ကမ္ဘာ့ဖလား ဘောလုံးပြိုင်ပွဲ သမိုင်းတလျှောက် ဂိုးသွင်းအများဆုံး တတိယနေရာ လုပွဲမှာ အင်္ဂလန်က ပြင်သစ်ကို ခြောက်ဂိုး-လေးဂိုးနဲ့ အနိုင်ရသွားခဲ့ပါတယ်။ ဒါ့အပြင် အခုပွဲမှာ နှစ်ဂိုးသွင်းခဲ့တဲ့ ပြင်သစ် တိုက်စစ်မှူး ကီလီယမ် အမ်ဘာပေကလည်း လက်ရှိ ကမ္ဘာ့ဖလားရဲ့ ဂိုးသွင်းဘုရင် နေရာမှာရော၊ ကမ္ဘာ့ဖလား သမိုင်းတလျှောက် ဂိုးသွင်းအများဆုံး စာရင်းမှာပါ အာဂျင်တီးနား တိုက်စစ်မှူး လီယွန်နယ် မက်ဆီကို ကျော်တက်သွားပါတယ်။ မက်ဆီကတော့ ဗိုလ်လုပွဲအဖြစ် စပိန်နဲ့ တစ်ပွဲ ကစားဖို့ ကျန်နေပါသေးတယ်။
အခုပွဲ မတိုင်ခင်မှာ အင်္ဂလန် အသင်းမန်နေဂျာ သောမတ်စ် တူဟဲလ်က တတိယနေရာ လုပွဲကို ဘယ်အသင်းမှ မကစားချင်ကြဘူးလို့ လူသိရှင်ကြား မှတ်ချက်ပေးခဲ့ပေမယ့် ဒီပွဲမှာတော့ အင်္ဂလန်ဟာ ဖိဖိစီးစီးနဲ့ ကစားသွားပါတယ်။ နှစ်သင်းစလုံး ဖွင့်ကစားခဲ့တဲ့ အခြေအနေမှာတော့ အင်္ဂလန်ရဲ့ ခပ်သွက်သွက် တန်ပြန်ထိုးနှက်တဲ့ နည်းဗျူဟာက အလုပ်ဖြစ်ခဲ့ပြီး ပထမပိုင်းမှာတင် ပြင်သစ်ကို လေးဂိုး-ဂိုးမရှိနဲ့ ဦးဆောင်ခဲ့ပါတယ်။ အင်္ဂလန်အတွက် ပထမပိုင်း သွင်းဂိုးတွေကို ဒက်ကလန်ရိုက်စ်နဲ့ အက်ဇ်ရာ ကွန်ဆာတို့က တစ်ဂိုးစီ၊ ဘူကာယို ဆာကာက နှစ်ဂိုး သွင်းခဲ့တာပါ။
ပထမပိုင်းမှာ အတော်လေး စွမ်းဆောင်ရည် နိမ့်ပါးနေခဲ့တဲ့ ပြင်သစ်ဟာ ဒုတိယပိုင်းမှာတော့ ကစားပုံ ပိုသွက်လာသလို အမ်ဘက်ပေက ချေပဂိုးနှစ်ဂိုး၊ ဘရက်ဒ်လေ ဘာကိုလာနဲ့ အူစ်မာနီ ဒမ်ဘီလီက တစ်ဂိုးစီ သွင်းယူခဲ့ပါတယ်။ ဒါပေမဲ့ အင်္ဂလန်ဖက်မှာလည်း ဆာကာက နောက်တစ်ဂိုး ထပ်သွင်းပြီး Hat-Trick ရသွားသလို နာကျင်အချိန်ပို နောက်ဆုံးမိနစ်မှာ ဂျုဒ်ဘယ်လင်ဟမ်က တစ်ဂိုး ထပ်သွင်းပြီး ခြောက်ဂိုး-လေးဂိုးနဲ့ ပွဲပြီးဆုံးခဲ့တာ ဖြစ်ပါတယ်။
ဒီပွဲမှာ နှစ်ဂိုးသွင်းခဲ့တာကြောင့် အမ်ဘက်ပေရဲ့ လက်ရှိ ကမ္ဘာ့ဖလားပြိုင်ပွဲ စုစုပေါင်း သွင်းဂိုးက ၁၀ ဂိုးထိ ရှိလာပြီး ဂိုးသွင်းဘုရင် ရွှေဖိနပ်ဆု တန်းစီစာရင်းမှာ မက်ဆီကို ၂ ဂိုးအသာနဲ့ ဦးဆောင်နေပါတယ်။ ဒါတင်မကသေးဘဲ သူဟာ ကမ္ဘာ့ဖလား ပြိုင်ပွဲ သမိုင်းတလျှောက်မှာ စုစုပေါင်း ၂၂ ဂိုးထိ ရရှိခဲ့ပြီး မက်ဆီရဲ့ ကမ္ဘာ့ဖလား စုစုပေါင်း သွင်းဂိုး ၂၁ ဂိုး စံချိန်ကို ကျော်တက်နိုင်ခဲ့တာ ဖြစ်ပါတယ်။
