သတိုး၊ကျော်ဇော /People’s Spring
စစ်ကိုင်းတိုင်း၊ မုံရွာမြို့ရှိ အနောက်မြောက်တိုင်းစစ်ဌာနချုပ်(နမခ)အား ၁၀၇ မမ ရှော့တိုက်ဒုံးများဖြင့်တိုက်ခိုက်ခဲ့ရာ စစ်ကောင်စီတပ်မှ ဗိုလ်ကြီးအဆင့်တစ်ဦးအပါအဝင် ခြောက်ဦးသေဆုံးပြီး သုံးဦးထိခိုက်ဒဏ်ရာရရှိခဲ့ကြောင်း Brave Warriors for Myanmar (BWM) မှ တာဝန်ရှိသူက ပြောသည်။
ဇန်နဝါရီ ၁၄ ရက် ည ၉နာရီ ၄၅ မိနစ်တွင် နမခအား ရှော့တိုက်ဒုံး လေးလုံးဖြင့် ပစ်ခတ်တိုက်ခိုက်ခဲ့ခြင်းဖြစ်ပြီး နမခ-ဒုတိုင်းမှူး အဆောင် ရှော့တိုက်ဒုံးထိမှန်၍ပြိုကျပျက်စီးခဲ့ကြောင်း ၎င်းက ဆိုသည်။
” ဗိုလ်ကြီးကောင်းထက်ဇော် အပါအဝင် စစ်ကောင်စီတပ်ဖွဲ့ဝင် ၆ ဦးပွဲချင်းပြီးသေဆုံးတပ်ကြပ်ကြီး တစ်ဦးအပါအဝင် ၃ ဦးမှာ ထိခိုက်ဒဏ်ရာရ၍ အရေးပေါ်ကြပ်မတ်ဆောင်တင်ထားရကြောင်း ကနဦးစုံစမ်း နမခ သိရှိရသည်”ဟု BWM ကသတင်းထုတ်ပြန်ထားသည်။
Public Service Announcement
အဆိုပါစစ်ဆင်ရေးကို Brave Warriors for Myanmar (BWM) အဖွဲ့၏ ဦးဆောင်စီမံမှုဖြင့် Shadow (မုံရွာ)၊ Anonymous Heroes၊ Chindwin Fighters၊ ဒေါင်းမျိုးဆက် ဗိုလ်မုတ်ဆိတ်၊ Democratic Rangers အဖွဲ့တို့ပူးပေါင်းလုပ်ဆောင်ခဲ့ခြင်းဖြစ်သည်။
“မုံရွာမြို့ အကြမ်းဖက် စစ်ကောင်စီ တိုင်းစစ်ဌာနချုပ်အတွင်းမှ လက်နက်ကြီး ကျရောက်ပေါက်ကွဲသံများ ကြားရပြီး နမခအတွင်း မှ သေနတ်ပစ်သံများ အတွဲလိုက်ပစ်သံများ ၊ ရှက်ပြေးတောင်ပေါ် ၊ ရေအိုးစင်ဂိတ်တွေကပါသေနတ်များ ရမ်းပစ်ခတ်နေကြပြီး နမခမှ လက်နက်ကြီးဖြင့် အနောက်မြောက်အရပ်ကို ရမ်းသန်းပစ်ခက်လျှက် ရှိနေပါတယ် ခင်ဗျာ”ဟု ဒေသသတင်းရင်းမြစ် မုံရွာမြို့နယ်သတင်းမှန်ပြန်ကြားရေးက ဖော်ပြသည်။
“ပစ်ခတ်တိုက်ခတ်မှု လုပ်ခဲ့တယ်လို့တော့ သိရတယ်ဗျ။ ပါဝင်တဲ့အဖွဲ့အစည်းတွေတော့ မသိရသေးဘူးဗျ။ နမခထဲမှာ ထိခိုက်မှုရှိတယ်လို့တော့ ကြားတယ်ခင်မျ”ဟု မုံရွာမြို့နယ်ပြည်သူ့ကာကွယ်ရေးအဖွဲ့(ပကဖ)မှ တာဝန်ရှိသူတစ်ဦးက ပြောသည်။
