ဧပြီ – ၂၃ ၊၂၀၂၅၊ နိုင်ပကောင်း/People’s Spring
ထိုင်း -မြန်မာ ကုန်သွယ်ရေး အာရှလမ်းမကြီးပိတ်ထားချိန်မှာ ယာယီအသုံးပြုနေရတဲ့လမ်းတွေထဲက အရေးပါတဲ့ ၁၀၁၈ ဒေါနတောင်ပေါ်လမ်းကြောင်းကို ကရင့်နယ်ခြားစောင့်တပ် (BGF) က တစ်လကြာပိတ်သွားဖို့ စီစဉ် နေတယ်လို့ BGF နဲ့နီးစပ်တဲ့ သတင်းရင်းမြစ်ထံကသိရပါတယ်။
၁၀၁၈ ဒေါနတောင်ပေါ်လမ်းကို လမ်းပိုင်းပြုပြင်ဖို့ဆိုပြီး လာမယ့်ရက်ပိုင်းက စတင်ကာ ခေတ္တ ပိတ်သွားဖို့ စီစဉ်နေတာလို့ သတင်းရင်းမြစ်က ပြောပါတယ်။
ထိုင်း – မြန်မာကုန်သွယ်ရေးလမ်းကြောင်းမှာ အဓိက ကျတဲ့ အာရှလမ်းမကြီးမှာ တိုက်ပွဲတွေ ဖြစ်ပြီးနောက် လမ်းပိုင်းပြတ်တောက်သွားတာပါ။
Public Service Announcement
အာရှလမ်းမကြီးဟာ ကော့ကရိတ်မြို့နဲ့ မြဝတီမြို့ ကိုဆက်သွယ်ထားတာလည်းဖြစ်ပါတယ်။
အာရှလမ်းမကြီးကိုအသုံးပြုမရချိန်မှာ ဒေါနတောင်တန်းကို ဖြတ်ဖောက်ထားတဲ့ ယခင်တောင်ပေါ်လမ်းဟောင်း၊ ၁၀၁၈ လမ်း ၊ ထို့ကော်ကိုးလမ်း၊ ကြက်ဥတောင်(သေ့ကတေ)လမ်းတို့ကို ကုန်စည်စီးဆင်းသယ်ယူပို့ဆောင်ရေးနဲ့ သွားလာရေးအတွက် အသုံးပြုနေတာပါ။
အဲဒီလမ်းပိုင်းတွေမှာ ဒေါနတောင်ပေါ်လမ်းဟောင်းဟာ ကတ္တရာလမ်းဖြစ်ပေမယ့် ကားတစ်စီးသာသာပဲ သွားလာလို့ရသလို ကျန်တဲ့ ၁၀၁၈ လမ်း ၊ ထို့ကော်ကိုးလမ်း၊ ကြက်ဥတောင်(သေ့ကတေ)လမ်းတွေကတော့မြေသားလမ်းဖြစ်ပါတယ်။
ဒါကြောင့်မိုးတွင်းမှာသွားလာရေးခက်ခဲနိုင်တယ်လို့ သိရပါတယ်။
၁၀၁၈ လမ်းနဲ့ ကြက်ဥတောင်(သေ့ကတေ) လမ်းပိုင်းတွေကို စစ်ကောင်စီတပ် လက်အောက်ခံ BGF က ထိန်းချုပ်ထားပြီး ထို့ကော်ကိုးလမ်း လမ်းပိုင်းကိုတော့ အပစ်ရပ်ထားတဲ့ ကရင်ငြိမ်းချမ်းရေးကောင်စီ (PC ) က စိုးမိုးထားတာဖြစ်ပါတယ်။
၁၀၁၈ လမ်းကို ခေတ္တပိတ်လိုက်ရင်တော့ ကျန်တဲ့ ကြက်ဥတောင်(သေ့ကတေ) လမ်းနဲ့ ထို့ကော်ကိုးလမ်း တွေကို အသုံးပြုနိုင်ဦးမှာပါ။
လမ်းပိုင်းခေတ္တပိတ်မယ့် အကြောင်းနဲ့ပတ်သက်ပြီး BGF ပြောရေးဆိုခွင့်ရှိသူထံဆက်သွယ်ပေမယ့်အဆက်အသွယ်မရသေးပါဘူး။
