ကရင် ကျုံဒိုးမြို့အနီးဝန်းကျင်ရှိ လေးတိုင်ရွာဘုန်းကြီးကျောင်းဗုံးကြဲခံရ

ဧပြီ – ၁၆၊၂၀၂၅၊ နိုင်ပကောင်း/People’s Spring

ဒီနေ့ သင်္ကြန်အတက်နေ့ (ဧပြီ ၁၆) မနက်ပိုင်းက ကရင်ပြည်နယ်၊ ကော့ကရိတ်မြို့နယ်​၊ ကျုံဒိုးမြို့ အနီးက လေးတိုင်ရွာ ရှိ ဘုန်းကြီးကျောင်း ဗုံးကြဲ တိုက်ခိုက်ခံလိုက်ရတယ်လို့ ဒေသခံတစ်ဦးထံကသိရပါတယ်။

ကျုံဒိုးမြို့အရှေ့ဘက် ကျုံဒိုး – ကော့ကရိတ်ကားလမ်းဘေးမှာရှိတဲ့ လေးတိုင်ရွာ ရဲ့ ဘုန်းကြီးကျောင်းဟာ မနက် ၉ နာရီကျော်က လေကြောင်းတိုက်ခိုက်ခံရတာလို့ ဒေသခံကဆိုပါတယ်။

လေကြောင်းတိုက်ခိုက်ခံရမှုကြောင့် ဘုန်းကြီးကျောင်းထိခိုက်ပျက်စီးသွားပေမယ့် “လူထိခိုက်မှု မရှိဘူး ” လို့ အဲဒီဒေသခံက ပြောပါတယ်။

Public Service Announcement

စစ်ကောင်စီလေတပ်ဟာ သင်္ကြန်အကြတ်နေ့နဲ့အတက်နေ့တွေမှာ ကျုံဒိုးမြို့အနီးက ကမ်းနီရွာ ဘုန်းကြီးကျောင်းနဲ့ လေးတိုင်ရွာ ဘုန်းကြီးကျောင်း နှစ်ကျောင်းကို ပစ်မှတ်ထားလေကြောင်းတိုက်ခိုက်ခဲ့တာပါ။

မနေ့ သင်္ကြန်အကြတ်နေ့ နေ့ခင်းပိုင်း ၁၂ နာရီဝန်းကျင်က ကမ်းနီရွာ ဘုန်းကြီးကျောင်း တိုက်ခိုက်ခံရမှုမှာ အရပ်သား ၅ ဦးထက်မနည်းသေဆုံးခဲ့ရပါတယ်။

ဗုဒ္ဓဘာသာဝင်တို့ရဲ့ ဓလေ့ထုံးတမ်းအရ သင်္ကြန်ကာလအတွင်း ဘုန်းကြီးကျောင်းတွေ မှာ ဥပုသ် သီတင်းသီလယူလေ့ရှိပြီး အခုလိုကာလမှာ ကျုံဒိုးမြို့အနီး ရွာတွေက ဘုန်းကြီးကျောင်း နှစ်ကျောင်း ဗုံးကြဲခံရတာလည်းဖြစ်ပါတယ်။

ကရင်ပြည်နယ်မှာ သင်္ကြန်ကာလအတွင်း ကော့ကရိတ် – ကျုံဒိုး လမ်းတလျှောက်နဲ့ ကော့ကရိတ်မြို့ မြောက်ပိုင်း မြပတိုင်ရွာ ၊ ရင်ကွဲတောင်စခန်းတဝိုက်မှာလည်း စစ်ကောင်စီတပ်နဲ့ KNU ပူးပေါင်းတပ်တွေကြား တိုက်ပွဲတွေ ပြင်းထန်နေတယ်လို့သိရပါတယ်။