ဟာရီကိန်းမုန်တိုင်း အီဆာယီးယက်စ် ဝင်ရောက် တိုက်ခတ်မှုကြောင့် အမေရိကန်မှာ လူ ၄ ဦး သေဆုံးခဲ့ပြီး ထိခိုက် ပျက်စီးမှုတွေ ကျယ်ကျယ်ပြန့်ပြန့် ဖြစ်ပေါ်ခဲ့ပါတယ်။
မုန်တိုင်းဟာ မက္ကဆီကို ပင်လယ်ကွေ့ထဲမှာ ဖြတ်သန်းနေချိန် Category 3 အဆင့်ထိ အားကောင်းခဲ့ပြီး မြောက်ဖက်မှာရှိတဲ့ ဖလော်ရီဒါ ကမ်းရိုးတန်းကို အောက်တိုဘာ ၁၀ ရက် မနက်အစောပိုင်းမှာ စတင် ဝင်ရောက်ခဲ့ပါတယ်။ ကုန်းတွင်း ဝင်ရောက်ပြီးတဲ့နောက်ပိုင်း အီဆာယီးယက်စ်ဟာ အပူပိုင်း မုန်တိုင်းငယ်အဖြစ် အားလျော့သွားပြီး အလာဘားမား၊ တင်နက်ဆီနဲ့ ကန်တက်ကီ ပြည်နယ်တွေထဲ ဆက်လက် ဖြတ်သန်းခဲ့ပါတယ်။
မုန်တိုင်းကြောင့် အဆောက်အအုံတချို့ ပြိုလဲကုန်တာ၊ အမိုးတွေအားလုံး ကျွတ်ထွက်ကုန်တာ၊ သစ်ပင်နဲ့ ဓာတ်တိုင်တွေ လဲကျတာတွေ ဖြစ်ခဲ့ပါတယ်။ ပြီးတော့ အိမ်ခြေ သိန်းနဲ့ချီ ဓာတ်အား ပြတ်တောက်မှုတွေလည်း ဖြစ်ပေါ်ခဲ့ပါတယ်။ လေပြင်းတွေ တိုက်ခတ်ပြီး မိုးသည်းသည်းထန်ထန် ရွာသွန်းမှုတွေကြောင့် တချို့နေရာတွေမှာ ရေလွှမ်းမိုးမှုတွေ ပေါ်ပေါက်ခဲ့ပါတယ်။
အလာဘားမားနဲ့ ဖလော်ရီဒါတို့မှာ မုန်တိုင်းကြောင့် သေဆုံးသူ ၂ ဦးစီ စာရင်းရထားကြောင်း အာဏာပိုင်တွေက ပြောပါတယ်။ အဲဒီထဲမှာ အိမ်ပေါ်ကို သစ်ပင်ကျိုးကျပြီး ပိမိ သေဆုံးသူတွေလည်း ပါဝင်ခဲ့ပါတယ်။
Public Service Announcement
အောက်တိုဘာ ၁၀ ရက် ညပိုင်းထိ အခြေအနေတွေအရ ပြည်နယ်တချို့က လူပေါင်း ၅ သိန်းလောက်ဟာ လျှပ်စစ်ဓာတ်အား မရသေးတဲ့ အခြေအနေနဲ့ ကြုံတွေ့ခဲ့ပါတယ်။
အီဆာယီးယက်စ်ဟာ တစ်နာရီကို ကီလိုမီတာ ၁၇၀ နီးပါး လောက်တိုက်နှုန်းမျိုးနဲ့ ဖလော်ရီဒါ ကမ်းရိုးတန်းကို စတင် ဝင်ရောက်ခဲ့ပြီး အဲဒီနောက်မှာတော့ အပူပိုင်း မုန်တိုင်းငယ်၊ အပူပိုင်း လေဖိအားနည်း ရပ်ဝန်း အဆင့်ဆီ တဖြည်းဖြည်း အားလျော့သွားခဲ့ပါတယ်။
မုန်တိုင်း မဝင်ခင် ကတည်းက အလာဘားမား၊ ဖလော်ရီဒါနဲ့ ဂျော်ဂျီယာ ပြည်နယ်တွေမှာ ရာသီဥတုဆိုင်ရာ အရေးပေါ် သတိပေးချက်တွေ ကြိုတင် ထုတ်ပြန်ထားခဲ့ပါတယ်။
ဒီအတောအတွင်း ဟာရီကိန်းမုန်တိုင်း ဆိုင်မွန်ဟာလည်း မက္ကဆီကိုနိုင်ငံ အနောက်တောင်ဖက် ပစိဖိတ် သမုဒ္ဒရာထဲမှာ Category 4 အဆင့်ထိ အင်အားကောင်းလာနေပြီး ကမ်းရိုးတန်းနဲ့အပြိုင် ရွေ့လျားနေပါတယ်။ ဆိုင်မွန်ဟာ အခုသီတင်းပတ်ထဲမှာ မက္ကဆီကို နိုင်ငံကို ကုန်းတွင်းဝင်ရောက် တိုက်ခတ်ဖွယ် ရှိနေပါတယ်။
အမေရိကန်ကို ကုန်းတွင်း ဝင်ရောက်ခဲ့တဲ့ အီဆာယီးယက်စ်ဟာ အတ္တလန္တိတ် ဟာရီကိန်း ရာသီမှာ ကြုံတွေ့ရတဲ့ ပထမဆုံး ဟာရီကိန်း မုန်တိုင်းလည်း ဖြစ်လာပါတယ်။ အယ်လ်နီညို အပူလှိုင်း ဖြတ်မှုကြောင့် အခုနှစ် ဟာရီကိန်း ရာသီဟာ ပုံမှန်ထက် ပိုပြီး နောက်ကျခဲ့တယ်လို့လည်း သိရပါတယ်။
ကိုးကား: BBC
