ရွှေဘိုအကျဥ်းထောင်တွင် အကျဥ်းသားများဧည့်တွေ့ခွင့် နာရီဝက် ကျပ်သုံးသိန်း ပေးနေရဟုဆို

ဇေအောင်/People’s Spring

စစ်ကိုင်းတိုင်း၊ ရွှေဘိုအကျဥ်းထောင်တွင် အကျဥ်းသားများဧည့်တွေ့ခွင့်အဖြစ် မိနစ် ၃၀လျှင် ကျပ်သုံးသိန်းပေးနေရကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။

ရွှေဘိုအကျဉ်းထောင်တာဝန်ခံ ထောင်ပိုင်အောင်လွင် ဆိုသူသည် အကျဉ်းသားတွေ့ခွင့်ကို မိနစ်၃၀လျှင် ငွေကျပ် သုံးသိန်း သက်မှတ်ထားပြီး မပေးပါက ဧည့်တွေ့ခွင့်မပေးကြောင်း PPNM၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။

“ငွေကောက်ခံတာက လက်ရှိသိထားတာတော့ ရွှေဘိုထောင်တစ်ခုတည်း ဖြစ်တယ်။ အကျဥ်းသားအခွင့်အရေးဟာ ဒီလိုမျိုး ငွေပေးပြီးမှ တွေ့ရမယ့်အခြေအနေမဟုတ်ဘူး။ တနိုင်ငံလုံး အကျဥ်းထောင်တွေမှာ ဧည့်တွေ့ခွင့်ရနေတဲ့အပေါ်မှာ ခုလိုလုပ်တာ လုံးဝလက်သင့်မခံနိုင်တဲ့လုပ်ဆောင်ချက်ဖြစ်တယ်။ ထောင်အာဏာပိုင်တွေအနေနဲ့ အမြန်ဆုံး ဒီကိစ္စကိုရပ်တန့်ဖို့၊ လာဘ်စားနေမှုတွေကို ရပ်တန့်ဖို့နဲ့ အကျဥ်းသားအားလုံးကို မိသားစုဝင်တွေနဲ့ ဧည့်တွေ့ခွင့်ပေးဖို့ တောင်းဆိုပါတယ်။”ဟု ကိုသိုက်ထွန်းဦးက ပြောသည်။

Public Service Announcement

ထိုကဲ့သို့ ငွေပေး၍ ဧည့်တွေ့ခွင့်ပြုသူများမှာ အခြားအကျဥ်းသားများသာဖြစ်ပြီး နိုင်ငံရေးအကျဥ်းသားများကိုမူ ၂၀၂၄ ဇွန်လမှစ၍ ပိတ်ပင်ထားခဲ့ရာ ယနေ့အထိ ဧည့်တွေ့ခွင့်မပေးသေးကြောင်း PPNM၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။

အကျဥ်းသားဧည့်တွေ့ခွင့် ငွေကောက်ခံမှုနှင့်ပတ်သက်၍ ရွှေဘိုမြို့ရှိ နိုင်ငံရေးသမားများထံ ဆက်သွယ်မေးမြန်းထားပြီး မှတ်ချက်တစုံတရာ မရရှိသေးပေ။

ထိုအပြင် အကျဉ်းသားများအား ကျွေးမွေးရာတွင် အကျဉ်းထောင် သက်မှတ်နှုန်းထားအတိုင်းမဟုတ်ဘဲ တစ်ရက်ခြားလျှင် ကြက်ဥ(၁)လုံးကျစီသာပေး၍ ထောင်ပိုင်က ကိုယ်ကျိုးစီးပွားရှာနေကြောင်း PPNMက အသိပေးထားသည်။

ရွှေဘိုအကျဥ်းထောင်၌ အကျဥ်းသားတစ်ထောင်ကျော်ရှိပြီး စစ်ကောင်စီ၏ထောင်တာဝန်ရှိသူများက အကျဥ်းသားများအား လူ့အခွင့်အရေးချိုးဖောက်မှုများ ပြုလုပ်နေကြောင်း နိုင်ငံရေးအကျဥ်းသားမိသားစုဝင်များထံမှ သိရသည်။

ရွှေဘိုမြို့နယ်အား အာဏာသိမ်းစစ်တပ်က စစ်အုပ်ချုပ်ရေးနယ်မြေအဖြစ် သတ်မှတ်ထားသော်လည်း တော်လှန်ရေးအားကောင်းရာဒေသတစ်ခုဖြစ်ပြီး ရွှေဘိုအကျဥ်းထောင်အတွင်း နိုင်ငံရေးအကျဥ်းသားအများအပြားလည်း ဖမ်းဆီးခံထားရသည်။