ထွန်းညိုဦး/People’s Spring
တချိန်က သဘင်တခေတ်မှာ လျှမ်းလျှမ်းတောက်အောင်မြင်ခဲ့တဲ့ စိန်မာဒင်မျိုးဆက် ဇာတ်မင်းသားကြီး မိုးမင်းဟာ တော်လှန်ပြည်သူဘက်ကနေ ရပ်တည်နေသူပါ။ အာဏာမသိမ်းခင်ကတည်းက အနောက်နိုင်ငံကို ရောက်ရှိနေခဲ့တဲ့ ဇာတ်မင်းသားကြီးဟာ စစ်တပ်အာဏာသိမ်းချိန် အဖိနှိပ်ခံ ပြည်သူလူထုဘက်က ရပ်တည်ခဲ့ပါတယ်။
လက်ရှိ အာဏာသိမ်းစစ်တပ်ရဲ့အလိုကျတိုင်းပြည်အေးချမ်းသယောင်ဝါဒဖြန့်တာမှာ ဇာတ်သဘင်အဖွဲ့တွေရဲ့ အခန်းကဏ္ဍဟာ ရှေ့ဆုံးမှာ ရှိလာခဲ့ပါတယ်။ အဲဒါနဲ့ပတ်သက်ပြီး ဇာတ်မင်းသားကြီးမိုးမင်းဟာ သူ့ရဲ့ Facebook လူမှုကွန်ရက်ကနေ သူ့သဘောထားတွေကို စာသားနဲ့ရော ရုပ်သံနဲ့ပါ ထုတ်ဖော်ပြောကြားလာခဲ့ပါတယ်။
လတ်တလော မြန်မာ့ဇာတ်သဘင်ရဲ့ အခန်းကဏ္ဍဟာ တစ်ဖန် ပြန်လည်ထွန်းတောက်လာပြီး အထူးသဖြင့် လူငယ်မင်းသား၊ မင်းသမီးတွေဟာ ပရိသတ်တွေရဲ့ ချစ်ခင်အားပေးမှုကို အပြိုင်အဆိုင် ရရှိနေကြောင်း၊ ဒီမြင်ကွင်းဟာ မြန်မာ့ယဉ်ကျေးမှုအတွက် ဝမ်းမြောက်စရာဖြစ်သလို၊ အနုပညာလောက ပြန်လည်အသက်ဝင်လာခြင်းကိုလည်း ဖော်ပြနေကြောင်း ဇာတ်မင်းသားမိုးမင်းက ဆိုပါတယ်။
Public Service Announcement
“ဒါပေမယ့် အဲဒီပျော်ရွှင်မှုတွေကြားမှာ ကျွန်တော် မေ့မထားနိုင်တဲ့ မေးခွန်းတစ်ခု ရှိနေပါတယ်။ နိုင်ငံရဲ့ အခက်ခဲဆုံးအချိန်မှာ ကျွန်တော်တို့ ဘာလုပ်နေကြပြီလဲ”လို့ သူ့လောကသားတွေကို ဇာတ်မင်းသားမိုးမင်းက မေးခွန်းထုတ်ပါတယ်။
သဘင်သမားတွေအနေနဲ့ ဒီကနေ့ မြန်မာနိုင်ငံရဲ့ အခြေအနေကို မျက်ကွယ်ပြုထားလို့ မရကြောင်း၊ အနုပညာရှင်တစ်ဦးရဲ့ အောင်မြင်မှုဟာ ကိုယ်တိုင်ကြိုးစားအားထုတ်မှုရဲ့ ရလဒ်ဖြစ်ပေမဲ့ ထိုအောင်မြင်မှုကို ဘယ်သူတွေက ဘယ်လိုရည်ရွယ်ချက်နဲ့ အသုံးချဖို့ကြိုးပမ်းနေတာကိုလည်း သတိရှိစွာ ဆင်ခြင်သုံးသပ်နိုင်ဖို့ လိုအပ်နေတယ်လို့ ဇာတ်မင်းသား မိုးမင်းက သတိပေးပါတယ်။
