မေ – ၂၉ ၊၂၀၂၅ ၊ နိုင်ပကောင်း/People’s Spring
ထိုင်းနယ်စပ်အနီး ကရင်ပြည်နယ် ၊ မြဝတီခရိုင်၊ မြဝတီ – ဝေါ်လေ ကားလမ်းပေါ်က ရွှေအေးမြိုင်တပ်စခန်း (ဝါးမီထ ) ကို KNU နဲ့ ပူးပေါင်းတပ်က ဒီနေ့ (မေလ ၂၉ ) မနက်ပိုင်းမှာ သိမ်းယူလိုက်တယ်လို့ ကရင်စစ်ရေးသတင်းရင်းမြစ်ထံကသိရပါတယ်။
အဲဒီတပ်စခန်းဟာ မြဝတီ – ဝေါ်လေ ကားလမ်းပေါ် ဆုံဆည်းမြိုင်နဲ့ ဥကရစ်ထရွာကြားမှာ တည်ရှိပြီး ဥကရစ်ထ စခန်း ရဲ့ ကာကင်းစခန်းတစ်ခုဖြစ်တယ်လို့ သတင်းရင်းမြစ်ကပြောပါတယ်။
ဝေါ်လေ ဒေသတွင်းမှာ စစ်ဗျုဟာအရ အရေးပါတဲ့ ဥကရစ်ထ စခန်းကို KNU ဦးစီးတဲ့ ပူးပေါင်းတပ်က ၂၀၂၂ ခုနှစ်အတွင်းမှာ အပြင်းအထန် တိုက်ခိုက်ခဲ့ပေမယ် စခန်းမသိမ်းနိုင်ခဲ့ပါဘူး။
Public Service Announcement
ဥကရစ်ထ စခန်း တိုက်ပွဲနဲ့ပတ်သက်ပြီး စစ်ကောင်စီ က ဝါဒဖြန့် ရုပ်ရှင်ရိုက်ကူးထုတ်လွှင့်ခဲ့ဖူးပါတယ်။
ဒီမနက်မှာတော့ ဥကရစ်ထ စခန်း ရဲ့ ကာကင်းကို KNU က သိမ်းလိုက်ပြီး စခန်းသိမ်းတိုက်ပွဲအတွင်း စစ်ကောင်စီတပ်ဖွဲ့ဝင်တွေ ထွက်ပြေးသွားကြတယ်လို့ ကရင်စစ်ရေးသတင်းရင်းမြစ်က ဆိုပါတယ်။
မြဝတီမြို့တောင်ဘက် ၊ ဒေါနတောင်တန်းအရှေခြမ်း ဝေါ်လေ ဒေသ က နယ်စပ်မျဉ်းတလျောက်မှာ တပ်စွဲထားတဲ့ ဝေါ်လေ ၊ ကနဲလေး၊ ဘလက်ဒို ၊မော်ခီး နဲ့ သေဘောဘိုး တပ်စခန်းတွေ ကို သိမ်းယူဖို့ KNU က မေလ တတိယပတ်ကစတင်ပြီးတိုက်ခိုက်နေတာဖြစ်ပြီး ဘလက်ဒို ၊ ကနဲလေး နဲ့ ဝါးမီထ တို့ကို ရရှိသွားပြီဖြစ်ပါတယ်။
ဒါပေမယ့် KNU တပ်မဟာ (၆) စစ်ရေးလှုပ်ရှားရာနယ်မြေ မြဝတီမြို့ တောင်ဘက်ခြမ်း ၊ဝေါ်လေဒေသမှာ စစ်ကောင်စီတပ်ရဲ့ အရေးပါတဲ့ တပ်စခန်းတွေအနေနဲ့ ဝေါ်လေဗျုဟာ ၊သေဘောဘိုး ၊ ဥကရစ်ထ၊ မော်ခီး တပ်စခန်းတွေ ကျန်ရှိနေပါတယ်။
လက်ရှိတိုက်ပွဲတွေဖြစ်နေတဲ့ ဝေါ်လေမြို့ဟာ စုကလိ ၊ ဝေါ်လေ ၊ မြဝတီ သုံးမြို့ပေါင်းပြီး ဖွဲ့စည်းထားတဲ့ မြဝတီခရိုင်ထဲမှာပါရှိပါတယ်။
စုကလိမြို့အခြေစိုက် စုကလိ စစ်ဆင်ရေးခြေကုတ်စခန်းကိုတော့ ပြီးခဲ့တဲ့ ၂၀၂၄ ခုနှစ် ဇွန်လအတွင်း KNU နဲ့ ပူးပေါင်းတပ်က သိမ်းယူထားပြီးဖြစ်ပါတယ်။
KNU ရဲ့ အုပ်ချုပ်ရေးနဲ့ စစ်ရေးနယ်မြေသတ်မှတ်ပုံအရ ဝေါ်လေမြို့ ၊ စုကလိမြို့နဲ့ မြဝတီမြို့တို့ဟာ ဒူးပလာယာခရိုင် ကော့ကရိတ်မြို့နယ်ထဲမှာပါပြီး တပ်မဟာ (၆) စစ်ရေးလှုပ်ရှားရာဂွင်ဖြစ်ပါတယ်။
KNU ဟာ ထိုင်း – မြန်မာ နယ်စပ်တလျှာက်မှာရှိတဲ့ တပ်မဟာ (၇) စစ်ရေးလှုပ်ရှားရာ နယ်မြေထဲက စစ်ကောင်စီတပ်စခန်းအားလုံးနီးပါးကိုတိုက် ခိုက် သိမ်းယူပြီးနောက် တပ်မဟာ ( ၆) ဘက်က နယ်စပ်စခန်းတွေကို ဆက်လက်တိုက်ခိုက်လာတာတွေ့ရပါတယ်။
စစ်ကောင်စီတပ်ဘက်ကတော့ ထိုင်းနယ်စပ်တလျှောက်မှာ တပ်စွဲထားတဲ့ တပ်စခန်းတွေ တိုက်ခိုက်ခံရတာနဲ့ပတ်သက်ပြီး သတင်းထုတ်ပြန်တာမရှိပါဘူး။
မြန်မာဘက်က တိုက်ပွဲတွေကြောင့် ထိုင်းစစ်တပ်ကလည်းနယ်စပ်တလျောက် တပ်ဖြန့်ထားပြီး အခြေအနေကို အနီးကပ်စောင့်ကြည့်နေရတယ်လို့ ထိုင်းမီဒီယာတွေက ဖော်ပြထားကြပါတယ်။
