ဧပြီ -၁ ၊၂၀၂၅၊ရောင်နီ /People’s Spring
ငလျင်ကြောင့် ထိခိုက်သေကြေ အသက်ဆုံးရှုံးရတဲ့ ပြည်သူတွေအတွက် ဝမ်းနည်းခြင်းအထိမ်းအမှတ်ဆိုပြီး စစ်ကောင်စီရဲ့ ညွှန်ကြားချက်နဲ့ ဒီနေ့ ဧပြီလ ၁ ရက်နေ့ မွန်းလွဲပိုင်း ၁ နာရီ ခန့်မှာ ဥဩဆွဲ တာကို မြို့ကြီးတွေ မှာပြုလုပ်ခဲ့တယ်လို့ မြို့ခံတွေဆီကသိရပါတယ်။
ရန်ကုန် ၊မန္တလေး ၊ နေပြည်တော်မှာရှိတဲ့ မီးသတ်စခန်းတွေကနေ ဝမ်းနည်းခြင်းအထိမ်းအမှတ်အနေနဲ့ ဥဩဆွဲ ကြတာပါ။
ဒါပေမယ့် ဥဩဆွဲ သံကြောင့် ငလျင်ဘေးဆိုးကြီးကို ကြုံခဲ့ရတဲ့ မန္တလေးမြို့က မြို့ခံပြည်သူတွေ အထိတ်တလန့် ဖြစ်ခဲ့ရတယ်လို့ သိရပါတယ်။
Public Service Announcement
https://www.facebook.com/LuduNwayOo/videos/1332550131386464
” ဘာမှ ကြိုမကြေညာဘဲ ရုတ်တရက်ကြီး ဥဩဆွဲသံကြီးကြားရတာ ဘာထပ်ဖြစ်တာလဲဆိုပြီး အကုန်လန့်ဖြန့်ကြတာ” လို့ မန္တလေးမြို့ခံ အမျိုးသမီးတစ်ဦး က ပြောပါတယ်။
စစ်အာဏာသိမ်းမှုကြောင့် အကျပ်အတည်းတွေကို ရင်ဆိုင်ကြုံတွေ့နေရတဲ့မြန်မာပြည်သူတွေဟာ နှစ်ပေါင်းတစ်ရာအတွင်း အဆိုးရွားဆုံးငလျင်ဘေးကြီးကို ထပ်မံ ရင်ဆိုင်ခဲ့ရတာပါ။
ငလျင်ကြောင့် အာဏာသိမ်းစစ်ကောင်စီရုံးစိုက်ရာနေပြည်တော်အပါအဝင် မန္တလေး ၊ စစ်ကိုင်း ၊ပဲခူး နဲ့ ရှမ်းပြည်နယ်က ဒေသတွေမှာ အများပြည်သူ ထိခိုက်သေဆုံးမှုတွေ ၊အဆောက်အဦးပျက်စီးမှုတွေဖြစ်ပွားခဲ့တာပါ။
ငလျင်ဗဟိုချက်အနီးမှာရှိတဲ့ စစ်ကိုင်း နဲ့မန္တလေးမြို့တွေမှာ မြို့လုံးကျွတ်နီးပါး ပျက်စီးသွားပေမယ့် ကူညီကယ်ဆယ်ရေးကို စစ်ကောင်စီက လုပ်ကိုင်နိုင်စွမ်းမရှိဘူးလို့ မြို့ခံတွေက ပြောပါတယ်။
မန္တလေးမှာဆိုရင် ငလျင်လှုပ်ပြီး ငါးရက်ကြာတဲ့အထိ လူနေရပ်ကွက်တွေထဲက အပျက်အစီးတွေကြား ပိတ်မိသူတွေကို ရှာဖွေကယ်ထုတ်တာကို ရပ်ကွက်နေပြည်သူတွေက ကိုယ်ထူကိုယ်ထလုပ်ကိုင်နေရပါတယ်။
ဒါအပြင် စစ်ရုံးချုပ်အခြေစိုက်ရာ နေပြည်တော်မှာတောင် အာဏာသိမ်း စစ်ကောင်စီက လုံလောက်တဲ့ ကူညီကယ်ဆယ်မှု မလုပ်ဆောင်နိုင်ဘူး လို့ မြို့ခံပြည်သူအချို့ ဆီ စုံစမ်းမေးမြန်းမှုအရသိရပါတယ်။
ငလျင်ဘေးကယ်ဆယ်ရေးမှာ လည်း စစ်ကောင်စီတပ်ဖွဲ့ဝင်တွေအင်အားအများအပြားနဲ့ ပါဝင်ပြီး ရှာဖွေကယ်ဆယ်ရေးလုပ်ဆောင်တာမတွေ့ရဘူးလို့ မန္တလေး နဲ့ စစ်ကိုင်းမြို့ခံတွေက အသိပေးပါတယ်။
