အာဏာရှင်စနစ် ပြုတ်ကျရေးတော်လှန်ရေးခရီးတွင် ရက္ခိုင့်အမျိုးသားအဖွဲ့ချုပ်(ULA/AA)နှင့် အတူလက်တွဲ ကြိုးပမ်းဆောင်ရွက်သွားလိုကြောင်း အမျိုးသားညီညွတ်ရေးအစိုးရ NUG ယာယီသမ္မတ ဒူဝါလရှီးလက ကတိပြုပြောကြားသည်။
ရက္ခိုင့်အမျိုးသားအဖွဲ့ချုပ် (ULA/AA) ဗဟိုကော်မတီသည် NUG ယာယီသမ္မတ ဒူဝါလရှီးလနှင့် ယာယီသမ္မတကတော် လထော်နန်တောင်တို့၏ အိမ်ထောင် သက်နှစ် (၄၀) ပြည့်မြောက်သည့် ပတ္တမြားရတုမင်္ဂလာအထိမ်းအမှတ်နေ့ မင်္ဂလာဆုမွန်သဝဏ်လွှာပေးပို့ခဲ့ပြီး အဆိုပါပေးပို့မှုအပေါ် ကျေးဇူးတင်သဝဏ်လွှာပြန်လည်ပေးပို့ရာ၌ ကတိပြုခဲ့ခြင်းဖြစ်သည်။
ယာယီသမ္မတသည် အမျိုးသားညီညွတ်ရေးအစိုးရ၊ တိုင်းရင်းသားမဟာမိတ် မိတ်ဖက်အဖွဲ့အစည်းများနှင့်အတူ လက်တွဲ၍ သက်ရှည်ကျန်းမာစွာဖြင့် ဆက်လက်တာဝန်ထမ်းဆောင်သွားမည်ဟု ဆိုသည်။
ရက္ခိုင့်အမျိုးသားအဖွဲ့ချုပ် (ULA/AA) ဗဟိုကော်မတီ ၏ မင်္ဂလာဆုမွန်သဝဏ်လွှာတွင် ယာယီသမ္မတနှင့် ယာယီသမ္မတကတော်တို့၏ နှစ်(၄၀)ပြည့် မင်္ဂလာသက်တမ်းမှသည် နောင်နှစ်ပေါင်းများစွာအထိ မိသားစုအားလုံးနှင့်အတူ အသက်ရှည်၊ အနာကင်း၊ ကျန်းမာပြီး အမျိုးသားလွတ် မြောက်ရေးအောင်ပွဲကို ရယူနိုင်ပါစေကြောင်း ဆုမွန်ကောင်းတောင်းပေးထားသည်။
Public Service Announcement
