နိုဝင်ဘာ-၅၊ ၂၀၂၅။ ထားမြတ်/People’s Spring
တနင်္သာရီတိုင်း၊ ပုလောမြို့အမှတ် (၄)ရပ်ကွက်အုပ်ချုပ်ရေးမှူး စိုးဝေနဲ့ သက်တော်စောင့် စစ်ကောင်စီတပ်သားကို ရှင်းလင်းခဲ့ကြောင်း ပြည်သူ့ကာကွယ်ရေးတပ်မတော်(PDF) မြိတ် ခရိုင်အမှတ်(၁)တပ်ရင်းက နိုဝင်ဘာ ၅ရက်မှာ ထုတ်ပြန်ပါတယ်။
အောက်တိုဘာ ၂၃ရက် မနက်က ပုလောမြို့ ကျောက်စုဂိတ်အနီးမှာ ပုလောမြို့အမှတ် ၄ ရပ်ကွက် အုပ်ချုပ်ရေးမှူး စိုးဝေနဲ့ သက်တော်စောင့်ဖြစ်တဲ့ စစ်ကောင်စီရဲ့ ပြည်သူ့စစ်မှုထမ်း တပ်သား ၁ဦးကို မြိတ်ခရိုင် အမှတ်(၁)တပ်ရင်းနဲ့ ကရင်အမျိုးသားကာကွယ်ရေးတပ်(KNDO) ပူးပေါင်း မဟာမိတ်အဖွဲ့က ပစ်ခတ်ခဲ့တဲ့ အခြေအနေကို အသိပေးထုတ်ပြန်တာဖြစ်ပါတယ်။
“အုပ်ကြီးက ပစ္စတိုကို ဟန်ပြကိုင်ပြီး ပြည်သူတွေကို ခြိမ်းခြောက်နေတယ်။ ကျနော်တို့ ပစ်ခတ်ပြီး သိမ်းဆည်းချိန်မှ အတုဖြစ်နေတာကို သိခဲ့ရပါတယ်”လို့ မြိတ်ခရိုင် အမှတ်(၁) တပ်ရင်း သတင်းပြန်ကြားရေး တာဝန်ရှိသူက ပြောပါတယ်။
Public Service Announcement
အဲဒီ တိုက်ခိုက်မှုမှာ အုပ်ကြီးနဲ့ သက်တော်စောင့် စစ်သားဟာ ပွဲချင်းပြီး သေဆုံးခဲ့တာဖြစ်ပြီး သူတို့ဆီက AK47 ရိုင်ဖယ် (၁) လက်၊ ကျည်ဘောက် (၁) ခု၊ ကျည် ၇တောင့်၊ ကလေးကစားစရာ ပစ္စတို (၁) လက်၊ ကလေးကစားစရာ လက်ပစ်ဗုံး (၂) လုံးနဲ့ Vivo ဖုန်းအစုတ် (၁) လုံး တို့ကို သိမ်းဆည်းရတယ်လို့ မြိတ်ခရိုင် အမှတ်(၁) တပ်ရင်းက ထုတ်ပြန်ပါတယ်။
အုပ်ကြီးစိုးဝေဟာ ပြည်သူအပေါ် လက်နက်အတုသုံး ခြိမ်းခြောက်ငွေညှစ်တာ၊ စစ်မှုထမ်းအတင်းအကြပ် စုဆောင်းတာ၊ အနိုင်ထက်ပြုမူတာတွေ လုပ်ဆောင်နေလို့ အကြိမ်ကြိမ် သတိပေးပြီး မလုပ်ဖို့ တားမြစ်ခဲ့ပေမယ့် မလိုက်နာလို့ ရှင်းလင်းခဲ့ရတာဖြစ်ကြောင်း ဖော်ပြထားပါတယ်။
“ စစ်ကောင်စီရဲ့ ဒေါက်တိုင်မှန်သမျှကိုတော့ အချိန်မရွေး နေရာမရွေး လိုအပ်သလို အရေးယူဆောင်ရွက်မှာပါခင်ဗျ” လို့လည်း မြိတ်ခရိုင် အမှတ်(၁) တပ်ရင်း သတင်းပြန်ကြားရေး တာဝန်ရှိသူက ပြောပါတယ်။
