ကမ္ဘောဒီးယားနဲ့ စစ်တိုက်နေတာကို ရပ်တန့်လိုက်မှာ မဟုတ်ကြောင်း ထိုင်းဝန်ကြီးချုပ် အနုတင် ချန်ဗီရာကူလ်က ပြောကြားခဲ့ပါတယ်။
အမေရိကန် သမ္မတ ဒေါ်နယ်လ်ထရမ့်က သူဟာ ထိုင်းနဲ့ ကမ္ဘောဒီးယား နှစ်နိုင်ငံစလုံးရဲ့ဝန်ကြီးချုပ်တွေနဲ့ ဖုန်းပြောခဲ့ကြောင်း၊ ဒီဇင်ဘာ ၁၃ ရက် ညနေပိုင်းကစလို့ အရှေ့တောင်အာရှ အိမ်နီးချင်း နှစ်နိုင်ငံကြား စတင် အပစ်အခတ် ရပ်စဲကြမှာဖြစ်ကြောင်း လူမှုကွန်ရက်ပေါ် ကြေညာထားပါတယ်။
ဒါပေမဲ့ ဒီဇင်ဘာ ၁၃ ရက် နေ့လယ်မှာတော့ အနူတင်က တိုက်ခိုက်မှုတွေ ရပ်နားမယ်ဆိုတဲ့ ကိစ္စကို ပယ်ချသွားခဲ့ပါတယ်။
Public Service Announcement
ထိုင်းပြည်သူတွေနဲ့ ထိုင်းပိုင်နက်ကို နောက်ထပ် ထိပါးခြိမ်းခြောက် မခံရတော့တာ သေချာမယ့် အချိန်အထိ စစ်ဆင်ရေးတွေ ဆက်ပြီး လုပ်သွားမယ်လို့ အနူတင်က Facebookပေါ်မှာ ရေးသားထားခဲ့ပါတယ်။
ကမ္ဘောဒီးယား ဝန်ကြီးချုပ် ဟွန်မာနတ်က တိုက်ခိုက်မှုအားလုံး ရပ်နားဖို့ သဘောတူကြောင်း ဒီဇင်ဘာ ၁၂ ရက်နေ့မှာ ပြောခဲ့ပေမယ့် အနူတင်ကတော့ စစ်ဆင်ရေးတွေ ဆက်လုပ်မယ့် ဆုံးဖြတ်ချက်ကို ကြေညာခဲ့တာပါ။
စစ်ပွဲရပ်နားလိမ့်မယ်လို့ ထရမ့်ဆီက မှတ်ချက်ထွက်ပေါ်လာ အပြီးမှာ ထိုင်းက ဆက်ပြီး တိုက်ခိုက်နေတယ်လို့ ကမ္ဘောဒီးယားကလည်း အတည်ပြုခဲ့ပါတယ်။
အနူတင်က ထရမ့်ရဲ့ ကြေညာချက်နဲ့ ပတ်သက်လို့ အတိအကျ ရည်ညွှန်းတာမျိုး မရှိပေမယ့် လက်ရှိမှာတော့ ဘယ်လို အပစ်ရပ် သဘောတူညီမှုမှ ရမထားသေးဘူးလို့ ဆိုပါတယ်။
ကိစ္စတွေကိုရှင်းအောင် ပြောချင်ကြောင်း၊မနက်ပိုင်းတုန်းက လုပ်ဆောင် ချက်တွေဟာ ထိုင်းရဲ့ ရပ်တည်မှု ဘာလဲဆိုတာကို ပြခဲ့ပြီးဖြစ်ကြောင်း အနူတင်က ပြောပါတယ်။ ထိုင်းဟာ ဒီဇင်ဘာ ၁၃ ရက် မနက်ပိုင်းကလည်း ကမ္ဘောဒီးယား စစ်ရေးပစ်မှတ်တွေကို တိုက်လေယာဉ်တွေနဲ့ ဗုံးကြဲနေခဲ့ပါတယ်။
ကမ္ဘောဒီးယား ဝန်ကြီးချုပ် ဟွန်မာနတ်ကတော့ အောက်တိုဘာလမှာ ရရှိခဲ့တဲ့ နှစ်ဖက် နယ်စပ်ဆိုင်ရာ သဘောတူညီမှုတွေနဲ့အညီ အခြေအနေတွေကို ပြန်လည် ငြိမ်းချမ်းအောင် ညှိနှိုင်းဖို့ လိုလားကြောင်း ဒီဇင်ဘာ ၁၃ ရက်နေ့က Facebookမှာ ရေးသားထားခဲ့ပါတယ်။
ကိုးကား – CNA
