'/%3E%3C/svg%3E){kind=small}
မေ-၂၉၊၂၀၂၆။People’s Spring
ကုလသမဂ္ဂအတွင်းရေးမှူးချုပ်က ကုလသမဂ္ဂအဖွဲ့ကြီးကို ပိုမိုထိရောက်ပြီး ကုန်ကျစရိတ်လျှော့ချနိုင်တဲ့ အဖွဲ့အစည်းတစ်ခုအဖြစ် ပြောင်းလဲဖို့ ကြိုးစားနေပြီး၊ လာမယ့် ၂ နှစ်အတွင်း အကြီးတန်းခေါင်းဆောင်ရာထူးတချို့ကို လျှော့ချခြင်းနဲ့ ဖျက်သိမ်းခြင်းတွေ လုပ်ဆောင်သွားမယ်လို့ ပြောကြားလိုက်ပါတယ်။
အသက် ၈၀ ပြည့်လာပြီဖြစ်တဲ့ ကုလသမဂ္ဂဟာ အကြီးတန်းရာထူးတွေ များလွန်းနေတယ်ဆိုတဲ့ ဝေဖန်မှုတွေရှိနေသလို၊အမေရိကန်အပါအဝင် အဖွဲ့ဝင်နိုင်ငံတချို့ကပေးဆောင်ရမယ့်ငွေကြေးတွေ မပြည့်မီတာကြောင့်လည်း ဘဏ္ဍာရေးအခက်အခဲတွေနဲ့ ရင်ဆိုင်နေရပါတယ်။
ဂူတာရက်စ်က“UN80”လို့ခေါ်တဲ့ ပြုပြင်ပြောင်းလဲရေးအစီအစဉ်အောက်မှာ ၂၀၂၆ ဘတ်ဂျက်ကို လျှော့ချထားနိုင်ပြီး၊ ဂျီနီဗာနဲ့ နယူးယောက် လိုကုန်ကျစရိတ်မြင့်တဲ့မြို့တွေကနေ ဝန်ထမ်း ၂,၀၀၀ ကျော်ကိုကုန်ကျစရိတ်နည်းတဲ့နေရာတွေကိုပြောင်းရွှေ့ထားနိုင်ခဲ့တယ်လို့ ဆိုပါတယ်။
Public Service Announcement
ဒါပေမယ့် အဲ့ဒီလောက်နဲ့မလုံလောက်သေးဘဲ ပိုမိုနက်ရှိုင်းတဲ့ ပြုပြင်ပြောင်းလဲမှုတွေ လိုအပ်နေသေးတယ်လို့လည်း သူကပြောပါတယ်။
“တကယ့်ပြုပြင်ပြောင်းလဲရေးဆိုတာခက်ခဲတဲ့ဆုံးဖြတ်ချက်တွေလိုအပ်ပါတယ်။အခုအချိန်ဟာအေးဆေးထိုင်နေဖို့၊ကိုယ့်အကျိုးစီးပွားပဲကြည့်ဖို့၊ အချိန်ဆွဲဖို့ မဟုတ်ပါဘူး” လို့ ဂူတာရက်စ်က အဖွဲ့ဝင်နိုင်ငံတွေကို တိုက်တွန်းခဲ့ပါတယ်။
နောက်နှစ်ဘတ်ဂျက်ထဲမှာ အုပ်ချုပ်ရေးအဆင့်တွေကို လျှော့ချတာ၊ အကြီးတန်းရာထူးတွေကို စတင်လျှော့ချတာတွေ ပါဝင်လာမယ်လို့ ဆိုပေမယ့် ဘယ်ရာထူးတွေကို ဘယ်လောက်ထိလျှော့မလဲဆိုတာတော့ အသေးစိတ်မပြောသေးပါဘူး။
ကုလသမဂ္ဂအတွင်းက အကြီးတန်းရာထူးတချို့ဟာ အင်အားကြီးနိုင်ငံတွေ အတွက် ဂုဏ်သိက္ခာနဲ့ သြဇာအာဏာပြနိုင်တဲ့ နေရာတွေဖြစ်တာကြောင့် အလွယ်တကူ လက်မလွှတ်ချင်ကြဘူးလို့ သုံးသပ်နေကြပါတယ်။
အမေရိကန်နိုင်ငံကတော့ ကုလသမဂ္ဂကို ဒေါ်လာ ၄ ဘီလီယံခန့် အကြွေးတင်နေပြီး၊ ကုလသမဂ္ဂအဖွဲ့အစည်းတချို့ကနေ နုတ်ထွက်ဖို့အစီအစဉ်တွေ ကြေညာထားသလို၊ ပိုမိုထိရောက်တဲ့ ကုလသမဂ္ဂဖြစ်ဖို့ကိုလည်း အမြဲတောင်းဆိုနေပါတယ်။
တရုတ်နိုင်ငံခြားရေးဝန်ကြီး ကလည်း ပြုပြင်ပြောင်းလဲရေးကို ထောက်ခံကြောင်း ပြောထားပြီး၊ အဖွဲ့အစည်းတွေအထပ်ထပ်ဖြစ်နေတာတွေကို လျှော့ချပြီး အရင်းအမြစ်တွေကို ပိုမိုထိရောက်စွာ ပေါင်းစည်းအသုံးပြုသင့်တယ်လို့ ဆိုပါတယ်။
ကိုးကား- Reuter
