ထားမြတ်/People’s Spring
ကချင်ပြည်နယ် ဗန်းမော်မြို့နယ် (၇)မိုင်ကျေးရွာအနီးတွင် ယနေ့ တိုက်ပွဲပြင်းထန်ခဲ့ပြီး စစ်ကောင်စီတပ်က ပြည်သူလူထု နေအိမ်များကို မီးရှို့ ဖျက်ဆီးခဲ့ကြောင်း ကချင်စစ်ရေးသတင်းရင်းမြစ်က ပြောသည်။
ယနေ့ (အောက်တိုဘာ ၁၂ရက်)တွင် ကချင်လွတ်လပ်ရေးတပ်မတော်(KIA)နှင့် စစ်ကောင်စီတပ်တို့ (၇)မိုင်ကျေးရွာအနီး တိုက်ပွဲပြင်းထန်ခဲ့ပြီး စစ်ကောင်စီတပ်က အထိနာခဲ့သည်ဟု ဆိုသည်။
Public Service Announcement
” မီးရှို့တာဟုတ်တယ်။ မင်းအောင်လှိုင်သားတွေ(စစ်ကောင်စီတပ်ဖွဲ့ဝင်တွေ)က ဗန်းမော်ဘက်က ၇မိုင်နားထဲက အိမ်တွေကို။ဒီနေ့တော့ ၇မိုင်နဲ့ ၆မိုင်ကြားထဲကို လုံး၀ကို အသည်းအသန် (တိုက်ပွဲ)အကြီးအကျယ်ဖြစ်နေတာ။ အဲဒါ သူတို့ နည်းနည်း နစ်နာလို့လား မသိဘူး။ ရွာတွေကို ပြန်မီးရှို့တာ မင်းအောင်လှိုင် အဖွဲ့တွေက”ဟု ကချင်စစ်ရေးသတင်းရင်းမြစ်က ပြောသည်။
စစ်ကောင်စီတပ်ဖွဲ့ဝင်များ မီးရှို့၍ နေအိမ်များ မီးလောင်နေမှုကို KIA တပ်ဖွဲ့ဝင်များက ဒရုန်းဖြင့် ရိုက်ကူးထားသည့် ရုပ်သံလည်း လူမှုကွန်ရက်၌ ထွက်ပေါ်လာသည်။
KIAသည် ဗန်းမော်မြို့နယ် လုံခြုံရေးအတွက် အရေးပါသည့် မိုးမောက်မြို့နယ် ခမရ(၄၃၇) တပ်ရင်းကို ဩဂုတ် ၁၉ရက်က အပြီးသတ်သိမ်းပိုက်ပြီးနောက် စစ်ကောင်စီက ပြန်လည်ထိုးစစ်ဆင်နေ၍ ဗန်းမော်-မိုးမောက်ကြားတိုက်ပွဲများ ဆက်တိုက်ဖြစ်ပွားလျက်ရှိသည်။
စစ်ကောင်စီအနေဖြင့် လေကြောင်း၊ လက်နက်ကြီးပစ်ကူအပြင် ခြေလျင်နှင့်တင့် ပူးတွဲ စစ်ဆင်သည့် ထိုးစစ်ပြုလုပ်ခဲ့သော်လည်း KIA ပူးပေါင်းတပ်များ၏ ခုခံတိုက်ခိုက်မှုကြောင့် မကြာခဏ အထိနာလျက်ရှိပြီး ရှေ့မတိုးနိုင်ဘဲ ဖြစ်နေသည်။
