မေ – ၁၃၊ ၂၀၂၆ ၊ ဆိုင်းမင်း/People’s Spring
အာဆီယံသည်ပြည်တွင်းရေးကိုဝင်ရောက်စွတ်ဖက်နေပြီးမြန်မာနိုင်ငံ အပေါ်ခွဲခြားဆက်ဆံနေတယ်လို့အာဏာသိမ်းခေါင်းဆောင်ရဲ့လက် အောက်ခံနိုင်ငံခြားရေးဝန်ကြီးဌာနကတုံ့ပြန်ပါတယ်။
ပြီးခဲ့တဲ့ရက်ပိုင်းကဖိလစ်ပိုင်နိုင်ငံမှာကျင်းပတဲ့အာဆီယံထိပ်သီးအစည်း အဝေးကိုအာဏာသိမ်းခေါင်းဆောင်ပိုင်းတက်ရောက်ခွင့်ထပ်မံမရရှိတဲ့နောက်အခုလိုတုံ့ပြန်ချက်ထွက်ပေါ်လာတာပါ။
အာဆီယံအဖွဲ့နိုင်ငံအချို့ဟာကန့်သတ်မှုတွေ၊ခွဲခြားဆက်ဆံမှုတွေ၊ချန်လှန်ထားတာတွေဆက်လက်ပြုလုပ်နေပြီးအာဆီယံအဖွဲ့ကြီးရဲ့အခြေခံမှုတွေကိုဖောက်ဖျက်ပြီးအဖွဲ့ဝင်တစ်နိုင်ငံရဲ့ပြည်တွင်းရေးကိုဝင်ရောက်စွတ်ဖက်တာ၊ဝေဖန်ပြောဆိုတာ၊ဖိအားပေးတာတွေလုပ်ဆောင်နေတယ်လို့အာဏာ သိမ်းခေါင်းဆောင်ရဲ့လက်အောက်ခံ နိုင်ငံခြားရေးဝန်ကြီးဌာနကဆိုပါတယ်။
Public Service Announcement
အာဆီယံဟာစစ်အာဏာသိမ်းမှုအောက်ကမြန်မာနိုင်ငံမှာကြုံတွေ့နေရတဲ့ နိုင်ငံရေးအရမကျေလည်မှုတွေ၊ပဋိပက္ခတွေကိုဖြေရှင်းရာမှာဘုံသဘော တူညီချက်ငါးချက်ကို ကိုင်စွဲထားဆဲလို့ဆိုထားပါတယ်။
ထိပ်သီးအစည်းအဝေးအပြီးအာဆီယံအလှည့်ကျဥက္ကဋ္ဌဖိလစ်ပိုင်သမ္မတ ပြုလုပ်တဲ့သတင်းစာရှင်းလင်းပွဲမှာမြန်မာအာဏာသိမ်းခေါင်းဆောင်ဟာ ဘုံသဘောတူညီချက်ငါးရပ်ကိုလက်ခံခဲ့ပေမယ့်လက်တွေ့အကောင် အထည်ဖော်တာမရှိဘူးလို့ အသိပေးပြောဆိုခဲ့ပါတယ်။
အာဏာသိမ်းမြန်မာစစ်အုပ်စုဘက်ကဘုံသဘောတူညီချက်ငါးရပ်ကိုကျင့်သုံးတယ်လို့ပြောနေပေမယ့် “လက်တွေ့ တိုးတက်လာတာမျိုးတွေကိုမမြင်ခဲ့ရပါဘူး” လို့ ဖိလစ်ပိုင်သမ္မတဖာဒီနန်မားကို့စ်က ဆိုပါတယ်။
ဒါအပြင်ဖမ်းဆီးအကျဉ်းချခံထားရတဲ့ဒေါ်အောင်ဆန်းစုကြည်နဲ့တွေ့ဆုံခွင့်ရဖို့အာဆီယံရဲ့တောင်းဆိုချက်ဟာလည်းတိုးတက်မှုမရှိဘူးလို့ မားကို့စ်က သတင်းစာရှင်းလင်းပွဲမှာ ပြောပါတယ်။
မြန်မာအာဏာသိမ်းစစ်အုပ်စုအပေါ် အာဆီယံအဖွဲ့ဝင်နိုင်ငံအချို့က “တော်တော်ကြီး စိတ်ပျက်ကြောင်း ပြနေပါတယ်”လို့ ဖိလစ်ပိုင်သမ္မတ က သတင်းစာရှင်းလင်းပွဲမှာသတင်းမီဒီယာတွေရဲ့မေးမြန်းမှုကိုဖြေကြားရာမှာထည့်သွင်းအသိပေးသွားပါတယ်။
ဒါပေမယ့်ဘယ်နိုင်ငံတွေလဲဆိုတာကိုတော့ထည့်သွင်းအသိမပေးသွားပါဘူး။
အာဏာသိမ်းပြီးလပိုင်းအကြာဧပြီလမှာအာဏာသိမ်းမြန်မာစစ်ခေါင်း ဆောင်ကိုအာဆီယံရုံးချုပ်အခြေစိုက်ရာအင်ဒိုနီးရှားနိုင်ငံ၊ဂျာကာတာမြို့ဆီအာဆီယံနိုင်ငံခေါင်းဆောင်တွေကခေါ်ယူတွေ့ဆုံကာမြန်မာနိုင်ငံရေးအကျပ်အတည်းကိုဖြေရှင်းဖို့အတွက်ဘုံသဘောတူညီချက်ငါးချက်ကို ချမှတ်ပါတယ်။
အဲဒီဘုံသဘောတူညီချက်ကိုအာဏာသိမ်းစစ်ခေါင်းဆောင်က အကောင် အထည်မဖော်ပေးတာကြောင့်အာဆီယံထိပ်သီးအစည်းအဝေးတွေမှာစစ်ကောင်စီခေါင်းဆောင်ပိုင်းတွေကိုအစည်းအဝေးတက်ရောက် ခွင့်ပိတ်ပင်ထားတာပါ။
ဘုံသဘောတူညီချက်ငါးချက်ထဲမှာ အကြမ်းဖက်မှုတွေချက်ချင်းရပ်တန့်ဖို့ ၊ သက်ဆိုင်သူတွေတွေ့ဆုံဆွေးနွေးအဖြေရှာဖို့ ၊ မြန်မာ့အရေးမှာ အာဆီယံ ကိုယ်စားလှယ်က ကြားဝင်ဖြေရှင်းပေးဖို့ ၊ အာဆီယံ ကိုယ်စားလှယ်ကိုသက်ဆိုင်သူတွေတွေ့ဆုံခွင့်ပေးဖို့ ၊အာဆီယံကမြန်မာနိုင်ငံကိုလူသားချင်းစာနာမှု အကူအညီတွေပေးဖို့အချက်တွေပဲဖြစ်ပါတယ်။
ဒီအချက်တွေကို အာဏာသိမ်းစစ်ခေါင်းဆောင်ကအကောင်အထည်မဖော်လို့အာဆီယံ ထိပ်သီးအစည်းတက်ခွင့်ပိတ်ခံရတာပါ။
