မတ်-၄၊၂၀၂၆၊ရှိန်း/ People’s Spring
မန္တလေးတိုင်း၊ သပိတ်ကျင်းမြို့နယ်က တကောင်းမြို့အနီးကို စစ်တပ်က လေကြောင်းတိုက်ခိုက်ခဲ့ရာမှာ တော်လှန်ရေးရဲဘော်တွေကျဆုံးမှုရှိခဲ့တယ်လို့ တော်လှန်ရေးတပ်ဖွဲ့ဝင်တွေက ပြောပါတယ်။
တကောင်းမြို့ကိုထိန်းချုပ်နိုင်ဖို့ တပ်မတော်တန်းမြှင့် လေ့ကျင့်ရေးသင်တန်းကျောင်း(တတက-၁၃)က နေ စစ်တပ်စစ်ကြောင်းတွေ ထိုးနေတာ တစ်လနီးပါးကြာမြင့်နေပြီလို့ သိရပါတယ်။
မတ်လ ၂ ရက်က တကောင်းမြို့ပတ်ဝန်းကျင်ကို စစ်တပ်က နေ့ရော၊ညပါ လေကြောင်းတိုက်ခိုက်မှုပြုလုပ်ခဲ့တယ်လို့ တော်လှန်ရေး တပ်ဖွဲ့ဝင်တဦးက ပြောပါတယ်။
Public Service Announcement
“အစမှန်ပြီး ကျတဲ့ရဲဘော် တွေရှိတယ်။ဥသျှစ်ကုန်းဘက်ကိုလည်းလာကြဲတယ်။အဲဒီနေရာဆို တိုက်ပွဲဖြစ် နေတဲ့နေရာနဲ့ ဘာမှမဆိုင်တဲ့ နေရာတွေအထိ လာကြဲတာ”လို့ တော်လှန်ရေးတပ်ဖွဲ့ဝင်တစ်ဦးက ပြောပါတယ်။
လေကြောင်းတိုက်ခိုက်မှုကြောင့် ကျောက်ဆည်ခရိုင်တပ်ရင်း(၂)က ရဲဘော် ၃ဦးကျဆုံးကြောင်းလည်း သက်ဆိုင်ရာ တပ်ရင်းက ထုတ်ပြန်ထားပါတယ်။
မတ်လ၂ရက်မှာ စစ်ကောင်စီတပ်က သပိတ်ကျင်းမြို့နဲ့ တကောင်းမြို့ကြားက မင်းကုန်းကျေးရွာကို ထိန်းချုပ်ပြီးနောက် တကောင်းမြို့နဲ့ (၁၁)မိုင်အကွာကနေ ဆက်ပြီးထိုးစစ်ဆင်နေတာလို့ သိရပါတယ်။
တကောင်းမြို့ကို ထိုးစစ်ဆင်နေတဲ့ စစ်ကြောင်းဟာ တပ်မ(၅၅)လက်အောက်ခံတပ်တွေနဲ့ ပြည်သူ့စစ်မှုထမ်းတွေ၊ပျူစောထီးတွေလို့သိရပါတယ်။
တကောင်းမြို့မဆုံးရှုံးရရေး အမျိုးသားညီညွတ်ရေးအစိုးရNUG၊ကာကွယ်ရေးဝန်ကြီးဌာန (MOD)ရဲ့ ကွပ်ကဲမှုနဲ့ မန္တလေးတိုင်းကွပ်ကဲ ရေးဌာနကကွပ်ကဲပြီး မန္တလေးခရိုင်တပ်ရင်း တွေနဲ့ ပကဖ တွေပူးပေါင်း တိုက်ခိုက် နေတာလို့ သိရပါတယ်။
