NATO စစ်မဟာမိတ် အဖွဲ့ရဲ့ ဥရောပ နိုင်ငံတချို့မှာ အမေရိကန် နျူကလီးယား လက်နက်တွေ တိုးမြှင့် ဖြန့်ကျက်ရေးကိစ္စ နှစ်ဖက် ဆွေးနွေးမှုတွေ ရှိနေတယ်လို့ သိရပါတယ်။
ဥရောပမှာ ရှိနေတဲ့ အမေရိကန် တပ်ဖွဲ့ဝင် အရေအတွက်ကိုရော၊ အမေရိကန် စစ်လက်နက်တွေ ထားရှိမှုကိုပါ လျှော့ချဖို့ အမေရိကန် သမ္မတ ဒေါ်နယ်လ်ထရမ့်က စီစဉ်နေချိန်မှာ အခု သတင်းကို Financial Timesက စတင် ဖော်ပြခဲ့တာ ဖြစ်ပါတယ်။
လောလောဆယ် အမေရိကန်ဟာ ဥရောပမှာ နျူကလီးယား လက်နက်တွေ တင်ဆောင် တိုက်ခိုက်နိုင်တဲ့ မဟာဗျူဟာ ဗုံးကြဲလေယာဉ်တွေကို ဥရောပ နိုင်ငံ ၆ ခုမှာ ဖြန့်ကျက်ထားပါတယ်။ အဲဒီထက်ပိုများတဲ့ နိုင်ငံတွေမှာ နျူကလီးယား လက်နက်တွေ ဖြန့်ကျက်ရေး ဖြစ်နိုင်ခြေကို ဆွေးနွေးဖို့ အမေရိကန်က အခုအခါ လမ်းဖွင့်ပေးထားပြီဖြစ်ကြောင်း အဲဒီ ညှိနှိုင်းမှုတွေနဲ့ နီးစပ်တဲ့ သတင်းရင်းမြစ် သုံးခုကို ကိုးကားပြီး Financial Timesက ဆိုပါတယ်။
ဥရောပမှာ အမေရိကန်ရဲ့ သမားရိုးကျရော၊ နျူကလီးယား တိုက်ခိုက်မှုတွေပါ လုပ်ဆောင်နိုင်တဲ့ စစ်လေယာဉ်တွေ ဖြန့်ကျက် ထားရှိရေးကို နောက်ထပ် ဘယ်နိုင်ငံတွေက စိတ်ဝင်တစား ကမ်းလှမ်းလာမလဲ ဆိုတာကို အဲဒီ ညှိနှိုင်းမှုတွေအတွင်း အဖြေရှာကြဖွယ် ရှိတယ်လို့လည်း Financial Timesက ရေးသားထားခဲ့ပါတယ်။ ဒါပေမဲ့ ဒီကိစ္စဟာ ချက်ချင်း ခပ်မြန်မြန်တော့ အကောင်အထည် ပေါ်လာဖွယ် မရှိသေးကြောင်း သတင်းရင်းမြစ်တွေက ပြောပါတယ်။
Public Service Announcement
သတင်းတွေအရ NATOရဲ့ အရှေ့ဖက်စွန်း နယ်စပ်မှာ တည်ရှိတဲ့ ပိုလန်နဲ့ တခြား ဘောလ်တစ်ဒေသတွင်း နိုင်ငံတွေဟာ နျူကလီးယား တိုက်ခိုက်ရေး စွမ်းရည် ပိုင်ဆိုင်တဲ့ အမေရိကန် စစ်လေယာဉ်တွေ အခြေစိုက်ရေး ကိစ္စအပေါ် စိတ်ဝင်တစား ရှိနေတယ်လို့ သိရပါတယ်။
အိမ်ဖြူတော်၊ အမေရိကန် ကာကွယ်ရေး ဝန်ကြီးဌာနနဲ့ NATOတို့ကတော့ Financial Timesရဲ့ သတင်းနဲ့ ပတ်သက်ပြီး ဘာမှတ်ချက်မှ မပေးသေးပါဘူး။
အမေရိကန်ရဲ့ ပင်တဂွန် စစ်ဌာနချုပ် မူဝါဒရေးရာ အကြီးအကဲ အဲလ်ဘရစ်ဂျ် ကိုလ်ဘီကတော့ အမေရိကန်ဟာ NATO အဖွဲ့ဝင် နိုင်ငံတွေကို နျူကလီးယား လက်နက် စွမ်းရည်အရ ဆက်လက် လွှမ်းခြုံ အကာအကွယ်ပေးပြီး ဥရောပ နိုင်ငံတွေကတော့ သမားရိုးကျ တပ်ဖွဲ့တွေကို ဦးဆောင်တာမျိုး တာဝန်ယူစေလိုကြောင်း အရင်က ပြောခဲ့ဖူးပါတယ်။
ထရမ့်က ဥရောပတိုက်ဟာ ကိုယ်ပိုင် ကာကွယ်ရေး စွမ်းရည်အတွက် သမားရိုးကျ စစ်လက်နက်တွေ ပိုင်ဆိုင်ရေးမှာ လုံလောက်တဲ့ စရိတ်မျိုး အသုံးမချဘဲ အမေရိကန်အပေါ် လွန်လွန်ကဲကဲ မှီခိုနေတယ်လို့ စွပ်စွဲ ဝေဖန်ထားပါတယ်။
ကိုးကား: Financial Times
