အိန္ဒိယ နိုင်ငံသားတွေပါတဲ့ ရေနံတင် သင်္ဘောကို အမေရိကန်က တိုက်ခိုက်ခဲ့တဲ့ ဖြစ်စဉ်နဲ့ ပတ်သက်လို့ အိန္ဒိယ နိုင်ငံခြားရေး ဝန်ကြီးဌာနဟာ အမေရိကန် သံအရာရှိကို ဆင့်ခေါ်ပြီး ကန့်ကွက်ခဲ့ပါတယ်။
ဇွန်လ ၉ ရက်နေ့တုန်းက အိုမန်နိုင်ငံပိုင်နက် ကမ်းလွန်ရေပြင်မှာ ပါလာအူအလံ လွှင့်ထူထားတဲ့ Settebello ရေနံတင် သင်္ဘောကို တိုက်ခိုက်ခဲ့ကြောင်း အမေရိကန် စစ်ရေးဗဟို ကွပ်ကဲမှု ဌာန (CENTCOM)က ထုတ်ပြန်ခဲ့ပါတယ်။ အဲဒီ သင်္ဘောဟာ အီရန်ရေနံတွေကို သယ်ဆောင်လာခဲ့ကြောင်း၊ ပြီးတော့ အမေရိကန် ရေတပ် ဖြန့်ကျက်ထားတဲ့ ပိတ်ဆို့မှု အစီအမံတွေကို မလိုက်နာဘဲ အိုမန်ပင်လယ်ကွေ့ကို ဖြတ်သန်းခုတ်မောင်းဖို့ ကြိုးစားခဲ့ကြောင်း CENTCOMက ဆိုပါတယ်။
ဒါကြောင့်လည်း အမေရိကန် စစ်လေယာဉ် တစ်စီးဟာ ပစ်မှတ်ကို တိတိကျကျ ဖျက်ဆီးနိုင်တဲ့ စစ်လက်နက် အမျိုးအစား တစ်ခုကို အသုံးပြုပြီး Settebelloကို ဟန့်တားခဲ့တယ်လို့ ကြေညာချက်မှာ ဖော်ပြထားပါတယ်။ အမေရိကန်ရဲ့ တိုက်ခိုက်မှုကြောင့် သင်္ဘောဟာ အိုမန်နိုင်ငံပိုင် ဆိုဟာဆိပ်ကမ်း အရှေ့မြောက်ဖက် ရေမိုင် ၂၀ လောက် အကွာမှာ အင်ဂျင်ခန်း မီးလောင်မှုနဲ့ ကြုံတွေ့ခဲ့ပါတယ်။
သင်္ဘောရဲ့ အရေးပေါ် အကူအညီ တောင်းခံမှုကို အိုမန်ရေတပ်က တုံ့ပြန်ခဲ့ပြီး အိန္ဒိယ နိုင်ငံသား သင်္ဘောသား ၂၁ ဦးကို ကယ်ဆယ်နိုင်ခဲ့ပါတယ်။ ဒါပေမဲ့ နောက်ထပ် ၃ ဦးကတော့ ပျောက်ဆုံးနေဆဲလို့ အိန္ဒိယ နိုင်ငံခြားရေး ဝန်ကြီးဌာနက ဆိုပါတယ်။
Public Service Announcement
ဇွန်လ ၁၀ ရက်နေ့မှာတော့ ဒေလီမြို့မှာရှိတဲ့ အမေရိကန် သံရုံး ဒုတိယ အကြီးအကဲ ဂျေဆန်မိခ်စ်ကို ဆင့်ခေါ်ပြီး အခုဖြစ်စဉ်အတွက် ကန့်ကွက်ခဲ့ကြောင်း အိန္ဒိယ နိုင်ငံခြားရေး ဝန်ကြီးဌာနက အတည်ပြုခဲ့ပါတယ်။ ပြီးတော့ အမေရိကန်ရဲ့ တိုက်ခိုက်မှုကို အင်အားသုံး ရန်လိုမှု တစ်ခုအဖြစ် ရှုတ်ချခဲ့ပြီး ဒေသတွင်းက ရေကြောင်းသွားလာမှုနဲ့ အရပ်ဖက် အခြေခံ အဆောက်အအုံတွေအပေါ် ပစ်မှတ်ထားနေမှုတွေကို ရပ်တန်းက ရပ်ဖို့လည်း တောင်းဆိုခဲ့ပါတယ်။
ပြီးတော့ အိုမန်မှာရှိတဲ့ အိန္ဒိယ သံရုံးဟာ ဒေသခံ အာဏာပိုင်တွေနဲ့ အနီးကပ် ဆက်သွယ်ရင်း ရှာဖွေရေးနဲ့ ကာကွယ်ရေး မစ်ရှင်တွေအတွက် အစွမ်းကုန် ကူညီပေးနေကြောင်းလည်း နိုင်ငံခြားရေး ဝန်ကြီးဌာနက ကြေညာခဲ့ပါတယ်။
ကုလသမဂ္ဂ (UN)ရဲ့ ရေကြောင်းသွားလာမှုဆိုင်ရာ အေဂျင်စီဖြစ်တဲ့ အပြည်ပြည်ဆိုင်ရာ ရေကြောင်းအဖွဲ့ကြီး (IMO) အတွင်းရေးမှူးချုပ် အာဆီနီယို ဒိုမင်ဂွတ်ဇ်က နိုင်ငံတကာ ရေကြောင်းသွားလာမှုတွေကို ထိခိုက်ခြိမ်းခြောက်တဲ့ လုပ်ရပ် မှန်သမျှကို ရှုတ်ချကြောင်း၊ အခုဖြစ်စဉ်ကလည်း လက်ခံနိုင်စရာ မရှိကြောင်း၊ ပျောက်ဆုံးနေတဲ့ ရေယာဉ် အဖွဲ့သားတွေရဲ့ သတင်းကို စိုးရိမ်တကြီး စောင့်မျှော်နေတဲ့ မိသားစုတွေနဲ့ထပ်တူ IMOလည်း ပူပန်နေကြောင်း ထုတ်ပြန်ခဲ့ပါတယ်။
အမေရိကန်ဟာ အီရန်ကို စီးပွားရေးအရ ဖိအားပေးဖို့အတွက် ဟောမုဇ် ရေလက်ကြား အထွက်နားမှာ ရေတပ်အင်အား အများအပြား အသုံးပြုပြီး ပိတ်ဆို့ထားပါတယ်။ အမေရိကန် ရေတပ်ဟာ အရင်ကလည်း အီရန်နဲ့ ဆက်စပ်မှုရှိတဲ့ ရေယာဉ်တွေကို အဲဒီဧရိယာတဝိုက်မှာ ကြားဖြတ် ဟန့်တား တိုက်ခိုက်တာတွေ ရှိခဲ့ဖူးပါတယ်။
အကျိုးဆက်အဖြစ် အီရန်ရဲ့ အဓိက နိုင်ငံခြားဝင်ငွေ အရင်းအမြစ် တစ်ခုဖြစ်တဲ့ ရေနံတင်ပို့နိုင်စွမ်းဟာ ဆိုးဆိုးရွားရွား ကျဆင်းသွားပေမယ့် အီရန်ဖက်ကတော့ အမေရိကန်ရဲ့ တောင်းဆိုမှု အများအပြားကို မလိုက်လျောသေးဘဲ တင်းခံနေဆဲ ဖြစ်ပါတယ်။
ကိုးကား: Reuters, Al Jazeera
