ဇူလိုင်-၂၊၂၀၂၆။People’s Spring
စစ်တပ်အာဏာသိမ်းပြီးချိန် ကတည်းက စတင်လာတဲ့ ပဋိပက္ခတွေအတွင်း သေဆုံးသူ တစ် သိန်းကျော်လွန်သွားပြီလို့ မြန်မာ့အရေး စောင့်ကြည့်လေ့လာနေတဲ့ အဖွဲ့အစည်း တစ်ခုက ထုတ်ပြန်ခဲ့ပါတယ်။
ဇူလိုင်လ ၁ ရက်နေ့မှာ လက်နက်ကိုင် ပဋိပက္ခများ နေရာနဲ့ ဖြစ်စဉ်များ အချက်အလက် (ACLED) အဖွဲ့က ထုတ်ပြန်တဲ့ အစီရင်ခံစာအရ ၂၀၂၁ ခုနှစ်၊ဖေဖော်ဝါရီ ၁ ရက်နေ့ အာဏာသိမ်းမှုနောက်ပိုင်း အရှိန်မြင့်လာတဲ့ ပြည်တွင်းစစ်ကြောင့် သေဆုံးသူပေါင်း ၁၀၀,၁၁၄ ဦးထိရှိလာကြောင်းဖော်ပြပါတယ်။
အဲဒီသေဆုံးမှုဟာ အာဏာသိမ်း စစ်တပ်၊ တော်လှန်ရေး အင်အားစုတွေ၊ ပြည်သူတွေ အားလုံးပေါင်း ကိန်းဂဏန်း ဖြစ်တယ်လို့ ACLEDက ဆိုပါတယ်။ ဘယ်အစုအဖွဲ့ဖက်က ဘယ်လောက်များများ သေကြေသလဲ ဆိုတဲ့အသေးစိပ်အချက်အလက်တွေကိုတော့ တိတိကျကျ ဖော်ပြမထားပါဘူး။
Public Service Announcement
ဒါ့အပြင် ဒီအရေအတွက်တွေဟာ သေဆုံးသူတင်ပဲဖြစ်ပြီး စစ်တပ်အာဏာသိမ်းမှုကြောင့်ပေါ်ပေါက်လာတဲ့ တိုက်ပွဲတွေ ၊ပဋိပက္ခမျိုးစုံကြောင့် ထိခိုက်ဒဏ်ရာရသူ ၊ ကိုယ်လက်အင်္ဂါ ဆုံးရှုံးရသူ အရေအတွက်တွေ မပါသေးပါဘူး ။ဒဏ်ရာရသူ ၊ကိုယ်လက်အင်္ဂါ ဆုံးရှုံးရသူအရေအတွက်ကလည်း အလွန်များပြားမှာဖြစ်ပါတယ်။
နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဦးဆောင်နေတဲ့ ရွေးကောက်ခံအရပ်သား ဒီမိုကရေစီအစိုးရကို စစ်တပ်က ၂၀၂၁ ဖေဖော်ဝါရီလမှာအင်အားသုံး ဖယ်ရှားလိုက်တဲ့နောက်ဆယ်စုနှစ်တစ်ခုကြာမြင့်ခဲ့တဲ့မြန်မာ့ဒီမိုကရေစီအစမ်းသပ်ခံကာလကခပ်မြန်မြန်အဆုံးသတ်သွားခဲ့ကြောင်း ACLED ရဲ့ အစီရင်ခံစာမှာ သုံးသပ်ထားပါတယ်။
စစ်ရေးပဋိပက္ခတွေကြောင့် သေဆုံးမှုတွေဟာ ကျေးလက်ဒေသတွေမှာ ပိုမို အဖြစ်များခဲ့ပြီးရန်ကုန်လို မြို့ကြီးပြကြီးမှာတောင် လုပ်ကြံသတ်ဖြတ်မှုတွေ ပေါ်ပေါက်ခဲ့တယ်လို့ ACLEDက ဆိုပါတယ်။
မြန်မာဟာ ပြီးခဲ့တဲ့နှစ်မှာတော့ စစ်ရေးပဋိပက္ခဒဏ် အဆိုးဆုံးခံရတဲ့ နေရာတွေစာရင်းမှာ ပါလက်စတိုင်းပြီးရင် ကမ္ဘာမှာ နံပါတ် ၂ ချိတ်ခဲ့ကြောင်း ACLEDက ဖော်ပြထားပါတယ်။
မြန်မာနိုင်ငံမှာ စစ်ရေးပဋိပက္ခတွေကြောင့် လူပေါင်း ၃.၇ သန်းကျော် နေရပ်စွန့်ခွာ စစ်ရှောင်နေရကြောင်း ကုလသမဂ္ဂက ထုတ်ပြန်ထားသလို လူဦးရေ ၅ ပုံ ၁ ပုံလောက်ထိ ဆိုးရွားတဲ့ အငတ်ဘေးနဲ့ အလွန်အကျွံ ဆင်းရဲကျပ်တည်းမှုတွေ ကြုံနေရတယ်လို့လည်း သတိပေးထားပါတယ်။
စစ်တပ် အာဏာသိမ်းမှု နောက်ဆက်တွဲ အကျပ်အတည်းတွေက တစ်နိုင်ငံလုံးမှာ သွေးမြေကျ ပဋိပက္ခတွေကို ပိုမို ဆိုးရွားလာစေခဲ့တဲ့အပြင် နယ်စပ်ဒေသတွေက တရားဥပဒေ စိုးမိုးမှု အားနည်းတဲ့ ဧရိယာတွေမှာလည်းအွန်လိုင်း ငွေကြေး လိမ်လည်မှု (ကျားဖြန့်) လုပ်ငန်းတွေကို ပိုမို ပျံ့နှံ့ ထူပြောလာစေကြောင်း ACLEDရဲ့အစီရင်ခံစာမှာထည့်သွင်းဖော်ပြထားပါတယ်။
ကိုးကား- AFP