Public Service Announcement
အသက် ၃၉ နှစ် ရှိပြီဖြစ်တဲ့ မက်ဆီဟာ ကမ္ဘာ့ဖလား ပြိုင်ပွဲ ၆ ခုမှာ စုစုပေါင်း ၃၃ ပွဲ ကစားခဲ့ပြီး ၂၁ ဂိုး သွင်းခဲ့တာ ဖြစ်ပေမယ့် အသက် ၂၇ နှစ်အရွယ် အမ်ဘက်ပေကတော့ ကမ္ဘာ့ဖလား ပြိုင်ပွဲ ၃ ခုတည်းမှာ စုစုပေါင်း ၂၂ ပွဲသာ ကစားပြီး ၂၂ ဂိုးထိ ရရှိခဲ့တာပါ။ တစ်နည်းအားဖြင့် သူဟာ ကမ္ဘာ့ဖလားမှာ ပျမ်းမျှ တစ်ပွဲကို တစ်ဂိုးနှုန်း သွင်းယူထားတာ ဖြစ်ပါတယ်။
အခုပွဲစဉ်မှာ အမ်ဘက်ပေရဲ့ သွင်းဂိုးနှစ်ဂိုးစလုံးကို ပံ့ပိုး ဖန်တီးပေးခဲ့တဲ့ ပြင်သစ် ကွင်းလယ်လူ မိုက်ကယ် အိုလီဆေးကလည်း အခုနှစ် ကမ္ဘာ့ဖလား ပြိုင်ပွဲမှာ ဂိုးဖန်တီးမှု စုစုပေါင်း ၇ ကြိမ်ထိ ပြုလုပ်နိုင်ခဲ့ပါတယ်။ ဒါကြောင့် သူဟာ ကွယ်လွန်သူ ဘရာဇီး ဂန္ထဝင် ဘောလုံးကြယ်ပွင့်ဟောင်းကြီး ပီလီရဲ့ စံချိန်ဟောင်းကို ကျော်ဖြတ်ခဲ့ပါတယ်။ ၁၉၇၀ ပြည့်နှစ် ကမ္ဘာ့ဖလား ပြိုင်ပွဲတုန်းက ပီလီဟာ စုစုပေါင်း ဂိုးဖန်တီးမှု ၆ ကြိမ် ပြုလုပ်နိုင်ခဲ့ပြီး အခုတော့ အိုလီဆေးက ကမ္ဘာ့ဖလား ပြိုင်ပွဲတစ်ခုအတွင်း ဂိုးဖန်တီးမှု အရေအတွက် အများဆုံး စံချိန်သစ်ကို ပိုင်ဆိုင်လာတာ ဖြစ်ပါတယ်။ ပီလီဟာ အဲဒီနှစ် ကမ္ဘာ့ဖလားမှာ စုစုပေါင်း ၆ ပွဲ ကစားခဲ့ပြီး အိုလီဆေးကတော့ အခုနှစ် ကမ္ဘာ့ဖလားမှာ ၈ ပွဲ ကစားခဲ့ပါတယ်။
ဒီပွဲမှာ တစ်ဂိုးသွင်းခဲ့တဲ့ အင်္ဂလန် ကွင်းလယ်လူ ဘယ်လင်ဂမ်ကတော့ ကမ္ဘာ့ဖလား သမိုင်းတလျှောက် ပြိုင်ပွဲတစ်ခုမှာ ဂိုးအများဆုံးရတဲ့ အင်္ဂလိပ် ကစားသမားအနေနဲ့ မှတ်တမ်းဝင်ခဲ့ပါတယ်။ အဲဒီဂိုးဟာ ဘယ်လင်ဂမ်ရဲ့ အခုနှစ် ကမ္ဘာ့ဖလားမှာ သတ္တမမြောက် သွင်းဂိုးလည်း ဖြစ်လာခဲ့ပါတယ်။
ခြောက်ဂိုး-လေးဂိုးဆိုတဲ့ ရလဒ်ဟာ ကမ္ဘာ့ဖလား သမိုင်းတလျှောက် တတိယ လုပွဲအားလုံးမှာ ဂိုးအရေအတွက် အများဆုံး ဖြစ်ရုံသာ မကဘဲ သမိုင်းတလျှောက်မှာ ဒုတိယ သွင်းဂိုးအများဆုံး ကမ္ဘာ့ဖလား ပွဲစဉ် အနေနဲ့လည်း မှတ်တမ်းဝင်ခဲ့ပါတယ်။ တစ်ပွဲတည်းမှာ နှစ်ဖက် ဂိုးအများဆုံး သွင်းယူတဲ့ စံချိန်ကတော့ ၁၉၈၂ ပြိုင်ပွဲမှာ ဟန်ဂေရီက အယ်လ်ဆာဗေဒိုးကို တစ်ဆယ်ဂိုး-တစ်ဂိုးနဲ့ အနိုင်ယူခဲ့တဲ့ အုပ်စုပွဲစဉ် ဖြစ်ပါတယ်။
ကိုးကား: FIFA, ESPN
