ပါကစ္စတန်မှာ ကျူရှင် အဆောက်အအုံ ခေါင်မိုးပြိုကျမှုကြောင့် ကလေး ၁၄ ဦး သေဆုံး

ပါကစ္စတန်က အလွတ်စာသင်ကျောင်း (ကျူရှင်)တစ်ခုမှာ အမိုးပြိုကျမှု ဖြစ်ပွားပြီး ကလေး ၁၄ ဦး သေဆုံးခဲ့ပါတယ်။

ဇွန်လ ၃၀ ရက်နေ့က လာဟိုးမြို့ရဲ့ ခါနား ဆင်ခြေဖုံးရပ်ကွက်မှာရှိတဲ့ ပုဂ္ဂလိက ကျူရှင်တစ်ခုမှာ အဲဒီဖြစ်ရပ် ပေါ်ပေါက်ခဲ့တာပါ။ သေဆုံးသွားတဲ့ထဲမှာ အသက် ၇ နှစ်လောက်ထိ ငယ်ရွယ်တဲ့ ကလေးတွေ ပါဝင်ကြောင်း ကယ်ဆယ်ရေးတွေက ပြောပါတယ်။

အမိုးပြိုကျရတဲ့ အကြောင်းရင်းကိုတော့ လတ်တလော မသိရသေးပါဘူး။ အာဏာပိုင်တွေက ဖြစ်စဉ်ကို ဆက်လက် စုံစမ်းနေဆဲလို့ ပြောကြားခဲ့ပြီး လူ ၂ ဦးကို ဖမ်းဆီး ထိန်းသိမ်းထားပါတယ်။

ကယ်ဆယ်ရေး ယူနစ် ၁၁၂၂ရဲ့ ပြောရေးဆိုခွင့်ရ အရာရှိ ဖာရွတ် အာမက်က အပျက်အစီးပုံအောက်မှာ ရှိနေသူတွေကို ရှာဖွေတဲ့ မစ်ရှင်ဟာ တစ်နာရီလောက်အတွင်း အပြီးသတ်ခဲ့ကြောင်း ပြောပါတယ်။ အလောင်းပြန်ရတဲ့ ကလေးတွေက အသက် ၇ နှစ်နဲ့ ၁၁ နှစ်ကြား အရွယ်တွေလို့ သူက ပြောပါတယ်။

Public Service Announcement

အပျက်အစီးတွေအောက်မှာ ဒဏ်ရာရပြီး ပိတ်မိနေသူ ၅ ဦးကိုလည်း ကယ်ဆယ်ရေး အဖွဲ့တွေက ကယ်ထုတ်နိုင်ခဲ့ပါတယ်။ အဲဒီကျူရှင်မှာ ကျောင်းတက်နေတဲ့ ကလေးမလေး တစ်ဦးရဲ့ ဦးလေးကတော့ အဆောက်အအုံရဲ့ အမိုးဟာ ပြိုကျမှု မဖြစ်ခင် ကတည်းက အတော်လေး ယိုယွင်းပျက်စီးနေခဲ့ကြောင်း ပြောပါတယ်။

ကလေးတချို့ ရှိနေချိန်မှာ အဆောက်အအုံ အမိုးက ပြိုကျခဲ့ကြောင်း၊ ပိမိတဲ့ အလေးချိန်က များလွန်းတာကြောင့်လည်း ကလေးတွေ အများအပြား သေကြေခဲ့ရတာဖြစ်ကြောင်း အဲဒီ သတင်းရင်းမြစ်က ဆိုပါတယ်။

ပါကစ္စတန် ဝန်ကြီးချုပ် ရှာဘက်ဇ် ရှရစ်ဖ်က အခုဖြစ်စဉ်မှာ ထိခိုက်သေဆုံးရသူတွေ၊ မိသားစုတွေကို စာနာဝမ်းနည်းကြောင်း၊ ဒဏ်ရာရသူတွေ အမြန်ဆုံး သက်သာလာဖို့ ဆုတောင်းပေးကြောင်း ထုတ်ပြန်ခဲ့ပါတယ်။

လာဟိုးမြို့ ဖွဲ့စည်းပါဝင်ရာ ပန်ဂျပ်ပြည်နယ်ရဲ့ အုပ်ချုပ်ရေးမှူး မာယမ်နာဝက်ဇ် ရှရစ်ဖ်ကလည်း နုနယ် အပြစ်ကင်းလှတဲ့ အသက် ၁၄ ချောင်း ဆုံးရှုံးမှုအတွက် ပြောမပြနိုင်လောက်အောင် ဝမ်းနည်းမိကြောင်း၊ ပူဆွေးနေတဲ့ မိသားစုတွေနဲ့ထပ်တူ ခံစားရကြောင်း၊ ဒီဖြစ်ရပ်မှာ တာဝန်ရှိတဲ့သူ တစ်ဦးမကျန် ဥပဒေနဲ့အညီ အရေးယူ တုံ့ပြန်မှုတွေကို ရင်ဆိုင်ရမှာဖြစ်ကြောင်း လူမှုကွန်ရက် မီဒီယာ Xမှာ ရေးသားထားခဲ့ပါတယ်။

ကိုးကား: BBC