ဖေဖော်ဝါရီ – ၄ ၊၂၀၂၆ ၊ ဆိုင်းမင်း/People’s Spring
ရန်ကုန်တိုင်းအတွင်းရှိ စက်မှုဇုန်တွေကို သဘာဝဓာတ်ငွေ့ရည် (LNG) စွမ်းအင်သုံးလျှပ်စစ်စီမံကိန်းစက်ရုံတွေကရလာတဲ့ ဓာတ်အားကို ဖြန့်ဝေရာမှာ ၂၄ နာရီလျှပ်စစ်မီးပေးပြီးတစ်ယူနစ်ကို ၉၀၀ ကျပ်နူန်းနဲ့ ကောက်ခံသွားမယ်ဆိုတာကို စစ်ကောင်စီဘက်က လုပ်ငန်းရှင်တွေ ဆီ အသိပေးလာတယ်လို့သိရပါတယ်။
စစ်ကောင်စီရဲ့ လျှပ်စစ်ဝန်ကြီးဌာနကစက်မှုလုပ်ငန်းသုံးမီတာခတွေကို လက်ရှိမှာ တစ်ယူနစ်ကနေ ယူနစ် ၅,၀၀၀ အထိကို ၂၅၀ ကျပ်နှုန်း၊ ယူနစ် ၅,၀၀၀ ကနေ ယူနစ် ၂၀,၀၀၀ အထိကို ၄၀၀ ကျပ်နှုန်းနဲ့ ယူနစ် ၂၀,၀၀၀ အထက်ကိုတော့ ၅၀၀ ကျပ်နှုန်း ကောက်ခံနေတာပါ။
ဒါပေမယ့်LNG သုံးပြီးစက်မှုဇုန်တွေကို၂၄ နာရီမီးပေးမယ်ဆိုရင်တစ်ယူ နစ်ကို ၉၀၀ ကျပ်နှုန်းနဲ့ကောက်ခံမယ်ဆိုတာကိုစစ်ကောင်စီကလုပ်ငန်းရှင်တွေဆီအသိပေးလာတာပါ။
Public Service Announcement
မီတာခ တိုးကောက်ရင် လုပ်ငန်းရှင်တွေက ထုတ်ကုန်ပစ္စည်းတွေအပေါ် စျေးတက်မှာဖြစ်တာကြောင့် ကုန်စျေးနှုန်းကြီးလာလိမ့်မယ်လို့ အမည်မဖော်လိုတဲ့ စက်မှုလုပ်ငန်းရှင်တစ်ဦးက မှတ်ချက်ပေးပါတယ်။
အရင်ကလည်း စက်မှုဇုန်တွေကို တစ်ရက် ၈ နာရီ မီးပေးတာကြောင့် ကျန်တဲ့အချိန်တွေကိုတော့ မီးစက်အသုံးပြုပြီး လုပ်ငန်းလည်ပတ်နေကြတာပါ။
စက်မှုလုပ်ငန်းတွေအတွက် မီတာခတွေ တိုးမြင့်ကောက်ခံပေမယ့် အိမ်သုံး မီတာခတွေကိုတော့ အရင်အတိုင်း တစ်ယူနစ်ကနေ ၅၀ ယူနစ်အထိကို ၅၀ ကျပ်၊ ၅၁ ယူနစ်ကနေ ယူနစ်၁၀၀ ကို ၁၀၀ ကျပ်၊ ၁၀၁ ယူနစ်ကနေ ၂၀၀ ယူနစ်အထိ ကို ၁၅၀ ကျပ်နဲ့ ၂၀၁ ယူနစ်နဲ့ အထက်ကိုတော့ ၃၀၀ ကျပ်နှုန်းအတိုင်း ပုံမှန်ကောက်ခံသွားမယ်လို့ သိရပါတယ်။
မီးပေးချိန်ကိုလည်း ရန်ကုန်မြို့က မြို့နယ်တွေမှာ ဖေဖော်ဝါရီ ၂ ရက်ကပြီး တစ်ရက်ကို မနက် ၉ နာရီကနေ နေ့ခင်း ၁ နာရီအထိ တစ်ကြိမ်၊ နေ့ခင်း ၁ နာရီကနေ ညနေ ၅ နာရီထိ တစ်ကြိမ် အုပ်စု ၂ ခုခွဲပြီး ၄ နာရီကြာ အလှည့်ကျ ဓာတ်အား ပြတ်တောက်မှာ ဖြစ်တယ်လို့ ရန်ကုန်လျှပ်စစ်ကော်ပိုရေးရှင်း (YESC) က အသိပေး ကြေညာထားပါတယ်။
