ပျူ​ခေါင်း​ဆောင်အပါအဝင် လူ ၉ ဦး​​သေဆုံးခဲ့တဲ့ ပုဂံပစ်ခတ်မှု ထ​နောင်း​မြေစစ်​ကြောင်း နဲ့ စစ်​ကောင်စီ ​ပြောကြားချက်​တွေကွဲလွဲ​နေ

ပျူခေါင်းဆောင်အပါအဝင် ၉ ဦးသေဆုံးပြီး လက်နက်ခဲယမ်းတွေပါ သိမ်းဆည်းရရှိတယ်လို့ထ​နောင်း​မြေစစ်​ကြောင်းထုတ်ပြန်

တိမ်းရှောင်နေတဲ့ ဂန့်ဂါရပ်ကွက်​ဒေသခံတွေ သုံးရက် အတွင်းပြန်မလာရင်မီးရှို့မယ်လို့ စစ်တပ်က ခြိမ်းခြောက်

ဇွန် ၄၊ ၂၀၂၅။ဇေအောင်/People’s Spring

မန္တလေးတိုင်း၊ ညောင်ဦးမြို့နယ်၊ပုဂံမြို့သစ်၊ဂန့်ဂါရပ်ကွက်မှာ စစ်ကောင်စီလက်အောက်ခံ ပျူ​စောထီးခေါင်းဆောင် အပါအဝင် လူ ၉ ဦး​သေဆုံးခဲ့တဲ့ ပစ်​ခေတ်မှုနဲ့ ပတ်သက်ပြီး ပစ်ခတ်ခဲ့တဲ့ထနောင်းမြေစစ်ကြောင်း နဲ့ စစ်​​ကောင်စီဘက်က​ပြောဆိုမှု​တွေ နှစ်ဘက်ကွဲလွဲ​နေပါတယ်။

Public Service Announcement

ဇွန်လ (၁)ရက်နေ့က ညောင်ဦးမြို့နယ်၊ ပုဂံမြို့သစ်၊ ဂန့်ဂါရွာက စစ်ကောင်စီလက်အောက်ခံ စစ်မှုထမ်းဟောင်း ပျူစောထီးခေါင်းဆောင် ဇော်ဇော် နဲ့ သူ့နောက်လိုက် ၈ ဦးတို့ကရက်ကွက်ထိပ် ဇရပ်မှာ ဆက်ကြေးကောက်နေတုန်းထနောင်းမြေစစ်ကြောင်းလာပစ်သွားတာလို့ ထ​နောင်း​မြေစစ်​ကြောင်းကထုတ်ပြန်ပါတယ် ။

ပစ်ခတ်မှုကြောင့် ပျူခေါင်းဆောင် ဇော်ဇော်အပါအဝင် သူ့ရဲ့​နောက်လိုက် ၈ ဦး သေဆုံးပြီး တစ်ဦး ဒဏ်ရာရရှိခဲ့တယ်လို့ ထနောင်းမြေစစ်ကြောင်းက IO ကိုမူတူးက ပြောပါတယ်။

“ကျနော်တို့က အဓိကထားတာက သူ့ကို( ပျူ​ခေါင်း​ဆောင် ဇော်​ဇော် )ပဲပစ်တာ။ သူတို့ကိုပစ်ပြီးတဲ့အချိန်မှာ တန်းကွေ့တယ်။ အဲဒီမှာ ပေါက်ကွဲသံကြားရတယ်။ ကွေ့ပြီးပြန်ကြည့်တော့ အကုန်လုံး မှောက်နေပြီ။ တယောက်ပဲ ဒဏ်ရာရတယ်။ သူ့မှာ ဘာမှမပါလို့ဘာမှမလုပ်ခဲ့ဘူး။သူက(ပျူခေါင်းဆောင်က) တိုင်ထောင့်မှာဆိုတော့ သူ့ကိုပဲ အဓိကထားပြီးပစ်လိုက်တာ။ ပစ်ပြီးတဲ့အချိန်မှာ တန်းကွဲတာ။ လက်ပစ်ဗုံးက သူတို့လက်ပစ်ဗုံးပါ။ ကျနော်တို့မှာ လက်ပစ်ဗုံးမပါဘူး။”လို့ ကိုမူတူးက ဆိုပါတယ်။