သို့သော် စစ်ကောင်စီတပ်၏ ထိခိုက်မှုများနှင့်ပတ်သက်ပြီး လူထုနွေဦးက သီးခြားအတည်မပြုနိုင်ပေ။
လက်ရှိအခြေအနေတွင် စစ်ကောင်စီတပ်က မုံရွာ-ကျောက္ကာ-အရာတော်လမ်းပိုင်း၌ တပ်လှုပ်ရှားမှုများရှိနေပြီး မုံရွာခရိုင်အတွင်းရှိ ဘုတလင်နှင့် အရာတော်မြို့များ၌ အင်အားတိုးချဲ့ကာ ခံစစ်ပြင်နေသည်ဟု ယူဆရကြောင်း မုံရွာ ပကဖက အသိပေးသည်။
“စကစ က စစ်ရေးတိုးချဲ့တယ်ဆိုတာထက် ရိက္ခာ၊ လူအချိန်းအပြောင်းတွေအတွက် (မုံရွာ-ကျောက္ကာ-အရာတော်)လမ်းပိုင်းမှာ အင်အား ယာယီချထားတယ်လို့ မြင်မိတယ်ဗျ”ဟု ပကဖ တာဝန်ရှိသူတစ်ဦးက ထင်မြင်ချက်ပေးသည်။
ဇန်နဝါရီလ ၉ ရက်နေ့နံနက်ပိုင်းကလည်း မုံရွာမြို့ နမခ ဌာနချုပ်မှ ထွက်လာသော စစ်ကောင်စီတပ်ယာဉ်တန်းကို မုံရွာ-အရာတော်လမ်းပိုင်း၌ တော်လှန်ရေးပူးပေါင်းအဖွဲ့များက ကြားဖြတ်တိုက်ခိုက်ခဲ့ရာ စစ်ကောင်စီတပ်မှ ၁၅ ဦးသေဆုံး၍ ၇ ဦးအရှင်ဖမ်းမိကာ သေ နတ် ၄လက်နှင့် ခဲယမ်းများရရှိခဲ့ကြောင်း တော်လှန်ရေးတပ်ဖွဲ့များက ထုတ်ပြန်ထားသည်။
“အနောက်မြောက်တိုင်းစစ်ဌာနချုပ် (နမခ)သည် စစ်ကိုင်းတိုင်း၊ မကွေးတိုင်းမြောက်ပိုင်းနှင့် ချင်းပြည်နယ်တို့ရှိ စစ်ကောင်စီ၏ တိုက်ခိုက်ရေးလက်ရုံးတပ်ဖွဲ့များကို အဓိကအမိန့်ပေးကွပ်ကဲနေသော စစ်ဌာနချုပ်ဖြစ်ပြီး ယင်း ဒေသများကို တော်လှန်ရေးအရှိန်အဟုန်ယုတ်လျော့စေရန်နှင့် ပြည်သူများကို အဓိက ညှင်းပန်းနှိပ်စက်ရန် အဓိက ကြိုးကိုင်ခြယ်လှယ်နေသော စစ်ဌာနချုပ်ဖြစ်သောကြောင့် တိုက်ခိုက်ခဲ့ခြင်းဖြစ်သည်ဟု BWMက သတင်းထုတ်ပြန်ထားသည်။
အဆိုပါစစ်ဆင်ရေးကို BWM၏ အကြိမ် (၃၀)မြောက်စစ်ဆင်ရေးအဖြစ် လုပ်ဆောင်ခဲ့ခြင်းဖြစ်ပြီး BWM သည် ယမန်နေ့ညကလည်း အခြားမဟာမိတ်အဖွဲ့များနှင့်အတူ လွိုင်ကော်မြို့၌ စစ်ကောင်စီဒုခေါင်းဆောင်စိုးဝင်း တတ်ရောက်ခဲ့သည့် ညစာစားပွဲနှင့် ဒေသကွပ်ကဲမှုစစ်ဌာနချုပ် (ဒကစ လွိုင်ကော်)အား ရှော့တိုက်ဒုံးများဖြင့် ပစ်ခတ်တိုက်ခိုက်ခဲ့သေးသည်။
