'/%3E%3C/svg%3E){kind=small}
နိုဝင်ဘာ-၆၊ ၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU) ကျုံဒိုးမြို့နယ်က ဒေသန္တရစည်းမျဉ်းစည်းကမ်း အရေးပေါ်ကြေငြာချက်တရပ် ဒီကနေ့ နိုဝင်ဘာ ၆ရက်မှာ ထုတ်ပြန်ခဲ့ရာ ကျုံဒိုးမြို့နယ်အတွင်းရှိ လမ်းကြောင်းတွေကို အသုံးပြုပြီး အွန်လိုင်းငွေလိမ်(ကျားဖြန့်) လုပ်ငန်းတွေက စွန့်ခွာလာတဲ့ နိုင်ငံခြားသားဝန်ထမ်းတွေကို ရွှေ့ပြောင်းတာ၊ လက်ခံခေါ်ယူထားတာ မပြုလုပ်ဖို့ တားမြစ်ခဲ့ပါတယ်။
အာဏာသိမ်းစစ်တပ်က ကိုယ်တိုင်ပါဝင်လုပ်ဆောင်လျက်ရှိတဲ့ နယ်စပ်ဒေသရှိ အွန်လိုင်းငွေလိမ်လုပ်ငန်းတွေနဲ့ လောင်းကစားလုပ်ငန်းတွေကို ဟန်ပြ နှိမ်နှင်းရေး လုပ်ငန်းလုပ်ဆောင်နေတာရှိသလို အဲဒီလုပ်ငန်းတွေက စွန့်ခွာလာတဲ့ နိုင်ငံခြားသားဝန်ထမ်းတွေကို ပုံစံအမျိုးမျိုး နေရာရွေ့ပြောင်းပေးနေမှုတွေ ရှိနေတယ်လို့ ကြေညာချက်မှာ ဖော်ပြထားပါတယ်။
အဲဒါကြောင့် KNU – ကျုံဒိုးမြို့နယ်က အခုလို ဒေသန္တရစည်းမျည်းစည်းကမ်းတွေကို ထုတ်ပြန်လိုက်တာဖြစ်ပြီး မြို့နယ်အတွင်းက ပြည်သူတွေအနေနဲ့ ညဘက် (ည ၈နာရီကနေ နံနက် ၆ နာရီအတွင်း ခရီးသွားလာတာ မလုပ်ဖို့ကိုလည်း တားမြစ်ခဲ့ပါတယ်။
Public Service Announcement
KNU – ကျုံဒိုးမြို့နယ်အတွင်း လက်ရှိဖြစ်ပေါ်နေသော နိုင်ငံရေးအကျပ်အတည်းနဲ့ နယ်မြေ မတည်ငြိမ်မှု အခြေအနေတွေကို အခွင့်ကောင်းယူပြီး ဘယ်လောင်းကစားလုပ်ငန်းမဆို ဖွင့်လှစ်ခြင်း မပြုဖို့လည်း KNUက တားမြစ်ခဲ့ပါတယ်။
ဒါ့အပြင် စစ်ကောင်စီရဲ့ ထိုးစစ်တွေနဲ့ အမျိုးမျိုးသော လူ့အခွင့်အရေးချိုးဖောက်မှုတွေကို ပြည်သူ လူထုတွေ သတိဝီရိယနဲ့ ကာကွယ်နိုင်ရေး နေထိုင်ရာ အိမ်မှာ ဘေးကင်းလုံခြုံရေးကိုရည်ရွယ်ပြီး ဗုံးခိုကျင်းများ မဖြစ်မနေ ထားရှိဖို့ ကြေညာပါတယ်။
ဒေသန္တရ စည်းမျဉ်းစည်းကမ်းတွေကို လိုက်နာမှုမရှိရင် KNU ဥပဒေ၊ လုပ်ထုံးလုပ်နည်းတွေအရ အရေးယူခြင်းခံရမယ်လို့လည်းသတိပေးထားပါတယ်။
လက်ရှိကာလဟာ စစ်ရေးတင်းမာမှုများပြင်းထန်စွာဖြစ်ပွားနေပြီး စစ်ကောင်စီတပ်ဖွဲ့ဝင်တွေဟာ လူ့အခွင့်အရေးချိုးဖောက်မှု အမျိုးမျိုးကို ကျူးလွန်လျှက်ရှိနေတဲ့အတွက် KNU – ကျုံဒိုးမြို့နယ်ဟာ ရှုပ်ထွေးတဲ့ စိန်ခေါ်မှုမျိုးစုံကို ကိုင်တွယ်ဖြေရှင်းနေကြရဟု အသိပေးကာ ပြည်သူလူထုတွေကို ကာကွယ်စောင့်ရှောက်ရေးအတွက် ကြိုးစားနေကြောင်း ထုတ်ပြန်ပါတယ်။
