ကလေးအကျဥ်းထောင်၌ အကျဉ်းသားများအား အခန်းခဟုဆိုကာ ကျပ်သိန်းချီတောင်းနေ

ဇေအောင်/People’s Spring

စစ်ကိုင်းတိုင်း၊ ကလေးအကျဥ်းထောင်တွင် ထောင်အာဏာပိုင်များက အကျဉ်းသားများထံ အခန်းခဟုဆိုကာ ကျပ်သိန်းချီတောင်းရမ်းနေကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။

ကလေးအကျဉ်းထောင်တွင် အကျဥ်းသားများအား အခန်းခအဖြစ် ကျပ် ၃သောင်းမှ ကျပ် ၂သိန်းအထိ တောင်းခံနေပြီး ငွေကြေးမတတ်နိုင်ပါက မကောင်းမွန်ခြင်းမရှိသော အခန်းများတွင် နေထိုင်နေရကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)က ထုတ်ပြန်သည်။

ထို့အပြင် အခြားထောင်အချို့တွင်လည်း ယခုကဲ့သို့ ငွေကြေးကောက်ခံမှုမျိုး ကြုံဖူးကြောင်း PPNM၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။

Public Service Announcement

“ထောင်တိုင်းမှာဖြစ်နေလားဆိုတာတော့ ကျွန်တော်တို့မှာ Data(အချက်အလက်)မရှိတဲ့အတွက် ပြောရခက်တယ်။ လက်ရှိ ကလေးအကျဥ်းထောင်မှာလည်း ဒီလိုတွေရှိသလို မြင်းခြံ၊ ဟင်္သာတ၊ ကျိုက်မရောမှာဖြစ်ခဲ့တယ်။ ဖျာပုံထောင်၊ မြောင်းမြထောင်တွေမှာဖြစ်ခဲ့တာရှိတယ်။”ဟု ကိုသိုက်ထွန်းဦးက ဆိုသည်။

အခန်းခမပေးနိုင်ပါက အလုပ်များမကြာခဏခိုင်းလေ့ရှိပြီး အကျဥ်းသား ကိုအေးချမ်းအောင်ဆိုသူမှာ အလုပ်ကြမ်းလုပ်ရင်း အမောဖောက် သေဆုံးသည့်ဖြစ်စဉ်ဖြစ်ခဲ့ဖူးကြောင်း PPNMက ဆိုသည်။

ထို့အပြင် ရောဂါအခံရှိသူများကိုပင် အလုပ်မလုပ်ပါက လျှော့ရက်‌ဖြတ်မည်ဟု ခြိမ်းခြောက်ကာ အလုပ်ကြမ်းများ ခိုင်းနေကြောင်း သိရသည်။

နိုင်ငံရေးအကျဉ်းသားများကိုလည်း ပြစ်မှုကြီးကျူးလွန်ထားသူများအား အုပ်ချုပ်‌စေခိုင်းထားပြီး ကိုယ်ထိလက်ရောက် ကျူးလွန်စေခြင်း၊ စိတ်ရောကိုယ်ပါ အနှောင့်အယှက်ပေးခြင်းများ ပြုလုပ်စေခိုင်းထားကြောင်း PPNMက ထပ်မံအသိပေးသည်။

ကလေးအကျဉ်းထောင်တွင်းမှ ထောင်ပိုင် အောင်မိုးဝင်း၊ ထောင်ပိုင်လေး ချိုမင်းလတ်နှင့် တန်းစီးချုပ် ကျော်နိုင်လင်း(ခ)ရခိုင်တို့က နိုင်ငံရေးအကျဥ်းသားများအပါအဝင် အကျဥ်းသားများအား ဖိနှိပ်နေခြင်းဖြစ်ကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)က ထုတ်ပြန်ထားသည်။

၂၀၂၂ ခုနှစ် မတ်လအတွင်းကလည်း ကလေးထောင်တွင် ထောင်အာဏာပိုင်များနှင့် အကျဉ်းသားများအကြား ပဋိပက္ခဖြစ်ပွားခဲ့ပြီး ချင်းအမျိုးသားကာကွယ်ရေးတပ်ဖွဲ့ (CNDF)တပ်ဖွဲ့ဝင်အချို့ အပါအဝင် ခုနစ်ဦး ပစ်သတ်ခံခဲ့ရသေးသည်။