ဖက်ဒရယ်ဦးဆောင်ကောင်စီရဲ့ ပထမဆုံးအစည်းအဝေး ရှေ့လုပ်ငန်းစဉ်တွေ ဆွေးနွေး

ဧပြီ-၁၁၊၂၀၂၆။ထားမြတ်/People’s Spring

ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ(SCEF) အစည်းအဝေးကို ဧပြီ ၁၀ရက် ညနေပိုင်းမှာ ကျင်းပခဲ့ပြီး ရှေ့လုပ်ငန်းစဉ်တွေအတွက်သဘောတူညီမှုတွေချမှတ်နိုင်ခဲ့​ကြောင်း ကောင်စီဝင် အဖွဲ့အစည်းတွေက သတင်းထုတ်ပြန်ပါတယ်။

မတ်လ ၃၀ရက်မှာ ကောင်စီဖွဲ့စည်းကြောင်း ကြေညာပြီးနောက် ပထမဆုံးအကြိမ်ကျင်းပတဲ့ ကောင်စီရဲ့ ၁/၂၀၂၆ အစည်းအဝေးသို့ မဟာဗျူဟာနဲ့ မူဝါဒ ရေးရာ ဦးဆောင်အဖွဲ့ ခေါင်းဆောင်တွေ၊ အတွင်းရေးမှူး အဖွဲ့ဝင်တွေ၊ ဖက်ဒရယ်ဒီမိုကရေစီပြည်ထောင်စု ပေါ်ထွန်းရေးကောင်စီဝင်တွေ စုံညီစွာ တက်ရောက်ခဲ့ကြတယ်လို့ အသိပေးပါတယ်။

ကရင်နီအမျိုးသားတိုးတက်ရေးပါတီ(KNPP) နဲ့ ကရင်နီပြည်ကြားကာလအုပ်ချုပ်ရေးကောင်စီ(IEC)ရဲ့ ဥက္ကဋ္ဌ ခူဦးရယ်က အစည်းအဝေး သဘာပတိအဖြစ်တာဝန်ယူခဲ့ပြီး ကချင်လွတ်လပ်ရေးအဖွဲ့ (KIO)၊ကရင်အမျိုးသားအစည်းအရုံး (KNU)၊ ကရင်နီအမျိုးသားတိုးတက်ရေးပါတီ(KNPP)၊ ချင်းအမျိုးသားတပ်ဦး (CNF)၊ ပြည်ထောင်စုလွှတ်တော်ကိုယ်စားပြုကော်မတီ(CRPH) နဲ့ အမျိုးသားညီညွတ်ရေးအစိုးရ(NUG) မှ ခေါင်းဆောင်များကကြိုဆိုနှုတ်ခွန်းဆက်စကားများ ပြောကြားခဲ့တယ်လို့ ထုတ်ပြန်ပါတယ်။

Public Service Announcement

အစည်းအဝေးမှာဦးဆောင်ကောင်စီအတွင်းရေးမှူးအဖွဲရဲ့ ဆောင်ရွက်ထားရှိမှုများကို ရှင်းလင်းတင်ပြတာ၊ ဒီကနေ့ ညနေပိုင်းမှာ ကျင်းပမယ့် သတင်းစာရှင်းလင်းပွဲ နဲ့ ပတ်သက်ပြီး ဆွေးနွေးတာ၊ ရှေ့လုပ်ငန်းစဉ်တွေကို ညှိနှိုင်းတာ တွေလုပ်ဆောင်ခဲ့ကြောင်း ဖော်ပြထားပါတယ်။

ဆွေးနွေးညှိနှိုင်းတဲ့ အကြောင်းအရာ အသေးစိတ်ကို ဖော်ပြမထားပေမယ့် အတည်ပြုခြင်း (၅) ရပ်၊ မှတ်တမ်းတင်ခြင်း (၄) ရပ် နဲ့ ရှေ့လုပ်ငန်းစဥ် (၃) ရပ် တို့ကို သဘောတူချမှတ်နိုင်ခဲ့ကြောင်းလည်း ထုတ်ပြန်ပါတယ်။

အခမ်းအနား မှတ်တမ်းဓာတ်ပုံတွေအရ အစည်းအဝေးကို အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလနဲ့ အစိုးရအဖွဲ့ဝင်များ၊ CRPH ဥက္ကဋ္ဌ ဦးအောင်ကြည်ညွန့်နဲ့ တာဝန်ရှိသူများ၊ ဖက်ဒရယ်ဦးဆောင်ကောင်စီမှာ ပါဝင်တဲ့ တိုင်းရင်းသားတော်လှန်ရေးတပ်ဖွဲ့ ခေါင်းဆောင်များ တက်ရောက်ခဲ့တာ တွေ့ရပါတယ်။

ဖက်ဒရယ်ပြည်ထောင်စုပေါ်ထွန်းရေး ဦးဆောင်ကောင်စီ” မှာ၊ တိုင်းရင်းသားလက်နက်ကိုင်အဖွဲ့အစည်းအများအပြားနဲ့ ဒီမိုကရေစီအင်အားစုတွေ၊ လူထုကိုယ်စား လှယ်တွေ စုပေါင်းပြီး စုဖွဲ့ခဲ့တာဖြစ်ကြောင်းကောင်စီခေါင်းဆောင်တွေက ပြောထားပါတယ်။

ဖက်ဒရယ်ဦးဆောင်ကောင်စီ ဖွဲ့စည်းတာဟာ စစ်ရေးအရဦးဆောင်လှုပ်ရှားမှုတွေကို စုစည်းကွပ်ကဲနိုင်ဖို့ ရည်ရွယ်သလို၊ နိုင်ငံရေးအရ အမျိုးသားရေး ညီညွတ်မှုကို ကျစ်ကျစ်လစ်လစ် ဦးဆောင်စုစည်းပုံဖော်ဖို့ ရည်ရွယ်ကြောင်း NUG ယာယီသမ္မတ ဒူဝါလရှီးလက ပြောကြားထားပါတယ်။