စပိန်အသင်းဟာ ဥရောပပြိုင်ဘက် ဩစတြီးယားကို ဂိုးပြတ်နဲ့ အနိုင်ယူပြီး ကမ္ဘာ့ဖလား နောက်ဆုံး ၁၆ သင်း ရှုံးထွက်အဆင့်ကို တက်လှမ်းသွားခဲ့ပါတယ်။
နှစ်သင်းစလုံး လူစုံထုတ် ကစားခဲ့ကြပြီး စပိန်ကတော့ ပွဲအစပိုင်း ကတည်းက ပိုပြီး ဖိအားပေး တိုက်စစ်ဆင်နိုင်ခဲ့ပါတယ်။ စပိန်အတွက် ဦးဆောင်ဂိုးကိုတော့ ဘယ်ခြမ်းကနေ မတ်ခ် ကူကူရယ်လာ မြေလှိမ့်ဘော ဖြတ်ပို့တာကို ဧရိယာထဲမှာ လူကပ်မခံထားရတဲ့ တိုက်စစ်မှူး မစ်ကဲလ် အွိုင်ရာဇာဘဲလ်က ပိတ်သွင်းပြီး ရယူသွားခဲ့ပါတယ်။
စပိန်က ပထမပိုင်းမှာ တစ်ဂိုးအသာနဲ့ ဦးဆောင်ခဲ့သလို ဒုတိယပိုင်းမှာလည်း ဩစတြီးယားကို ဆက်တိုက်လိုလို ဖိကစားခဲ့ပါတယ်။ ၆၆ မိနစ်မှာတော့ ခြေစွမ်းပြနေတဲ့ တောင်ပံတိုက်စစ်မှူး အဲလက်စ် ဘေနာက ဘယ်တောင်ပံက ဖြတ်တင်ပေးတဲ့ ဘောလုံးကို နောက်ခံလူ ပက်ဒရို ပေါ်ရိုက ခေါင်းတိုက်ပြီး စပိန်တို့ ဒုတိယ ဦးဆောင်ဂိုး ရခဲ့ပြန်ပါတယ်။
ပွဲပြီး မိနစ် ၉၀ ပြည့်ခါနီးမှာတော့ ကူကူရယ်လာရဲ့ ပါးနပ်ပြီး အကွက်မြင်တဲ့ ပေးပို့မှုကို လူကျွံထောင်ချောက်ကနေ ဖောက်ထွက်သွားတဲ့ အွိုင်ရာဇာဘဲလ်က ဂိုးသမားနဲ့ တစ်ဦးချင်း အတွေ့မှာ အသာအယာ ပိတ်သွင်းခဲ့တာကြောင့် စပိန်တို့ သုံးဂိုးပြတ်နဲ့ အောင်ပွဲခံခဲ့ပါတယ်။ စပိန်အသင်းဟာ အခုပွဲမှာ ဒီထက်မက ဂိုးတွေ ရနိုင်တဲ့ အခြေအနေတွေ ရှိပေမယ့်လည်း ဩစတြီးယား ဂိုးသမား အလက်ဇန္ဒား ရှလာဂါရဲ့ ကြိုးစား ကာကွယ်မှုတွေနဲ့ ကံခေမှုတွေကြောင့် ဂိုးထပ်မရခဲ့ပါဘူး။
Public Service Announcement
စပိန်တိုက်စစ်မှူး အွိုင်ရာဇာဘဲလ်ကတော့ အခုနှစ် ကမ္ဘာ့ဖလားမှာ သွင်းဂိုး ၄ ဂိုးထိ ရရှိထားပါပြီ။ အရင်သွင်းဂိုးတွေကိုတော့ အုပ်စုအဆင့်၊ ဆော်ဒီအာရေဘီးယားနဲ့ တွေ့ဆုံချိန်တုန်းက သွင်းယူခဲ့တာပါ။
စပိန်ဟာ ၁၆ သင်း ရှုံးထွက်အဆင့်မှာတော့ ပေါ်တူဂီနဲ့ ရင်ဆိုင်ကစားရတော့မှာ ဖြစ်ပါတယ်။
ကိုးကား: FIFA
