ဇွန်-၂၀၊၂၀၂၅။တေဇ/People’s Spring
ဒေါ်အောင်ဆန်းစုကြည်၏မွေးနေ့ဆုတောင်း ဗီဒီယိုပေါင်း၁၁၀,၁၀၀ရရှိခဲ့ကြောင်းSuu 80 Birthday Campaign ကထုတ်ပြန်သည်။
“SUU 80 Birthday Campaign အောင်မြင်စွာပိတ်သိမ်းကြောင်းကြေညာအပ်ပါသည်” ဟု မွေးနေ့ဆုတောင်းဗီဒီယို အရေအတွက်နှင့်အတူ ဖော်ပြထားသည်။
ဇွန် ၁၉ ရက်တွင်ကျရောက်သည့်ဒေါ်အောင်ဆန်းစုကြည်၏ အသက် ၈၀ နှစ်ပြည့်မွေးနေ့ အထိမ်းအမှတ်အနေဖြင့် ဂင်းနစ်မှတ်တမ်းတင်နိုင်ရန် ရည်ရွယ်၍ မွေးနေ့ဆုတောင်း ဗီဒီယိုများစုဆောင်းခဲ့ခြင်းဖြစ်သည်။
Public Service Announcement
အသက် ၈၀ ပြည့် မွေးနေ့ဖြစ်သောကြောင့် မွေးနေ့ဆုတောင်းဗီဒီယို ရှစ်သောင်း ရရှိရန် ရည်ရွယ်ခဲ့သော်လည်းအဆိုပါအရေအတွက်သည် မွေးနေ့မတိုင်မီ ဇွန် ၁၈ ရက်ကတည်းက ပြည့်မြောက်ခဲ့ခြင်းဖြစ်သည်။
ယခင်က မွေးနေ့ဆုတောင်း ဗီဒီယို သုံးသောင်းကျော်ဖြင့် အိန္ဒိယနိုင်ငံမှ ဘာသာရေးခေါင်းဆောင်ကဂင်းနစ်မှတ်တမ်းတင်ထားခဲ့ခြင်းဖြစ်ပြီး လက်ရှိရရှိသည့် ဗီဒီယို အရေအတွက်သည် ယခင်စံချိန်ထက် သုံးဆကျော် များပြားသောကြောင့် ဂင်းနစ်မှတ်တမ်းဝင်ရန် သေချာနေပြီဟုစီစဥ်နေသူများကပြောသည်။
လက်ရှိဂင်းနစ်မှတ်တမ်းတွင် မွေးနေ့ဆုတောင်းဗီဒီယိုဖိုင် အများဆုံးသူမှာ အိန္ဒိယနိုင်ငံမှ Saint Gurmeet Ram Rahim Singh Ji Insan ဖြစ်ပြီး၂၀၁၆ သြဂုတ် ၁၄ ရက်မှ နိုဝင်ဘာ ၁၄ ရက်အထိ့မွေးနေ့ဗီဒီယိုဖိုင်များကို စုစည်းလက်ခံပြီး ဗီဒီယိုပေါင်း ၃၂,၂၀၇ ဖြင့် ၂၀၁၇ ခုနှစ်ဖေဖော်ဝါရီ ၁၅ ရက်တွင် အသိအမှတ်ပြုခံရခြင်းဖြစ်သည်။
“ဒါတွေကို ဂင်းနစ်စ် တာဝန်ရှိသူတွေက စီစစ်တဲ့ ကာလ ရှိပါမယ်။ အချိန်ကာလ ရက်အနည်းငယ် ကြာနိုင်ပါတယ်။ အဲဒီလို အပြီးသတ် စိစစ်ပြီးခဲ့ရင်တော့သူတို့လက်ခံအတည်ပြုတဲ့ဗွီဒီယိုစုစုပေါင်းအရေအတွက် ရလဒ် ပြန်ထွက်လာမှာပါ။”ဟု ယင်းအစီအစဉ်ကို ကူညီပေးခဲ့သည့် ကလိုစေးထူးကအသိပေးထားသည်။
ဗီဒီယိုဖိုင်ပေးပို့သူများသည် ပို့ရမည့် လင့်ခ်၌ တင်သလို ဗီဒီယိုဖိုင်မရောက်မည်ကို စိုးရိမ်သောကြောင့်ထပ်မံပေးပို့မှုရှိနိုင်ပြီး အချို့ ဗီဒီယိုများသည် အကျုံးမဝင်မှုများလည်းရှိနိုင်သောကြောင့် ပယ်ချခံနိုင်သည်ဟု ၎င်းကရှင်းပြသည်။
“ဘယ်လိုပဲဖြစ်ဖြစ်ပါ။ ပြည်သူတွေတာဝန်အရမ်းကို ကျေခဲ့ကြပါတယ်။ ဂင်းနစ်စံချိန်သစ် နေရာမှာ အမေစုရဲ့ နာမည်ကို ကျွန်တော်တို့ တရားဝင် မြင်ရပါတော့မှာကတော့အသေအချာဆိုတာယုံကြည်ထားပါတယ်။ “ဟုကလိုစေးထူးကရေးသားထားသည်။
