မေ ၁၀၊ ၂၀၂၅။ အီယိုရီ/People’s Spring
အာဏာသိမ်းစစ်ကောင်စီက ယခုနှစ်ကုန်ပိုင်းတွင် ကျင်းပမည်ဆိုသော ရွေးကောက်ပွဲကို တရုတ်သမ္မတက အားပေးထောက်ခံသည်ဟု လိမ်လည်ဝါဒဖြန့်နေပြီး ရှီကျင့်ဖျင်မပြောဆိုသည့် စကားများကိုလည်း စစ်ကောင်စီဝါဒဖြန့်သတင်းစာများ၌ ဖော်ပြနေသည်။
စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်နှင့် တရုတ်သမ္မတရှီကျင့်ဖျင်တို့သည် ယမန်နေ့က ရုရှားနိုင်ငံ၊ မော်စကို၌ တွေ့ဆုံခဲ့ကြပြီး နှစ်နိုင်ငံကိစ္စရပ်များအား ဆွေးနွေးခဲ့ကြသည်။
တရုတ်နိုင်ငံသည် မြန်မာနိုင်ငံ၏ ကိုယ်ပိုင်အခြေအနေနှင့် ကိုက်ညီသော ဖွံ့ဖြိုးရေးလမ်းကြောင်းလျှောက်လှမ်းခြင်း၊ မြန်မာနိုင်ငံ၏ အချုပ်အခြာအာဏာနှင့် နယ်မြေတည်တံ့ခိုင်မြဲရေး၊ နိုင်ငံတည်ငြိမ်အေးချမ်းရေးနှင့် တည်ငြိမ်သင့်လျော်စွာဖြင့် ပြည်တွင်းနိုင်ငံရေးလုပ်ငန်းစဥ်များကို အကောင်ထည်ဖော်လုပ်ဆောင်ခြင်းကို ထောက်ခံအားပေးကြောင်း သမ္မတရှီက ပြောကြားခဲ့သည်။
Public Service Announcement
ထို့အပြင် တရုတ်-မြန်မာနှစ်နိုင်ငံသည် မဟာဗျူဟာမြောက် ပူးပေါင်းဆောင်ရွက်မှုများကို နက်ရှိုင်းစွာ ဆောင်ရွက်၍ တရုတ်-မြန်မာ စီးပွားရေးစင်္ကြံ၏ အရေးကြီးသောစီမံကိန်းများတည်ဆောက်မှုကို အဆက်မပြတ် တွန်းအားပေးလုပ်ဆောင်ရမည်ဖြစ်ကြောင်းနှင့် မြန်မာနိုင်ငံအနေဖြင့် မြန်မာနိုင်ငံရှိ တရုတ်ဝန်ထမ်း၊ အဖွဲ့အစည်း၊စီမံကိန်းများ၏ ဘေးကင်းလုံခြုံမှုကို သေချာအာမခံပေးရန်လည်း သမ္မတရှီက တောင်းဆိုခဲ့သည်။
သို့ရာတွင် အထက်ပါတွေ့ဆုံမှုနှင့်ပတ်သက်၍ စစ်ကောင်စီဝါဒဖြန့်သတင်းစာများက ဖော်ပြရာတွင် ယခုနှစ်ကုန်ပိုင်းတွင် ရွေးကောက်ပွဲကျင်းပမည့်အကြောင်းနှင့် အဆိုပါရွေးကောက်ပွဲကို အားပေးထောက်ခံနေသည်ဟု သမ္မတရှီကျင့်ဖျင်က ပြောဆိုကြောင်း ထည့်သွင်းဖော်ပြသည်။
တရုတ်အစိုးရအာဘော် ဆင်ဟွာသတင်းဌာနနှင့် မြန်မာနိုင်ငံဆိုင်ရာ တရုတ်သံရုံးထုတ်ပြန်ချက်၌မူ စစ်ကောင်စီကျင်းပမည်ဆိုသော ရွေးကောက်ပွဲနှင့်ပတ်သက်၍ တလုံးတပါဒမှ မပါရှိပေ။
တရုတ်သမ္မတက စစ်ခေါင်းဆောင်နှင့် တွေ့ဆုံသည့်သတင်းကို တရုတ်နိုင်ငံခြားရေးဝန်ကြီးဌာနက ယနေ့ နေ့ခင်းပိုင်းအထိ ထုတ်ပြန်ဖော်ပြခြင်း မရှိပေ။ တရုတ်နိုင်ငံခြားရေးဝန်ကြီးဌာနသည် သမ္မတရှီကျင့်ဖျင်နှင့် ရုရှားသမ္မတတို့ တွေ့ဆုံမှု၊ သမ္မတရှီကျင့်ဖျင်နှင့် ဆားဘီးယားသမ္မတို့နှင့် တွေ့ဆုံမှု သတင်းများကို ဖော်ပြထားသည်။
ထို့အပြင် တရုတ်သမ္မတက ဒေသတွင်းနှင့် နိုင်ငံတကာမျက်နှာစာတွင် မြန်မာနိုင်ငံဘက်မှ ရပ်တည်ပေးလျက်ရှိသည်ဟု စစ်ကောင်စီဝါဒဖြန့်သတင်းစာများက ဖော်ပြသည်။ ယင်းအချက်သည်လည်း တရုတ်၏ တရားဝင်သတင်းထုတ်ပြန်ချက်များ၌ မတွေ့ရှိရပေ။
စစ်ကောင်စီကျင်းပမည်ဆိုသော ရွေးကောက်ပွဲကို အမျိုးသားညီညွတ်ရေးအစိုးရ NUG အပါအဝင် တော်လှန်ရေးအင်အားစုများက အတုအယောင် တရားမဝင်ရွေးကောက်ပွဲအဖြစ် သတ်မှတ်ထားပြီး ယင်းရွေးကောက်ပွဲမှာ နိုင်ငံအား ပိုမိုဆိုးရွားစေမည့်အခြေအနေကို တွန်းပို့မည်ဟု သတိပေးထုတ်ပြန်ထားသည်။
၂၀၁၅ အထွေထွေရွေးကောက်ပွဲနှင့် ၂၀၂၀ အထွေထွေရွေးကောက်ပွဲများတွင် သောင်ပြိုကမ်းပြိုအနိုင်ရခဲ့သော အမျိုးသားဒီမိုကရေစီအဖွဲ့ချုပ်(NLD)ပါတီကလည်း အာဏာလုစစ်ကောင်စီက ကျင်းပရန် ကြံစည်နေသော အတုအယောင်ရွေးကောက်ပွဲသည် မြန်မာနိုင်ငံတွင် ပဋိပက္ခများကိုသာ တိုးပွားလာစေမည့်အပြင် ဒေသတွင်း မတည်ငြိမ်မှုများပိုမိုပေါ်ပေါက်လာစေမည်ဖြစ်သောကြောင့် မည်သည့်နည်းနှင့်မျှ အသိအမှတ်မပြု၊ ပူးပေါင်းဆောင်ရွက်ခြင်းမည်မဟုတ်ကြောင်း ဆုံးဖြတ်ထားသည်။
(ဓာတ်ပုံ – Xinhua News)
