သူသေဆုံးသွားပြီဖြစ်ကြောင်း သတင်းမှားတွေကို ထိုင်းစစ်နယ်မြေမှူး ငြင်းဆို

သူသေဆုံးသွားပြီဆိုတဲ့ သတင်းတွေကို ကမ္ဘောဒီးယားနဲ့ နယ်စပ်တလျှောက် စစ်ဆင်ရေး ကဏ္ဍတွေမှာ အဓိက ကြီးမှူး တာဝန်ယူနေသူ ထိုင်းစစ်နယ်မြေမှူးက ငြင်းဆိုခဲ့ပါတယ်။

လူမှုကွန်ရက်တွေပေါ်မှာတော့ ထိုင်းစစ်သားတွေက အမှတ် ၂ စစ်နယ်မြေ စစ်ဦးစီး အရာရှိ ဒုတိယ ဗိုလ်ချုပ်ကြီး ဘွန်ဆင် ပက်ကလန်ရဲ့ ဓာတ်ပုံကို ကိုင်ဆောင်ထားပြီး ငြိမ်းချမ်းစွာ အနားယူနိုင်ပါစေ ဆိုတာမျိုး ဆုတောင်းပေးထားတဲ့ ပို့စ်တွေ ပျံ့နှံ့လာခဲ့ပါတယ်။ ဇူလိုင် ၂၈ ရက်နေ့မှာတော့ ဘွန်ဆင်က သူဟာ ရှေ့တန်း စစ်မြေပြင်မှာ ဆက်လက် ကွပ်ကဲနေပြီး ကျန်းကျန်းမာမာ ရှိနေဆဲလို့ ထုတ်ပြန်ခဲ့ပါတယ်။

ဘွန်ဆင် တာဝန်ယူထားတဲ့ အမှတ် ၂ စစ်နယ်မြေထဲမှာတော့ ကမ္ဘောဒီးယားနဲ့ နယ်စပ်ထိစပ်နေရာ အစိတ်အပိုင်း အများစု အကျုံးဝင်နေပါတယ်။ လက်ရှိ နှစ်နိုင်ငံ စစ်ရေး ပဋိပက္ခမှာလည်း ဘွန်ဆင်ရဲ့ လက်အောက်ခံ တပ်တွေက အဓိက တိုက်ပွဲဝင်နေတာ ဖြစ်ပါတယ်။

သူသေဆုံးသွားသလိုမျိုး လုပ်ကြံ ကောလာဟလတွေ ဖြန့်နေတာဟာ ထိုင်းစစ်သားတွေကို စိတ်ဓာတ်ရေးရာ ထိခိုက်စေဖို့ ကမ္ဘောဒီးယားဖက်က မဟုတ်မမှန် ဝါဒဖြန့်တာ သက်သက်သာ ဖြစ်တယ်လို့ ဘွန်ဆင်က စွပ်စွဲခဲ့ပါတယ်။ သတင်းတုတွေကို မယုံကြဖို့ ဘွန်ဆင်က ထိုင်းစစ်သားတွေကို တိုက်တွန်းခဲ့ပြီး သူဟာ ငယ်သားတွေနဲ့အတူ ရင်ဘောင်တန်း တိုက်ခိုက်ရင်း ထိုင်းပြည်သူတွေရဲ့ လုံခြုံရေးကို ကာကွယ် စောင့်ရှောက်နေဦးမှာ ဖြစ်တယ်လို့လည်း ပြောကြားခဲ့ပါတယ်။

Public Service Announcement

ကမ္ဘောဒီးယားဖက်က လုပ်ကြံဝါဒဖြန့်မှုတွေက လူမှုကွန်ရက်ပေါ်မှာ ထူထူထပ်ထပ် ဖြစ်ပေါ်နေတာကြောင့် ယုံကြည် စိတ်ချရတဲ့ သတင်းအရင်းအမြစ်တွေဆီက ကြေညာချက်တွေကိုသာ နားထောင်ဖို့လည်း ဘွန်ဆင်က လူထုကို အကြံပြုထားပါတယ်။

ဇူလိုင် ၂၄ ရက်နေ့မှာ စတင်လာတဲ့ ထိုင်း-ကမ္ဘောဒီးယား နယ်စပ် စစ်ရေး ပဋိပက္ခတွေအတွင်း နှစ်ဖက်စလုံးက လူမှုကွန်ရက် သုံးစွဲသူတွေကြားမှာ သတင်းတု ဖြန့်ဝေတာတွေ၊ ဉာဏ်ရည်တု (AI) နည်းပညာ အသုံးပြု ဖန်တီးထားတဲ့ ဓာတ်ပုံအတုတွေ မျှဝေတာတွေ အများအပြား ရှိခဲ့ကြပါတယ်။

ကိုးကား: Khaosod