အီကွေဒေါ နိုင်ငံက အကျဉ်းထောင် တစ်ခုမှာ ပြိုင်ဘက် ဒုစရိုက် ဂိုဏ်းသားတွေ အပြန်အလှန် သတ်ဖြတ်မှုကြောင့် လူ ၇၀ ဝန်းကျင်လောက် သေဆုံးသွားကြောင်း သိရပါတယ်။
ဂိုင်ယာကွေးလ်မြို့က လစ်တိုရယ်လ် အကျဉ်းထောင်မှာ နိုဝင်ဘာ ၁၂ ရက် ညပိုင်းက ဆူပူမှုတွေ စတင်လာခဲ့ပါတယ်။ ဒီပြဿနာကို နာရီပေါင်း အတော်ကြာတဲ့ထိ မထိန်းချုပ်နိုင်ခဲ့ဘဲ နိုဝင်ဘာ ၁၃ ရက်ကျမှ ရဲတပ်ဖွဲ့ရဲ့ အထူး တိုက်ခိုက်ရေး ယူနစ်တွေက ဝင်ရောက် စီးနင်းခဲ့ရတာပါ။
အခြေအနေတွေကို ထိန်းသိမ်းလိုက်ပြီးတဲ့ အခါမှာတော့ ထောင်ထဲမှာ သေနတ်တွေ၊ ဖောက်ခွဲရေး ပစ္စည်းတွေ၊ သားလှီးဓားတွေကို ရဲတပ်ဖွဲ့က ရှာတွေ့ခဲ့ပါတယ်။ ရဲတွေက အခုထောင်ဆူမှုဟာ ပြိုင်ဘက် ဒုစရိုက်ဂိုဏ်း နှစ်ခုက အကျဉ်းသားတွေရဲ့ ရန်ပွဲက အစပြုခဲ့တာလို့ အတည်ပြုခဲ့ပါတယ်။
ဂိုဏ်းတစ်ခုက အကျဉ်းသားတွေဟာ သူတို့ကို ချုပ်နှောင်ထားတဲ့ အဆောင်ကနေ အပေါက်ဖောက်ပြီး တခြား ပြိုင်ဘက်ဂိုဏ်းသားတွေ အထိန်းသိမ်း ခံထားရတဲ့ အဆောင်ကို တွားသွားခဲ့ကြပါတယ်။ အဲဒီနောက်တော့ ရန်သူတွေကို အလစ်အငိုက် တိုက်ခိုက်ခဲ့ကြတာ ဖြစ်ပါတယ်။
Public Service Announcement
အကျဉ်းထောင် ငြိမ်ဝပ်ပိပြားရေး ပြန်လည် ရရှိဖို့အတွက် ရဲတွေအပြင် စစ်သည် ရာဂဏန်းလောက်ကို အသုံးပြုခဲ့ရပါတယ်။ အခုသတင်းကို ကြားသိပြီးတဲ့နောက် ထောင်သားတွေရဲ့ ဆွေမျိုးသားချင်းတွေက စိုးရိမ်တကြီးနဲ့ အကျဉ်းထောင်ရှေ့မှာ လာရောက် စုရုံးနေကြတာကိုလည်း တွေ့ရပါတယ်။
ဂိုဏ်းတစ်ဂိုဏ်းရဲ့ ခေါင်းဆောင်က လျှော့ရက်ရလို့ လွတ်သွားပြီး သိပ်မကြာခင် အခုပြဿနာ တက်ခဲ့တာလို့ အာဏာပိုင်တွေက ပြောပါတယ်။ ဒါပေမဲ့ အသေးစိတ် အချက်အလက်တွေကိုတော့ ဆက်ပြီး စုံစမ်းနေဆဲပါ။
အီကွေဒေါမှာတော့ လူအသေအပျောက်များတဲ့ ထောင်ဆူမှု သတင်းတွေဆိုတာ သိပ်တောင် မဆန်းတော့ဘူးလို့ ပြောနိုင်ပါတယ်။ အခုနှစ်ထဲမှာတင် အီကွေဒေါက ထောင်ဆူမှုတွေကြောင့် အကျဉ်းသား ၃၀၀ ကျော်လောက် သေကြေခဲ့ပြီးပါပြီ။ စက်တင်ဘာလတုန်းကဆိုရင် နိုင်ငံသမိုင်းတလျှောက် အသေအပျောက် အများဆုံး ထောင်တွင်း အုံကြွမှုတွေပါ ကြုံခဲ့ကြောင်း သိရပါတယ်။
