စက်တင်ဘာ−၁၈၊ ၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU) မြိတ်-ထားဝယ်ခရိုင်၊ တနင်္သာရီမြို့နယ် သိန်ခွန်းရွာအနီးတွင် စစ်ကောင်စီတပ်နှင့် တော်လှန်ရေးပူးပေါင်းတပ်များအကြား ယနေ့ စက်တင်ဘာ ၁၈ရက်တွင် တိုက်ပွဲဆက်လက်ဖြစ်ပွားခဲ့ပြီး လက်နက်ခဲယမ်းအချို့ သိမ်းရဟု KNU မြိတ်-ထားဝယ်ခရိုင်က သတင်းထုတ်ပြန်သည်။
တိုက်ပွဲများဆက်တိုက်ဖြစ်နေသည့် ထိုင်း-မြန်မာနယ်စပ် မောတောင်နယ်စပ်ကုန်သွယ်ရေးလမ်းရှိ သိန်ခွန်းရွာအနီးတွင် စစ်ကောင်စီတပ်က ထိုးစစ်ဆက်လက်ပြုလုပ်လာ၍ ယနေ့ စက်တင်ဘာ ၁၈ရက် မနက်က တိုက်ပွဲဖြစ်ခဲ့ဟု ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၄) သတင်းရင်းမြစ်က ပြောသည်။
” နေ့တိုင်း တိုက်ပွဲက ရှိတယ် သိန်ခွန်းဘက်မှာ။ ပြီးခဲ့တဲ့ သုံးလေးရက်မှာလည်းဖြစ်တယ်။ ဒီနေ့မှာလည်းထပ်ဖြစ်တယ်”ဟု KNLA သတင်းရင်းမြစ်က ပြောသည်။
Public Service Announcement
ယနေ့တိုက်ပွဲတွင် စစ်ကောင်စီတပ်က ၂ဦးသေဆုံးကာ ၂ဦး ဒဏ်ရာရခဲ့ကြောင်း KNU မြိတ်-ထားဝယ်ခရိုင်က သတင်းထုတ်ပြန်ခဲ့ပြီး စစ်ကောင်စီတပ်ထံမှ MA1-(၁)လက်၊ MA3-(၁)လက်၊ လက်ပစ်ဗုံး(၁)လုံးနှင့် ကျည်များ သိမ်းရဟု အသိပေးသည်။
စစ်ကောင်စီတပ်သည် မောတောင်နယ်စပ်လမ်းကို ပြန်လည်ထိန်းချုပ်နိုင်ရေး ၂၀၂၄ ဒီဇင်ဘာကတည်းက ထိုးစစ်ဆင်နေခြင်းဖြစ်ပြီး သိန်ခွန်းရွာအနီး တိုက်ပွဲ ဆက်တိုက်ဖြစ်ပွားလျက်ရှိကာ ရှေ့ဆက်မတိုးနိုင်ဖြစ်နေသည်။
အဆိုပါ စစ်ကောင်စီတပ်ကို KNLA တပ်မဟာ(၄) လက်အောက်ခံ၊ တပ်ရင်း(၁၁) နှင့် တော်လှန်ရေးပူးပေါင်းတပ်ဖွဲများက တိုက်ခိုက်နေခြင်းဖြစ်သည်။
