ရန်ကုန်မြို့ ၊ သာကေတမြို့နယ်ရှိ စစ်ကောင်စီ၏ ရေတပ်စခန်းဝင်းအနီး ယမန်နေ့ (အောက်တိုဘာ ၃) ညပိုင်းက ဗုံးပေါက်ခဲ့ကြောင်း ရပ်ကွက်နေပြည်သူများက ပြောသည်။
ယမန်နေ့ည ၉ နာရီဝန်းကျင်တွင် သာကေတမြို့နယ် အမှတ် (၄) ရပ်ကွက် ရှုခင်းသာလမ်းမကြီးပေါ်ရှိ Yangon Water Boom နှင့် စစ်တပ်၏ ရေတပ်စခန်းဝင်းအနီး တို့တွင် ဗုံးပေါက်ကွဲသံ တစ်ချက် ကျယ်လောင်စွာကြားခဲ့ရကြောင်း ယင်းမြို့နယ်နေပြည်သူတစ်ဦးက ပြောသည်။
“ညက ၉ နာရီလောက်မှာ ရေတပ်ဝင်းဘက်က ဗုံးပေါက်သံ အကျယ်ကြီးကြားလိုက်ရတယ်။ အသံကတော်တော်ကျယ်တယ်။ ဒေါပုံဘက်ကသူတွေတောင် ကြားလိုက်ရတယ်။ လူထိခိုက်မှု ရှိ၊ မရှိတော့ သေချာမသိရဘူး။ ယမုံနာလမ်းနဲ့ ရှုခင်းသာလမ်းတလျောက် လူနာတင်ယာဉ်တွေ၊ စစ်ကားတွေ သွားနေတာလည်း တွေ့လိုက်ရတယ်” ဟု သာကေတမြို့နယ်နေ ပြည်သူတစ်ဦးကပြောသည်။
ဗုံးပေါက်ကွဲမှု ဖြစ်ပွားပြီးနောက် စစ်ကောင်စီဝင်များက သာကေတမြို့နယ် ယမုံနာလမ်းမကြီး၊ ရှုခင်းသာမြို့ပတ်လမ်းနှင့် ဗန္ဓုလတံတားတို့တွင် အိမ်စီးကားများနှင့် အဌားယာဥ် (Taxi) များကို စစ်ဆေးမှုပြုလုပ်ခဲ့ကြောင်း ဒေသခံအချို့က ပြောသည်။
Public Service Announcement
ထို့အပြင် ယမန်နေ့ ည ၁၀ နာရီခန့်က တောင်ဒဂုံမြို့နယ်နှင့် မြောက်ဒဂုံမြို့နယ်တို့တွင်လည်း ဗုံးပေါက်ကွဲသံများ ကျယ်လောင်စွာ ကြားလိုက်ရကြောင်းလည်း တော်လှန်ရေးသတင်းများ တင်ဆက်နေသည့် Rangoon Scout Network က ဖော်ပြထားသည်။