ပျူ​ခေါင်း​ဆောင်ကိုပစ်ခတ်စ​ဥ် ၎င်းလက်ထဲမှဗုံးပါ​ပေါက်ကွဲ၍ ၎င်းနှင့်အတူရှိသူ ၈ ဦးပါ​သေဆုံးခဲ့​တယ်လို့ ကိုမူတူးက​ပြောပါတယ်။

ဒါ့အပြင် ပျူ​ခေါင်း​ဆောင်နဲ့ အဖွဲ့ဆီကနေ ပွိုင့်22 လက်လုပ်သေနတ် ၁ လက်၊ ကာဘိုင်လက်လုပ်သေနတ် ၁ လက်၊ လက်ပစ်ဗုံး ၁ လုံး၊ ကာဘိုင်ကျည် ၁၀ တောင့်၊ ပ္ပိုင့်22ကျည် ၆ တောင့်၊ ဆိုင်ကယ် ၂ စီးနဲ့ ပျူစောထီး သက်သေခံ အထောက်အထားတွေ သိမ်းဆည်းရမိခဲ့တယ်လို့ ထနောင်းမြေစစ်ကြောင်းက ထုတ်ပြန်ပါတယ်။

ထုတ်ပြန်ချက်မှာ ပျူ​ခေါင်း​ဆောင်ဟာ စစ်မှုထမ်း​ဟောင်းဖြစ်တယ်ဆိုတဲ့ ကတ်ကိုပါ​တွေ့ရပါတယ် ။

စစ်ကောင်စီကတော့ ဂန့်ဂါရပ်ကွက်မှာပဌာန်းပွဲလုပ်ဖို့ အတွက် ဓမ္မာရုံမှာ ရပ်မိ၊ရပ်ဖ ၁၅ဦးက အစည်းအဝေးလုပ် အလှူငွေကောက်ခံနေစဉ်မှာNUG လက်​အောက်ခံ PDF တွေကထော်လာဂျီနဲ့လာရောက် ပစ်ခတ်ခဲ့တာလို့ ဝါဒဖြန့်နေပါတယ် ။ပစ်ခတ်မှုကြောင့် ကျေးရွာအုပ်ချုပ်ရေးမှူး ဦးဇော်ဇော်အပါအဝင် ရပ်မိ၊ရပ်ဖဖြစ်တဲ့ သက်ကြီးရွယ်အိုတွေ အမျိုးသား ၉ဦးသေဆုံးပြီး အမျိုးသမီးတစ်ဦးအပါ အဝင် ခြောက်ဦး ဒဏ်ရာရရှိခဲ့တယ်လို့စစ်​ကောင်စီကထုတ်ပြန်ကာတယ် ။

ဒါ​ပေမယ့်ထ​နောင်း​မြေစစ်​ကြောင်းဟာ အမျိုးသားညီညွတ်​ရေးအစိုးရ (NUG) လက်​အောက်ခံလက်နက်ကိုင်အဖွဲ့မဟုတ်ဘူးလို့ သိရပါတယ် ။

