ဇူလိုင်-၈၊၂၀၂၆။မိုမို/People’s Spring
ရှမ်း-ကရင်နီပြည်နယ်အစပ်က မိုးဗြဲမြို့မှာ စစ်တပ်က အင်အားဖြည့်ပြီး ထိုးစစ်ဆင်နေတာကြောင့် တိုက်ပွဲပြင်းထန်နေတယ်လို့ စစ်ရေးသတင်းရင်းမြစ်တွေက ပြောပါတယ်။
မိုးဗြဲမြို့နဲ့ မိုင် (၂၀) ၀န်းကျင်အကွာ မိုးဗြဲ-ဒီးမော့ဆိုမြို့နယ်ကြားမှာရှိတဲ့ နန်းမယ်ခုံမြို့ကို ပြန်ရဖို့ စစ်တပ်က ဆက်တိုက်ထိုးစစ်ဆင်နေတာလို့ ဆိုပါတယ်။
” လက်ရှိက စစ်တပ်က နောက်ထပ်တဆင့်ရှေ့တိုးဖို့ အပြင်းအထန်ကြိုးစားနေပါတယ် သူတို့ တားဂက်က နန်းမယ်ခုံ ဆင်တောင်(ဆင်တောင်ရွာ)အထိ ခြေကုပ်ယူပြီး မိုးဗြဲ-နန်းမယ်ခုံလမ်းမကြီးကိုအရယူထိန်းချုပ်ဖို့ ယူဆပါတယ်”လို့ ရှမ်းတောင်စစ်ဒေသ ဗျူဟာ(၁၄) တာ၀န်ရှိသူက ပြောပါတယ်။
Public Service Announcement
ဒါကြောင့် နေ့စဥ်ထိတွေ့တိုက်ပွဲရှိနေပြီး အာဏာသိမ်းစစ်တပ်က ဒရုန်းနဲ့လက်နက်ကြီးဖိအားနဲ့ တိုးနေတာလို့ အသိပေးပါတယ်။
“မဟာမိတ်တပ်ပေါင်းစုအားလုံးလည်း ခုခံနေပြီး တိုက်ပွဲဆက်လက်ပြင်းထန်ဖို့ရှိမယ်”လို့ ကရင် နီပူးပေါင်းတပ်ဖွဲ့၀င် တစ်ဦးက ပြောပါတယ်။
ရှမ်း-ကယားနယ်စပ်မှာ စစ်တပ်နဲ့ KNDF ၊ KNPP ၊ AlPHA ၊ PDF ပူးပေါင်းတပ်ဖွဲ့ကြားတိုက်ပွဲပြင်းထန်နေတာကြောင့် စစ်တပ်က ဒီကနေ့ မနက် ၁၁ နာရီ မိနစ် ၂၀ထိ လေကြောင်းကနေ ဆက်တိုက်ဗုံးကြဲနေတယ်လို့ စစ်ကောင်စီ ဝါဒဖြန့်သူအချို့က လူမှုကွန်ရက်ကတဆင့် ဖြန့်ဝေထားပါတယ်။
ကရင်နီပြည်နယ်ရဲ့၀င်ပေါက်ဖြစ်တဲ့ ရှမ်း-ကရင်နီအစပ် မိုးဗြဲမြို့ကတဆင့် ဒီးမော့ဆိုမြို့နယ် အထက်ခြမ်းက နန်းမယ်ခုံမြို့ကို စစ်တပ်က ပြီးခဲ့တဲ့လကစပြီး အရှိန်မြှင့်ထိုးစစ်ဆင်လာတာဖြစ်ပါတယ်။
အာဏာသိမ်းစစ်တပ်က မိုးဗြဲမြို့ကို ပြီးခဲ့တဲ့နှစ်လယ်ပိုင်းက ပြန်ထိန်းချုပ်ခဲ့ပေမယ့် မြို့အနီးမှာ တော်လှန်ရေးတပ်တွေက ပိတ်ဆို့ထားပါတယ်။
“နန်းမယ်ခုံရရင် မိုးဗြဲ ၊လွိုင်ကော်နဲ့ ဒီမောဆိုရှေ့ခြမ်းကို ကောင်းကောင်းထိန်းချုပ်လို့ရသွားမယ့်အခြေ အနေ”လို့ ကရင်နီစစ်ရေးသတင်းရင်းမြစ်က ပြောပါတယ်။
နန်းမယ်ခုံမြို့ကို တော်လှန်ရေးတပ်တွေက ၂၀၂၃ နှစ်ကုန်ပိုင်းကစပြီး ထိန်းချုပ်ထားတာဖြစ်ပါတယ်။
