ကနေဒါလိုပဲ ကမ္ဘာ့ဖလား ပူးတွဲအိမ်ရှင် အသင်းတစ်သင်းဖြစ်တဲ့ မက္ကဆီကိုဟာလည်း ၁၆ သင်း ရှုံးထွက်အဆင့်ကို အောင်အောင်မြင်မြင် တက်ရောက်သွားခဲ့ပါတယ်။ မက္ကဆီကိုဟာ မြို့တော် မက္ကဆီကို စီးတီးမှာ ယှဉ်ပြိုင်တဲ့ ပွဲစဉ်မှာ အီကွေဒေါ အသင်းကို နှစ်ဂိုး-ဂိုးမရှိနဲ့ အနိုင်ရခဲ့ပါတယ်။
ကမ္ဘာ့ဖလား စတင်ချိန် ကတည်းက ခြေစွမ်းပြနေတဲ့ မက္ကဆီကို အသင်းဟာ ဒီပွဲစဉ်မှာလည်း ပြိုင်ဘက်ကို သိသိသာသာ အသာစီးယူ ယှဉ်ပြိုင်နိုင်ခဲ့ပြီး ဂိုးသွင်းမသေချာလို့သာ အခုထက်ပိုပြီး ဂိုးမပြတ်ခဲ့တာ ဖြစ်ပါတယ်။
မက္ကဆီကိုအတွက် ဦးဆောင်ဂိုးကိုတော့ ပွဲချိန် ၂၂ မိနစ်မှာ ဘယ်ခြမ်းကနေ လူကျွံထောင်ချောက်ကို ဖောက်ထွက်သွားတဲ့ ဂျူလီယန် ကွင်နိုနက်စ်က ဘောလုံးဆွဲပြေးပြီး အပြင်းကန်သွင်းခဲ့ပါတယ်။
နောက်ထပ် မိနစ်ပိုင်း အကြာမှာပဲ ကွင်နိုနက်စ် ပေးပို့တဲ့ ဘောလုံးကို ဝါရင့်တိုက်စစ်မှူးကြီး ရာအူးလ် ဂျီမီနက်ဇ်က ပင်နယ်တီ ဧရိယာထဲကနေ အပြင်းကန်သွင်းပြီး ဒုတိယ အနိုင်ဂိုးကို ထပ်သွင်းခဲ့ပါတယ်။
Public Service Announcement
ဒုတိယပိုင်းမှာလည်း မက္ကဆီကိုကပဲ ဂိုးသွင်းခွင့်တွေ ပိုမိုရရှိခဲ့ပေမယ့် အဆုံးသတ်ပိုင်း လိုအပ်ချက်တွေနဲ့ အီကွေဒေါ ဂိုးသမား ဟာလန် ဂါလင်ဒက်ဇ်ရဲ့ ကာကွယ်မှုတွေကြောင့်ပဲ နှစ်ဂိုး-ဂိုးမရှိနဲ့ ပွဲပြီးဆုံးခဲ့ပါတယ်။ ပွဲပြီးခါနီးမှာ အီကွေဒေါ ဘယ်နောက်ခံလီ ပီရို ဟင်ကာပီဟာ ပါးစပ်ကို လက်နဲ့အုပ်ပြီး ပြိုင်ဘက်ကို စကားပြောမိလို့ အနီကတ်ပြ ထုတ်ပယ် ခံခဲ့ရပါတယ်။ ဒီစည်းမျဉ်းဟာ လူမျိုးရေး ခွဲခြားစော်ကားမှုတွေကို တိုက်ဖျက်ဖို့ အခုနှစ် ကမ္ဘာ့ဖလားမှာ စတင်ကျင့်သုံးနေတာပါ။
မက္ကဆီကိုဟာ လက်ရှိအချိန်ထိ ကမ္ဘာ့ဖလားမှာ ၄ ပွဲကစားပြီး ပေးဂိုးလုံးဝ မရှိသေးပါဘူး။ ၂၀၂၆ ကမ္ဘာ့ဖလား ပူးတွဲ အိမ်ရှင်တွေထဲမှာ ကနေဒါနဲ့ မက္ကဆီကိုတို့က ၁၆ သင်း ရှုံးထွက်အဆင့်ဆီ အောင်အောင်မြင်မြင် တက်လှမ်းထားပြီး အမေရိကန်ရဲ့ ပွဲစဉ်ကတော့ မကစားရသေးပါဘူး။
၁၆ သင်း ရှုံးထွက်အဆင့်မှာတော့ မက္ကဆီကိုဟာ အင်္ဂလန်-ကွန်ဂို ပွဲစဉ်ကနေ အနိုင်ရလာတဲ့ အသင်းနဲ့ ယှဉ်ပြိုင်ရမှာ ဖြစ်ပါတယ်။
ကိုးကား: FIFA
