တပ်မဟာ(၅)နယ်မြေ၌ နိုဝင်ဘာတိုက်ပွဲများအတွင်း တပ်ရင်းမှူးအပါအဝင် စစ်ကောင်စီတပ် ၉၀နီးပါးသေဟု KNUထုတ်ပြန်

ဟန်နွေ/People’s Spring

ကရင်အမျိုးသားအစည်းအရုံး(KNU) တပ်မဟာ(၅)နယ်မြေ ဖာပွန်ခရိုင်(မူတြော်ခရိုင်)၌ နိုဝင်ဘာတွင် ဖြစ်ပွားခဲ့သောတိုက်ပွဲများအတွင်း စစ်ကောင်စီတပ်မှ တပ်ရင်းမှူးနှင့် ဒုတပ်ရင်းမှူးအပါဝင် စစ်ကောင်စီတပ်ဖွဲ့ဝင် ၉၀ နီးပါးသေဆုံးခဲ့ဟု KNUဗဟိုက ယနေ့(ဒီဇင်ဘာ ၆ရက်) သတင်းထုတ်ပြန်သည်

နိုဝင်ဘာ ၁ရက်မှ ၃၀ရက်အထိ ကရင်အမျိုးသားလွတ်မြောက်ရေးတပ်မတော် (K.N.L.A)၊ တော်လှန်ရေး ပူးပေါင်းတပ်များနှင့် စစ်ကောင်စီတပ်အကြားတိုက်ပွဲဖြစ်ပွားမှု အခြေအနေ၊ ထိခိုက်ကျဆုံးအခြေအနေများကို အသိပေးခဲ့ခြင်းဖြစ်သည်။

နိုဝင်ဘာလအတွင်း တိုက်ပွဲပေါင်း ၄၃ကြိမ်ထက်မနည်းဖြစ်ပွားခဲ့ရာ စစ်ကောင်စီ တပ်သား ၈၈ဦး သေဆုံးပြီး ၁၃ ဦး ဒဏ်ရာရရှိခဲ့ကြောင်းဖော်ပြသည်။ KNLA ပူးပေါင်းတပ်မှ ထိခိုက်ကျဆုံး ရှိꩻမရှိ အခြေအနေကို ဖော်ပြမထားပေ။

Public Service Announcement

စစ်ကောင်စီ၏ ကူးဆိပ်စခန်းနှင့် မာထောစခန်းတို့ကို နိုဝင်ဘာအတွင်း သိမ်းပိုက်နိုင်ခဲ့သည်ဟုလည်း အသိပေးသည်။ KNLA ပူးပေါင်းတပ်၏ စခန်းသိမ်းတိုက်ပွဲများအတွင်း စစ်ကောင်စီတပ်ထံမှ လက်နက်ကြီးလက်နက်ငယ်များ သိမ်းပိုက်ရရှိခဲ့သည်။

တိုက်ပွဲများဖြစ်ပွားစဉ် စစ်ကောင်စီတပ်မှ လေကြောင်းကို အဓိကအသုံး ပြုကာပစ်ကူပေးခဲ့ကြောင်း၊ ထို့ပြင် စားနပ်ရိက္ခာများကိုလည်း လေကြောင်းမှ ပို့ဆောင်ပေးခဲ့ကြောင်း ဖော်ပြသည်။

ထို့ပြင် စစ်ကောင်စီတပ်မှ ပြည်သူလူထုများနေထိုင်ရာ ကျေးရွာများအတွင်းသို့ လေကြောင်းမှ ဗုံး (၁၆) လုံးနှင့် လက်နက်ကြီးများဖြင့် ပစ်ခတ်ခဲ့ရာ အရပ်သား ပြည်သူ ၁ဦး ဒဏ်ရာရခဲ့သည်ဟုဆိုသည်။