စစ်ကိုင်းတိုင်း၊ဟုမ္မလင်းအခြေစိုက် စစ်ကောင်စီလက်အောက်ခံ ရှမ်းနီပြည်သူ့ စစ်(SNA) တပ်ဖွဲ့ဝင် ကိုးဦး လက်နက်များဖြင့် အလင်းဝင်လာကြောင်း ဟုမ္မလင်းမြို့နယ်ပြည်သူ့ကာကွယ်ရေးအဖွဲ့ (ပကဖ)တာဝန်ရှိသူက လူထုနွေဦးသို့ ပြောသည်။
ဟုမ္မလင်းမြို့နယ် SNA (၇၅၃) တပ်ရင်းမှ တပ်ဖွဲ့ဝင် ကိုးဦးသည် ယခုနှစ်လဆန်းပိုင်းတွင် လက်နက်များနှင့်အတူ ဟုမ္မလင်းမြို့နယ် ပြည်သူ့ကာကွယ်ရေးအဖွဲ့ (ပကဖ)နှင့်ချိတ်ဆက်ကာ ပြည်သူ့ရင်ခွင်သို့ခိုလှုံလာခြင်းဟု ဆိုသည်။
“၂ ယောက်တစ်တွဲ ၃ ယောက်တစ်တွဲ အဲ့လိုဝင်လာခဲ့ကြတာ။အဲ့လူတွေ ၉ ယောက်ကို မနေ့က(ဖေဖော်ဝါရီ ၂၀ ရက်)မှ အားလုံးစုပြီး ချီးမြှင့်ငွေပေးခဲ့တာ”ဟု အထက်ပါတာဝန်ရှိသူက ပြောသည်။
Public Service Announcement
SNA တပ်ဖွဲ့ဝင် ကိုးဦးသည် G-3 သုံးလက်၊ AK ဒင်ခေါက် တစ်လက်၊ AK တစ်လက်၊ ကီးချန်း တစ်လက်၊G-3ကျည် ၁၉၅ တောင့် နှင့် 7.62 ကျည် ၆၀၇ တောင့်ကို ယူဆောင်လာခဲ့ကြောင်းအသိပေးသည်။
၎င်းတို့ကို ကောင်းမွန်စွာထိန်းသိမ်းစောင့်ရှောက်ထားပြီး မိသားစုဝင်များနှင့် တွေ့ဆုံစေခဲ့ကြောင်းလည်း ဟုမ္မလင်းမြို့နယ်ပြည်သူ့ကာကွယ်ရေးအဖွဲ့ (ပကဖ)က ယနေ့ထုတ်ပြန်ထားသည်။
ကျန်းမာရေးစောင့်ရှောက်မှုအပါအဝင် ခန္တီးခရိုင်ပေါင်းစပ်ညှိနှိုင်းရေးအဖွဲ့မှဦးဆောင်ပြီး အလင်းဝင် SNA တပ်ဖွဲ့ဝင်များကို ဂုဏ်ပြုငွေများပေးခဲ့ကြောင်း သိရသည်။
စစ်ကောင်စီလက်အောက်ခံ SNA တပ်ဖွဲ့ဝင်များ အနေဖြင့် ပြည်သူများဘက်သို့ ရပ်တည်ပြီး ခိုလှုံမှုကို လှိုက်လှဲစွာကြိုဆိုနေပြီး ၎င်းတို့ကိုဆက်သွယ်ကြရန်လည်း ဟုမ္မလင်းမြို့နယ် ပြည်သူ့ကာကွယ်ရေးအဖွဲ့ က တိုက်တွန်းသည်။
ဟုမ္မလင်း၊ဗန်းမောက်၊အင်းတော်၊ဝန်းသို၊ပင်လည်ဘူး၊တမူး၊မန်စီ၊မိုးမောက်၊မိုးကောင်း၊မိုးညှင်းတို့တွင် စစ်ကောင်စီ၏ လက်နက်ခဲယမ်းဖြည့်တင်းပေးမှုနှင့်အတူ SNAက တပ်ရင်းများဖွဲ့စည်းကာ စစ်ကောင်စီနှင့်အတူ တော်လှန်ရေးအင်အားစုများကို ခုခံလျှက်ရှိသည်။
