ဒိုက်ဦး​မြို့မဈေးကို စစ်​ကောင်စီကငါးရက်ပိတ်ခိုင်း​

ပဲခူးတိုင်း၊ ဒိုက်ဦးမြို့နယ်တွင် ယမန်နေ့က စျေးဆိုင်များပိတ်ပြီး အသံတိတ်သပိတ်ပြုလုပ်ခဲ့ပြီးနောက် ဒိုက်ဦးမြို့မစျေးအားယ​​နေ့( ဒီဇင်ဘာ ၁၁ရက်)မှစ၍ ငါးရက်တာပိတ်သိမ်းထားရန် အကြမ်းဖက်စစ်ကောင်စီလက်အောက်ခံ မြို့နယ်စည်ပင်က ညွှန်ကြားခဲ့သည်။

ဒီဇင်ဘာလ ၁၀ ရက်နေ့က နိုင်ငံတစ်ဝန်း တိတ်ဆိတ်ခြင်းသပိတ် ပြုလုပ်ခဲ့ရာ ဒိုက်ဦးမြို့နယ်သည်လည်းတစ်ခုအပါအဝင်ဖြစ်ပြီး ​ဒိုက်ဦးမြို့မစျေးကြီးအပါအဝင် ပျံကျစျေးများ၊ စတိုးဆိုင်၊ စားသောက်ဆိုင်များ အားလုံးနီးပါး ပိတ်သိမ်းကာ အသံတိတ်သပိတ်ဆင်နွှဲခဲ့ကြသည်။

ညနေပိုင်းတွင်မူ အကြမ်းဖက်စစ်ကောင်စီလက်အောက်ခံ မြို့နယ်စီမံအုပ်ချုပ်ရေးအဖွဲ့မှ ဥက္ကဌ ဝင်းမြင့်ဆိုသူကကိုဗစ် နိုင်တီးရောဂါနှင့် မျိုးကွဲအသစ် Omicron ရောဂါကိုအကြောင်းပြကာ ဒိုက်ဦးမြို့မစျေးအား ဒီဇင်ဘာလ ၁၁ ရက်နေ့မှ ၁၅ ရက်နေ့အထိ ငါးရက်ပိတ်သိမ်းထားရန် ညွှန်ကြားခဲ့ခြင်းဖြစ်သည်။

“COVID 19 ​ရောဂါမျိုးကွဲသစ် Omicron ​ရောဂါသည်လျှင်မြန်စွာကူးစက်ပြန့်နှံ့ကူးစက်မှုအား ပြည်သူများသတိ့ထားဂရုပြုနိုင်​စေရန် ဒိုက်ဦးမြို့မ​ဈေးအား ၁၁.၁၂. .၂၁ ရက်​နေ့မှ ၁၅.၁၂.၂၁ ရက်​နေ့အထိ့ ၅ ရက် ယာယီပိတ်သိမ်း​ဆောင်ရွက်သွားရန် အ​ကြောင်းကြားပါသည်” ဟုဆိုကာ ဥက္ကဌ ဝင်းမြင့်ဆိုသူက လက်မှတ်​ရေးထိုးပိတ်ခိုင်းထား​ကြောင်းစာတွင်ပါရှိသည်။

Public Service Announcement

အသံတိတ်သပိတ်ပြုလုပ်ခဲ့၍ အညှိုးထားကာ ပိတ်သိမ်းခိုင်းခြင်းဖြစ်ကြောင်း ဒိုက်ဦးမြို့ခံများက မှတ်ချက်ပြုသည်။ “ရုတ်တရက်ကြီး ထထုတ်တော့ အဆင်မပြေဘူး။ ကုန်တွေက ရေရှည်မခံလို့ ရတဲ့စျေးနဲ့ပြန်ထုတ်ရောင်းလိုက်ရတယ်။”ဟု စျေးရောင်းချသူတစ်ဦးက ပြောသည်။

အကြမ်းဖက် စစ်ကောင်စီသည် အသံတိတ်သပိတ် ပြုလုပ်ခဲ့သည့်ဆိုင်များအား ခြိမ်းခြောက်ခြင်း၊ စာကပ်ခြင်း၊ ဆိုင်မှပစ္စည်းသိမ်းယူခြင်းများလည်း ပြုလုပ်နေသည်။