ကျော်ဇော/People’s Spring
တနင်္သာရီတိုင်း၊ ပုလောမြို့နယ်၊ ရှပ်ပုံကျေးရွာအုပ်စုသို့ စစ်ကြောင်းထိုးလာသည့် စစ်ကောင်စီတပ်အား ကရင်အမျိုးသားကာကွယ်ရေးတပ်(KNDO)၊ တပ်ရင်း (၇)နှင့် မဟာမိတ်တပ်များက နှစ်ရက်ဆက် ပိတ်ဆို့တိုက်ခိုက်ရာ စစ်ကောင်စီက ရေကြောင်းနှင့် လေကြောင်းပစ်ကူများပေးပြီး တပ်ပြန်ဆုတ်သွားရကြောင်း ပြည်သူ့ကာကွယ်ရေးတပ်မတော်(PDF)၊ မြိတ်ခရိုင် တပ်ရင်း(၁)မှ ပြောခွင့်ရသူတစ်ဦးက လူထုနွေဦးသို့ ပြောသည်။
ရှပ်ပုံကျေးရွာအုပ်စုသို့ ဖေဖော်ဝါရီ ၁၃ ရက် နံနက် ၈နာရီခန့်တွင် အင်အား ၇၀ခန့်ဖြင့် စစ်ကြောင်းထိုးလာသည့် စစ်ကောင်စီတပ်အား မဟာမိတ်တပ်ပေါင်းစုက နံနက်ပိုင်းတွင် တစ်ကြိမ်၊ နေ့လယ် ၁နာရီခန့်တွင်တစ်ကြိမ် တိုက်ခိုက်ခဲ့ကြောင်း ၎င်းပြောခွင့်ရသူက ပြောသည်။
ထို့နောက် ဖေဖော်ဝါရီ ၁၄ ရက်နံနက် ၁၀နာရီခွဲခန့်တွင် စစ်ကောင်စီတပ်စစ်ကြောင်းက ရှပ်ပုံအုပ်စု၊ ရေချိုကျေးရွာဘက်သို့ တောလမ်းမှတဆင့် ရှေ့တိုးလာရာ မဟာမိတ်တပ်ပေါင်းစုက အပြင်းအထန်တိုက်ခိုက်၍ ပြန်ဆုတ်နိုင်အောင် ပိတ်ဆို့ထားနိုင်ခဲ့သည်ဟု တပ်ရင်း(၁)က အသိပေးသည်။
Public Service Announcement
“ဟုတ်တယ်ဗျ။ (ထွက်လမ်းမရှိ)နောက်မှာ ပင်လယ်ပဲ ကျန်တယ်”ဟု မြိတ်ခရိုင် တပ်ရင်း(၁)မှ ပြောခွင့်ရသူက လူထုနွေဦးသို့ ပြောသည်။
ထို့အပြင် ပိတ်ဆို့ခံထားရသည့် စစ်ကောင်စီတပ်သည် ၎င်း၏တပ်သားများကို ကယ်ထုတ်ရန် ပင်လယ်ပြင်မှ စစ်သင်္ဘောဖြင့် လက်နက်ကြီးပစ်ကူးပေးခြင်း၊ ဖေဖော်ဝါရီ ၁၄ ရက် နေ့လယ် ၃နာရီခန့်တွင် လေယာဥ်ဖြင့် ဗုံးသီးအလုံး ၂၀ ခန့်ကြဲချ၍ လေကြောင်းပစ်ကူပေးခဲ့သည်ဟု တပ်ရင်း(၁)က ထုတ်ပြန် သည်။
အဆိုပါ ရေကြောင်းနှင့် လေကြောင်းပစ်ကူပေးစဥ်အတွင်း ပြည်သူတစ်ဦးသေဆုံးပြီး တစ်ဦးထိခိုက်ဒဏ်ရာရရှိကာ မဟာမိတ်တပ်ပေါင်းစုမှ ရဲဘော်တစ်ဦးကျဆုံး၍ နှစ်ဦး ဒဏ်ရာရခဲ့ကြောင်း အသိပေးဖော်ပြသည်။
“အမည် ကိုသင်္ကြန်ဦး အသက် ၄၀ဝန်းကျင်။ လက်နက်ကြီးအစ နားထင်ကိုထိပြီး ပွဲချင်းပြီးသေဆုံးခဲ့ပါတယ်”ဟု ပြည်သူထိခိုက်သေဆုံးမှုကို တပ်ရင်း(၁)မှ ပြောခွင့်ရသူက ရှင်းပြသည်။
အထက်ပါ နှစ်ရက်ဆက်တိုက်ပွဲအတွင်း စစ်ကောင်စီတပ်မှ ၁၀ ဦးထက်မနည်းသေဆုံးပြီး ထိခိုက်ဒဏ်ရာရသူများအား ရေကြောင်းနှင့် လေကြောင်းပစ်ကူများပေး၍ ပြန်ဆုတ်သွားကြောင်း မြိတ်ခရိုင် တပ်ရင်း (၁)က ထုတ်ပြန်ထားသည်။
အလားတူ တနင်္သာရီတိုင်းအတွင်း စစ်ရေးတိုက်ခိုက်မှုများဖြစ်ပွားလျှက်ရှိရာ တနင်္သာရီမြို့နယ်၊ ထုံခါ-မောတောင်လမ်း၌ စစ်ကောင် စီတပ်နှင့် တော်လှန်ရေးမဟာမိတ်တပ်များကြား နှစ်ဘက်ထိတွေ့တိုက်ပွဲများဆက်လက်ပြင်းထန်နေဆဲ ဖြစ်သည်။
