ဇွန်-၉၊၂၀၂၆။သတိုး/People’s Spring
လူထုခေါင်းဆောင် ဒေါ်အောင်ဆန်းစုကြည် အသက်ရှင်ကြောင်း သက်သေပြဖို့ တောင်းဆိုနေတဲ့ Proof Of Life ကမ်ပိန်း နာမည်ကို အသုံးပြုပြီး ပစ္စည်းရောင်းတာအလှူခံတာတွေ မလုပ်ဖို့ All in One Piece Movement က မေတ္တာရပ်ခံလိုက်ပါတယ်။
“Proof Of Life အသုံးအနှုန်းသည် အမေဒေါ်အောင်ဆန်းစုကြည် သက်ရှိထင်ရှားရှိနေဆဲဖြစ်ကြောင်း ခိုင်မာသော သက်သေအထောက်အထားရရှိနိုင်ရေးအတွက် တောင်းဆိုခြင်းဖြစ်ပါသည်။ ၎င်းသည် အမှတ်တံဆိပ်တစ်ခု မဟုတ်ပါ။ Proof Of Life နှင့်ပတ်သက်၍ မည်သည့်ပစ္စည်းမှ ရောင်းချခြင်း ၊ အလှူငွေရှာဖွေခြင်းတို့ကို လုပ်ဆောင်နေခြင်းမရှိပါ။ အမေ သက်ရှိထင်ရှားရှိနေကြောင်း သက်သေပြနိုင်ရေးအတွက် ဝိုင်းဝန်းတောင်းဆိုပေးခြင်းဖြင့် ကူညီစေလိုပါသည်” လို့ မေတ္တာရပ်ခံထားပါတယ်။
ဒါကြောင့် Proof Of Life အသုံးအနှုန်းကို မှန်မှန်ကန်ကန် အသုံးပြုကြဖို့နဲ့ ငွေကြေးတစ်စုံတစ်ရာ ပတ်သက်ခြင်းမရှိရင် အသုံးပြုနိုင်တယ်လို့ အသိပေးထားပါတယ်။
Public Service Announcement
စစ်တပ်ရဲ့ မတရားဖမ်းဆီးချုပ်နှောင် ခံထားရတဲ့ လူထုခေါင်းဆောင် ဒေါ်အောင်ဆန်းစုကြည် အသက်ရှင်နေကြောင်း သက်သေပြဖို့ အတွက် Proof Of Life ကမ်ပိန်းကို သားဖြစ်သူ ကင်မ်အဲရစ် (ခ) ကိုထိန်လင်း ဦးဆောင်ပြီး တောင်းဆိုနေကြတာပါ။
ဒီကမ်ပိန်းကို ဧပြီ တတိယပတ်မှာ စတင်ခဲ့တာဖြစ်ပြီး ပြည်သူတွေက Proof Of Life ကမ်ပိန်း အနေနဲ့ လှုပ်ရှားမှူတွေပြုလုပ်ကာ တောင်းဆိုနေကြတာဖြစ်ပါတယ်။
လက်ရှိအချိန်အထိတော့ စစ်တပ်ဘက်က ဒေါ်အောင်ဆန်းစုကြည်အသက်ရှင်ကြောင်း အတည်ပြုတဲ့ တုန့်ပြန်ချက်တစ်စုံတစ်ရာ မပြသသေးပါဘူး။
ဧပြီ ၃၀ ရက်က ဒေါ်အောင်ဆန်းစုကြည်ကို နေပြည်တော် အကျဉ်းထောင်ကနေ သတ်မှတ်ထားတဲ့နေအိမ်ကို ရွှေ့ပြောင်းကြောင်း ဓာတ်ပုံတစ်ပုံနဲ့ထုတ်ပြခဲ့ပေမယ့် ဒီဓာတ်ပုံက ဘယ်အချိန်က ရိုက်ကူးထားတယ်ဆိုတာ ဘယ်သူကမှ အတည်မပြုနိုင်ပါဘူး။
