မင်းတပ်မြို့သိမ်းတိုက်ပွဲ ထောက်ပို့တောင်သူများပိုင် နွားနောက်များအတွက် ဒေါင့်သန်းရောဂါကာကွယ်ဆေးထောက်ပံ့

မတ်-၁၉၊ ၂၀၂၅။အိမ်သွင်/People’s Spring

ချင်းပြည်နယ်၊ မင်းတပ်မြို့သိမ်းတိုက်ပွဲအတွင်း ထောက်ပို့ရေးလုပ်ပေးခဲ့သော မွေးမြူရေးတောင်သူများပိုင် နွားနောက်များ ဒေါင့်သန်းရောဂါဖြစ်ပွာနေမှုအပေါ် ကာကွယ်ဆေးထောက်ပံ့မည်ဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့(ပကဖ)က ကြေညာသည်။

ချင်းတော်လှန်ရေးတပ်များက မြို့သိမ်းတိုက်ပွဲတိုက်ခိုက်နေစဉ် ဒေသခံတောင်သူများက နွားနောက်၊နွား၊ကျွဲ၊ဆိတ်၊ဝက်၊ကြက်တို့ကို လှူဒါန်းခဲ့ကြသည်ဟု ဆိုသည်။ လက်ရှိတွင် မြို့နယ်အတွင်း၌ နွားနောက်များ ဒေါင့်သန်းရောဂါဖြစ်ပွားနေပြီး ကုသရန် အခက်အခဲရှိနေချိန် အခမဲ့ကုသပေးရန် မင်းတပ်မြို့နယ်ပြည်သူ့အုပ်ချုပ်ရေးအဖွဲ့က စီစဉ်ခြင်းခြင်းဖြစ်သည်။

” မြို့သိမ်းတိုက်ပွဲကာလတုန်းက ပြည်သူက ရတဲ့နည်းနဲ့ ထောက်ပို့လုပ်ကြတာ။ ဒါက သိပ်အရေးပါတယ်”ဟု ချင်းတော်လှန်ရေးရဲဘော်တစ်ဦးက ပြောသည်။

Public Service Announcement

မင်းတပ်မြို့နယ်တွင် ပြီးခဲ့သည့် ဖေဖော်ဝါရီကလည်း မြို့နယ်တွင်းမှ ပိုင်ရှင်မဲ့ခွေးနှင့် ကြောင်များနှင့် မြို့အနီးရှိ ကျေးရွာများမှ မွေးမြူထားသော အိမ်မွေးခွေးနှင့် ကြောင်များအား ခွေးရူးပြန်ကာကွယ်ဆေးထိုးပေးခဲ့သည်။

လက်ရှိတွင် နွားနောက်များ ဒေါင့်သန်းရောဂါဖြစ်ပွားမှုသည် မင်းတပ်အပြင် ချင်းပြည်နယ်မှ အခြားမြို့နယ်အချို့၌လည်း ဖြစ်နေ၍ ဒေသခံများ အကူအညီလိုအပ်နေသည်။

မင်းတပ်မြို့ကို ချင်းညီနောင်စစ်ဆင်ရေး(Operation CB)ဖြင့် တော်လှန်ရေးပူးပေါင်းတပ်များက ၂၀၂၄ ဒီဇင်ဘာတွင် တိုက်ခိုက်သိမ်းယူခဲ့ခြင်းဖြစ်သည်။