ဒါအပြင် PDF​တွေက ပဌာန်းပွဲအတွက် ကောက်ခံထားတဲ့ အလှူငွေတွေလည်း ယူသွားတယ်လို့ စစ်တပ်ဝါဒဖြန့် တယ်လီဂရန်ချန်နယ်​တွေကဖြန့်ချီထားပါတယ် ။ ဒါ​ပေမယ့် ရပ်ကွက် အုပ်ချုပ်​ရေးမှူး ​ဇော်​ဇော်ဟာ ပြည်သူ့စစ်မှုထမ်းဖြစ်တယ် ၊ပျူ​စောထီးဖြစ်တယ်ဆိုတာကို​တော့ ထုတ်ပြန်ချက်မှာ​ဖော်ပြမထားပါဘူး ။ဒါအပြင်စစ်​ကောင်စီကထုတ်ပြန်တာမှာ ပျူ​ခေါင်းဆာင် ​ဇော်​ဇော်​သေဆုံးတာကိုမပြဘဲ တခြားသူ​တွေ ​သေဆုံးတာကိုပဲ ဓါတ်ပုံ​တွေထုတ်ပြန်ထားတာကို​တွေ့ရပါတယ် ။

ဒါ​ပေမယ့် ထနောင်းမြေစစ်ကြောင်းရဲ့ IO ကိုမူတူးက​တော့သေဆုံးသူတွေထဲ ပြည်သူမပါဝင်ဘဲ ပျူခေါင်းဆောင်နောက်လိုက်တွေသာ ဖြစ်တယ်လို့ဆိုပါတယ် ။ဒါအပြင် ပဌာန်းပွဲအတွက်အစည်းအ​ဝေးလုပ်တာမဟုတ်ပဲ ရပ်ကွက်ထိပ်ဇရပ်မှာ ဆက်​ကြေး​ကောက်​နေကြတာလို့ သူကဆက်​ပြောပါတယ်။

ပျူခေါင်းဆောင်ကို ဦးတည်သွားပစ်တာဖြစ်ပြီး ပျူ​တွေရဲ့ လက်ပစ်ဗုံးကို ကျည်ထိရာကနေ ဗုံးပေါက်ကွဲ ၈ ဦးအထိ သေဆုံးခဲ့ခြင်းဖြစ်တယ်လို့ထနောင်းမြေစစ်ကြောင်းက IO ကိုမူတူးက ပြောပါတယ်။

အဲဒီတိုက်ခိုက်မှုကို ထနောင်းမြေစစ်‌ကြောင်းနဲ့အတူ BAGAN&NYAUNG -U Special Task Forceတို့က ပူးပေါင်း တိုက်ခိုက်ခဲ့တယ်လို့ သိရပါတယ်။

ဒီပစ်ခတ်မှုမှာ ပျူ​ခေါင်း​ဆောင်​ဇော်​ဇော်မှအပ ကျန်​သေဆုံးခဲ့သူ​တွေဟာ ပြည်သူ​တွေလား ၊ပျူ​စောထီးနဲ့ပျူ​နောက်လိုက်​တွေလားဆိုတာကို​တော့ People’s Spring ကသီးခြားအတည်မပြုနိုင်ပါဘူး။

အဲဒီပစ်ခတ်မှုဖြစ်ပြီးနောက် ဂန့်ဂါရွာဒေသခံတွေအပါအဝင် အနီးအနားကျေးရွာတွေက ဒေသခံအချို့ဟာ မနေရဲတော့ဘဲ တခြားနေရာတွေဆီ ဘေးလွတ်ရာတိမ်းရှောင်နေကြပါတယ်။

ပစ်ခတ်မှုဖြစ်ပွားပြီးနောက် ကြောက်လန့်ပြီး ဘေးလွတ်ရာတိမ်းရှောင်နေကြတဲ့ ဂန့်ဂါရွာခံတွေသုံးရက်အတွင်းပြန်လည်နေထိုင်ကြဖို့ စစ်တပ်က ဖိအားပေးနေတယ်လို့ ပုဂံမြို့ခံတချို့က ပြောပါတယ်။

“အားလုံးပြေးကုန်ကြပြီ ကြောက်နေကြတယ်။ အခုစစ်တပ်ကဝင်ပြီး ပြန်နေကြဖို့ ပြောနေတယ်။ သုံးရက်အချိန်ပေးတယ်ပေါ့။ ပြန်မလာရင် မီးရှို့မယ်လို့ပြောတယ်”လို့ သူကဆက်ပြောပါတယ်။