ဝမ်းတွင်းမှာ ဆန်စက်က အလုပ်သမားတွေကို စစ်မှုထမ်းဖို့ စစ်တပ်ကဝင်ဖမ်းရာ ၄ ဦးပါသွား

စက်တင်ဘာ-၃၊၂၀၂၅။ဇေအောင်/People’s Spring

မန္တလေးတိုင်း၊ ဝမ်းတွင်းမြို့နယ်မှာစစ်ကောင်စီတပ်က ဆန်စက်က အလုပ်သမားတွေကို စစ်မှုထမ်းဖို့ ဝင်ဖမ်းရာ စက်ဆန်ပိုင်ရှင်နဲ့ အလုပ်သမားတွေအပါအဝင် လေးဦး ဖမ်းဆီးခံလိုက်ရကြောင်း သတင်းရရှိပါတယ်။

စက်တင်ဘာ ၂ ရက် ညနေပိုင်းကရန်ကုန်-မန္တလေး အမြန်လမ်းဘေးရှိ အင်းကုန်းကျေးရွာမှ ဆန်စက်အတွင်းသို့ စစ်ကောင်စီတပ်ရောက်လာပြီး စစ်မှုထမ်းဖို့ ဝင်ဖမ်းရာ ဆန်စက်ပိုင်ရှင်ရဲ့သားတစ်ဦး၊ ကုက္ကိုခါးလှရွာနဲ့ ကန်ပတ်လည်ရွာတို့မှ အလုပ်လာလုပ်တဲ့ လူငယ်အလုပ်သမား ၃ ဦး စုစုပေါင်း ၄ ဦး ဖမ်းဆီးခံလိုက်ရကြောင်း Voice of Wundwin အဖွဲ့က ပြောပါတယ်။

အလားတူ စက်တင်ဘာ ၂ ရက်ညကနေကပဲ ပင်းတလဲ-မိတ္ထီလာလမ်းဘေးရှိတောင်ဆည်ရွာမှ နွားကျောင်းသား နှစ်ဦး ဖမ်းဆီးခံရကြောင်း၊ ဒါ့အပြင် ခံဘဲ့ဆေးရုံက မီးဖွားလူနာစောင့်အမျိုးသား တစ်ဦးလည်း အပြင်ဆေးထွက်ဝယ်ချိန် ဖမ်းဆီးခံလိုက်ရကြောင်း ၎င်းအဖွဲ့က ပြောပါတယ်။

Public Service Announcement

“ဝမ်းတွင်းကတော်တော်ဆိုးနေတယ်။ ယောကျာ်းသားတွေမှန်သမျှအပြင်မထွက်ရဲတော့ဘူး။”လို့ ဝမ်းတွင်းဒေသခံ အမျိုးသမီးတဦးက ပြောပါတယ်။

စက်တင်ဘာ ၃ ရက် မနက်ပိုင်းမှာလည်း ပင်းတလဲစခန်းမှ ရဲနဲ့စစ်သားတွေဟာ လိုက်ထရက်ကားနဲ့ ထွက်သွားလို့ ပြည်သူတွေသတိပြုနေထိုင်ကြဖို့ Voice Of Wundwin အဖွဲ့က သတိပေးထားပါတယ်။

ဝမ်းတွင်းမြို့နယ်ဟာ မန္တလေးတိုင်းအတွင်းမှာ စစ်မှုထမ်းဖို့ လူငယ်တွေ အများဆုံးဖမ်းဆီးခံရတဲ့ မြို့နယ်တွေထဲ ပါဝင်နေပါတယ်။ စစ်ကောင်စီဟာ လူငယ်တွေကို အဓမ္မဖမ်းဆီးပြီး စစ်မှုထမ်းစေခဲ့ရာမှာ အခုအခါ အပတ်စဥ် ၁၇ ကို စတင်ဖို့ ကြိုးစားနေပါတယ်။