မြောက်ကိုရီးယား အစိုးရဟာ ကာကွယ်ရေး ဝန်ကြီးကို ရာထူးကနေ ရုတ်တရက် ထုတ်ပယ်လိုက်ကြောင်း သိရပါတယ်။
နိုကွမ်ချိုဟာ ဝန်ကြီးတာဝန်ကနေ ရပ်စဲခြင်း ခံခဲ့ရရုံသာ မကဘဲ အာဏာရ အလုပ်သမား ပါတီရဲ့ ခေါင်းဆောင်ပိုင်း အဆင့်ကနေပါ ရာထူးအလျှော့ ခံခဲ့ရကြောင်း အစိုးရပိုင် KCNA သတင်းဌာနဲ့ ထုတ်ပြန်ချက်မှာ ဖော်ပြထားပါတယ်။
ဩဂုတ် ၃၀ ရက်နေ့ သတင်းထဲမှာတော့ မြောက်ကိုရီးယားရဲ့ စစ်မက်ရေးရာ ခေါင်းဆောင်ပိုင်းနေရာ ပြင်ဆင်ဖွဲ့စည်းမှုတွေအရ နိုကို ကာကွယ်ရေး ဝန်ကြီးအဖြစ်ကနေ ဖယ်ရှားလိုက်တာလို့ ပါရှိခဲ့ပါတယ်။ နိုဟာ ပါတီထဲမှာလည်း ခဲယမ်းထုတ်လုပ်မှုဌာန ဒုတိယညွှန်ကြားရေးမှူး ၁ အဖြစ် ပြောင်းလဲ ခန့်အပ်ခံခဲ့ရပြီး ပါတီခေါင်းဆောင်ပိုင်း နေရာကနေ ရာထူးချ ခံခဲ့ရပါတယ်။
ဖွဲ့စည်းပုံနဲ့ ရာထူးနေရာ အပြောင်းအလဲတွေ ကိစ္စကို ဩဂုတ် ၂၉ ရက်နေ့က နိုင်ငံ အဓိပတိ ကင်မ်ဂျုံအွန်း ဦးဆောင်တဲ့ အစည်းအဝေး တစ်ခုမှာ ဆုံးဖြတ်ချက် ချမှတ်ခဲ့ကြောင်း KCNAက ဆိုပါတယ်။
Public Service Announcement
မြောက်ကိုရီးယားစစ်တပ်ရဲ့ အထွေထွေ နိုင်ငံရေးဗျူရို ညွှန်ကြားရေးမှူး ကင်မ်ဆောင်ဂီဟာ ကာကွယ်ရေး ဝန်ကြီးအသစ် ဖြစ်လာပါတယ်။
မြောက်ကိုရီးယား စစ်တပ်ရဲ့ နောက်ထပ် အကြီးတန်း အရာရှိ တစ်ဦးဖြစ်သူ ကာကွယ်ရေး အကြံပေး ပက်ဂျောင်ချုံဟာ ဗဟိုစစ်ရေး ကော်မရှင် (CMC)ရဲ့ ဒုတိယ ဥက္ကဋ္ဌ ဖြစ်လာသလို အာဏာရ ပါတီရဲ့ ပေါ်လစ်ဗျူရို အဖွဲ့ထဲမှာလည်း ထည့်သွင်းခံခဲ့ရပါတယ်။ KCNAဟာ နောက်ထပ် သိသာထင်ရှားတဲ့ စစ်ဘက်ရာထူး အပြောင်းအလဲတွေကိုလည်း ကြေညာသွားခဲ့ပါတယ်။
သီးခြားသတင်းတစ်ပုဒ်မှာတော့ ခေါင်းဆောင်ကြီး ကင်မ်ဟာ ဩဂုတ် ၂၉ ရက်နေ့ အခမ်းအနား တစ်ခုမှာ နိုင်ငံရဲ့ စစ်လက်နက် နည်းပညာ တိုးတက်ရေးအတွက် ကြိုးစားပေးခဲ့တဲ့ သုတေသီတွေ၊ သိပ္ပံပညာရှင်တွေ၊ အရာရှိတွေနဲ့ တွေ့ဆုံခဲ့ပြီး သူတို့ကို ချီးကျူးစကား ပြောခဲ့သလို အစိုးရရဲ့ ဂုဏ်ပြု ဆုတံဆိပ်တွေ အပ်နှင်းခဲ့ကြောင်း KCNAက ဖော်ပြသွားပါတယ်။
နိုင်ငံရဲ့ လက်နက်သုတေသန စင်တာဟာ မကြာသေးခင် ကာလတွေအတွင်း ထူးခြားဆန်းသစ်တဲ့ နည်းပညာတွေကို အောင်အောင်မြင်မြင် ဖော်ထုတ်လာနိုင်တယ်လို့ KCNAကဆိုပေမယ့် အသေးစိတ်ကိုတော့ မှတ်ချက်မပေးခဲ့ပါဘူး။
ဇွန်လတုန်းက ကင်မ်ဟာ ပြည်တွင်းမှာ ထုတ်လုပ်ပြီး အကွာအဝေး ပိုမိုချဲ့ထွင် တိုက်ခိုက်နိုင်တဲ့ အတွဲလိုက်ပစ် ဒုံးကျည်စနစ်တွေနဲ့ လက်နက်ကြီးတွေ စမ်းသပ်မှုကို ကိုယ်တိုင် ကြီးမှူးခဲ့ဖူးပါတယ်။
ကိုးကား: AFP
