ပဲခူးတိုင်း မြို့နယ် ၄ခုတွင် သုံးရက်အတွင်း တိုက်ပွဲများတွင် စစ်ကောင်စီတပ်သား ၁၇ဦးသေဆုံးဟု တောင်ပိုင်းစစ်ဒေသ အသိပေး

ဟန်နွေ/People’s Spring

တောင်ပိုင်းစစ်ဒေသ၊ အမှတ် (၂)စစ်ဒေသခွဲနယ်မြေတွင် ၃ရက်အတွင်း စစ်ကောင်စီတပ်သား ၁၇ဦးသေဆုံးအောင် တိုက်ခိုက်နိုင်ခဲ့ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော် တောင်ပိုင်းစစ်ဒေသက သတင်းထုတ်ပြန်သည်။

ပဲခူးတိုင်း ကြို့ပင်ကောက်မြို့နယ်၊ ပဲနွယ်ကုန်းမြို့နယ်၊ ကျောက်ကြီးမြို့နယ်နှင့် တောင်ငူမြို့နယ်တို့၌ ပြီးခဲ့သည့် သုံးရက်အတွင်း စစ်ဆင်ရေးများ ဖော်ဆောင်ခဲ့ခြင်းဖြစ်ကြောင်း တောင်ပိုင်းစစ်ဒေသက အောက်တိုဘာ ၂၈ရက် တွင် ဖော်ပြခဲ့သည်။

Public Service Announcement

တောင်ပိုင်းစစ်ဒေသ၊ အမှတ် (၂)စစ်ဒေသခွဲ နယ်မြေတွင် ပြည်သူ့ကာကွယ်ရေးရဲဘော်များက စစ်ကောင်စီစစ်ကြောင်းနှင့် အထိုင်ချစခန်းများအား စစ်ဆင်ရေးများ ဖော်ဆောင်ခဲ့ခြင်းဖြစ်ပြီး ၃ ရက်အတွင်း စစ်ကောင်စီတပ်သား ၁၇ဦးသေဆုံးကာ ၆ ဦးဒဏ်ရာရရှိခဲ့ဟု အသိပေးသည်။

တိုက်ပွဲဖြစ်စဉ် အသေးစိတ်အခြေအနေများ ဖော်ပြမထားသော်လည်း တိုက်ပွဲများအတွင်း ရန်သူ၏ သေနတ် တစ်လက်ကို ရေတာရှည်မြို့နယ် ပကဖ အဖွဲ့က သိမ်းဆည်းရမိခဲ့ကြောင်း ဖော်ပြသည်။

အဆိုပါ တိုက်ခိုက်မှုများကို ပြည်သူ့ကာကွယ်ရေးတပ်မတော်၊ ပြည်သူ့ကာကွယ်ရေးအဖွဲ့(ပကဖ) နှင့် KNLA တပ်ရင်း(၉) ဒရုန်းအဖွဲ့တို့ ပူးပေါင်းဆောင်ရွက်ခဲ့ခြင်းဖြစ်ကြောင်းလည်း ထုတ်ပြန်ခဲ့ပြီး စစ်ဆင်ရေးအတွင်း တော်လှန်ရေးပူးပေါင်းတပ်မှ ထိခိုက်မှုရှိ၊မရှိကို ဖော်ပြမထားပေ။