရာမှာ အစွမ်းထက်လှတဲ့ တိုက်လေယာဉ်တွေအဖြစ် A-10တွေက ကျော်ကြားခဲ့ပါတယ်။ အဲဒီ လေယာဉ်တွေဟာ တခြားတိုက်လေယာဉ်တွေနဲ့ ယှဉ်ရင် မြန်နှုန်း နှေးနှေးနဲ့ပဲ ပျံသန်းနိုင်ပေမယ့် ကောင်းကင်ပေါ်က သံချပ်ကာယာဉ်တွေလို့ တင်စားခံရလောက်အောင် မာမာကျောကျော တည်ဆောက်ထားပါတယ်။ ပြီးတော့ တင့်ကားတွေကိုတောင် စုတ်ပြတ်သွားအောင် ပစ်ခတ်ဖျက်ဆီးနိုင်တဲ့ GAU-8/A Avenger ၃၀ မမ စက်သေနတ်ကြောင့်လည်း နာမည်ကြီးပါတယ်။ နောက်ပြီး A-10တွေဟာ ဒုံးကျည်တွေနဲ့ တခြားခဲယမ်းမီးကျောက် အများအပြားကိုလည်း တင်ဆောင်နိုင်ပါတယ်။
Public Service Announcement
Fairchild Republic ကုမ္ပဏီက ထုတ်လုပ်တဲ့ လေယာဉ်တွေရဲ့ မာဂုဏ်က အံ့မခန်း ကောင်းမွန်ပေမယ့် နည်းပညာတွေ တိုးတက်လာတဲ့ ခေတ်သစ် စစ်ပွဲတွေမှာ A-10တွေရဲ့ ရှင်သန်နိုင်စွမ်းက ကျဆင်းလာပြီ ဖြစ်တာကြောင့် ပိုပြီး ခေတ်မီတဲ့ F-35 ဘက်စုံသုံး ကိုယ်ပျောက် တိုက်လေယာဉ်တွေနဲ့ အစားထိုးဖို့ လေတပ်က ရည်ရွယ်ထားခဲ့ပါတယ်။ ဒါပေမဲ့ အခုတော့ A-10တွေဟာ အမေရိကန် ခြေလျင်တပ်တွေကို အနီးကပ် ကာကွယ်ပေးမယ့် အန္တရာယ်များတဲ့ မစ်ရှင်တွေအတွက် ဆက်ပြီး ပျံသန်းနေဦးမှာ ဖြစ်ပါတယ်။
လေတပ်ဟာ A-10တွေကို ဆက်လက် အသုံးပြုနေရင်း တစ်ဖက်မှာလည်း အဲဒီ လေယာဉ်တွေအစား F-35တွေနဲ့ အစားထိုးမယ့် အစီအစဉ်ကိုလည်း အကောင်အထည် ဖော်နေမှာပါ။ ၂၀၂၇ ဘဏ္ဍာရေး နှစ်အတွင်း လေတပ်ဟာ A-10တချို့ကို အနားပေးနိုင်ဖို့အတွက် F-35A တိုက်လေယာဉ် ၃၈ စီးကို မှာယူထားပါတယ်။
ဧပြီ လဆန်းပိုင်းတုန်းက အီရန်မှာ ပစ်ချခံခဲ့ရတဲ့ F-15E တိုက်လေယာဉ်မှူးတွေကို ကယ်ဆယ်ဖို့ ကြိုးစားတဲ့ မစ်ရှင်မှာ ပါဝင်ကူညီရင်း A-10 တစ်စီးဟာလည်း အီရန်ရဲ့ ပစ်ချခြင်းကို ခံခဲ့ရပါတယ်။ အဲဒီဖြစ်စဉ်မှာ လေယာဉ်မှူးဟာ ဟောမုဇ် ရေလက်ကြားမှာ လေထီးနဲ့ ခုန်ထွက် လွတ်မြောက်ခဲ့ပြီး အမေရိကန် စစ်တပ်က ကယ်ဆယ်နိုင်ခဲ့ပါတယ်။
ကိုးကား: Reuters
