သတိုး / People’s Spring
ရန်ကုန်မြို့ သာကေတမြို့နယ် ယမုံနာလမ်းရှိ ဂက်စ်မီးဖိုအရောင်းဆိုင် မီးလောင်မှုတွင် ဒဏ်ရာရရှိသူသုံးဦးရှိခဲ့သည်။
နိုဝင်ဘာ ၂၃ ရက် နံနက် ၁၀ နာရီအချိန်ခန့်တွင် မီးလောင်မှုစတင်ခဲ့ခြင်းဖြစ်ပြီး တစ်နာရီခန့် မီးငြှိမ်းသတ်ခဲ့ရကြောင်း မီးသတ်တပ်ဖွဲ့က ထုတ်ပြန်ထားသည်။
ယင်းမီးလောင်မှုတွင် အမျိုးသား နှစ်ဦး နှင့် အမျိုးသမီး တစ်ဦး ထိခိုက်ဒဏ်ရာရရှိခဲ့ပြီး ရန်ကုန်ဆေးရုံသို့ ပို့ဆောင်ပေးခဲ့ကြောင်း လူမှုကူညီကယ်ဆယ်ရေးအဖွဲချုပ်(ရန်ကုန်) ကသတင်းထုတ်ပြန်ထားသည်။
Public Service Announcement
“ယမုံနာလမ်းမကြီးပေါ်က ဆိုင်တွေထဲက တစ်ဆိုင်က အုန်းဆိုပြီး ပေါက်ကွဲသံအကျယ်ကြီး ကြားပြီး ခဏနေတော့ နောက်ဆက်တွဲ ပေါက်ကွဲသံတွေ ဆက်ကြားရတာပဲ။ Gas ဖြည့်တဲ့ဆိုင် ကစပေါက်ကွဲပြီး စလောင်တာလား ဘေးဆိုင်ကလားတော့ သေချာမသိဘူး။ ပေါက်ကွဲမှုက တော်တော်လေး ပြင်းပါတယ် ဖုန်လုံးကြီး က ၅လွှာ တိုက်ကျော်တယ်။ ” ဟု ဒေသခံတစ်ဦးကပြောသည်။
မီးငြှိမ်းသတ်သည့် အချိန်၌ ဂက်စ်အိုးများပေါက်ကွဲသည့် အသံများလည်း ကြားရပြီး ဒဏ်ရာရရှိသူနှစ်ဦးရှိသည်ဟု သိရကြောင်း ယင်းဒေသခံက ဆိုသည်။
“မြန်မာနိုင်ငံမှာ Gas အိုးတွေက နေရာအနှံ့ အသုံးပြုလာကြပေမယ့် Safety နဲ့ ပတ်သက်တဲ့ Awareness အားနည်းတော့ ခုလိုမျိုး မလိုလားအပ်တဲ့ ပျက်စီးဆုံးရှုံးမှုတွေ ဖြစ်ရတာပါပဲ။ သတိထားရမယ့်အထဲ Gas အိုးတွေလဲ ပါတယ်။” ဟု ၎င်းက အကြံပြုသည်။
မီးလောင်မှု အကြောင်းရင်း နှင့် ဆုံးရှုံးမှုတန်ဖိုးများ နှင့်ပတ်သက်၍ မီးသတ်တပ်ဖွဲ့က ထုတ်ပြန်ချက်၌ ဖော်ပြထားခြင်းမရှိပေ။