အထူးသဖြင့် နိုင်ငံရေးအကျပ်အတည်းနဲ့ ရင်ဆိုင်နေရတဲ့ ကာလတွေမှာ စစ်အာဏာရှင်အုပ်စုဟာ အနုပညာ၊ အားကစား၊ ယဉ်ကျေးမှုနဲ့ အောင်မြင်ကျော်ကြားသူတွေရဲ့ ပုံရိပ်ကို အသုံးချပြီး မိမိတို့ရဲ့ ဂုဏ်သိက္ခာနဲ့တရားဝင်မှုကို မြှင့်တင်ဖို့ ကြိုးပမ်းလေ့ရှိတာဟာ ကမ္ဘာ့နိုင်ငံရေးသမိုင်းမှာ အသစ်အဆန်းမဟုတ်ကြောင်း၊ ဒါ့ကြောင့် အနုပညာရှင်တွေအနေနဲ့ မိမိတို့ရဲ့ အောင်မြင်မှုကို ဂုဏ်ယူရမယ့်အပြင် ထိုအောင်မြင်မှုဟာ ပြည်သူလူထုရဲ့ မျှော်လင့်ချက်၊ နိုင်ငံရဲ့အနာဂတ်နဲ့ မဆန့်ကျင်တဲ့ အောင်မြင်မှုဖြစ်ဖို့လည်း သတိထားဖို့လိုကြောင်း ဇာတ်မင်းသားမိုးမင်းက ထပ်မံသတိပေးပါတယ်။
အာဏာရှင်စနစ်ဆိုတာ နိုင်ငံရေးသမားတွေကိုပဲ ဖိနှိပ်တဲ့စနစ် မဟုတ်ဘဲ စီးပွားရေးသမား၊ အနုပညာရှင်၊ ကျောင်းသား၊ အလုပ်သမား၊ ပညာရှင်၊ လယ်သမား ဘယ်သူမှ မလွတ်ဘူးလို့ မိုးမင်းက ရေးသားပါတယ်။
“ဒါကြောင့် နိုင်ငံရဲ့ အနာဂတ်ကို လုံးဝလျစ်လျူရှုပြီး ကိုယ့်အကျိုးတစ်ခုတည်းကိုသာ ရွေးချယ်တာဟာ ရေတိုမှာ အဆင်ပြေသလို ထင်ရပေမယ့် ရေရှည်မှာ ကိုယ့်ရဲ့ အကျိုးစီးပွားကိုတောင် ထိခိုက်စေနိုင်ပါတယ်။”လို့ အာဏာရှင်လက်အောက်က သဘင်သမားတွေကို ဇာတ်မင်းသားမိုးမင်းက သတိပေးစကား ပြောဆိုလိုက်ပါတယ်။
တိုင်းပြည်တစ်ပြည် တရားဥပဒေ စိုးမိုးမှု ကင်းမဲ့ပြီး မတရားမှု အမှောင်ထုအောက် နစ်မြုပ်နေချိန်မှာ ပြည်သူ ထောင်ပေါင်းများစွာ အသက်ပေးနေရသလို၊ သိန်းနဲ့ချီတဲ့ မိသားစုတွေ အိုးအိမ်စွန့်ခွာ ထွက်ပြေးနေကြရတယ်။ အဲဒီလိုဆိုးရွားတဲ့ အခြေအနေကြားမှာ တချို့က “ငါနဲ့ မပတ်သက်ဘူး”လို့ ခေါင်းရှောင်ဖို့ ကြိုးပမ်းနေကြတယ်လို့ မိုးမင်းက ဆိုပါတယ်။ အဲဒီလို ပြောလိုက်ရုံနဲ့လည်း မပတ်သက်ဘဲ နေလို့မရကြောင်း မိုးမင်းက ပြောပါတယ်။
“မပတ်သက်ချင်လို့မရဘူး။ ဘာဖြစ်လို့လဲဆိုတော့ အာဏာရှင်စနစ်က နိုင်ငံရေးသမားတွေအတွက်ပဲ အန္တရာယ်ရှိတာမဟုတ်ဘူး။ စီးပွားရေးလုပ်ငန်းရှင်တွေကို ထိခိုက်တယ်။ အနုပညာရှင်တွေကို ထိခိုက်တယ်။ ဆရာဝန်တွေ အင်ဂျင်နီယာတွေ၊ ကျောင်းဆရာတွေ၊ ကျောင်းသားတွေ၊ ဘယ်သူမှ မလွတ်ဘူး။ ဥပဒေ ခိုင်ခိုင်မာမာမရှိတဲ့ နိုင်ငံမှာ ခင်ဗျားရဲ့ငွေ၊ အိမ်၊ စီးပွားရေး၊ ဂုဏ်သတင်း၊ အနာဂတ်ဆိုတာ အာဏာရှိသူတွေရဲ့ဆုံးဖြတ်ချက်တစ်ခုတည်းပေါ်မှာပဲ မူတည်နေတယ်။ ကျွန်တော်နိုင်ငံရေးမလုပ်ဘူးဆိုတာနဲ့ နိုင်ငံရေးဆိုတာကြီးက ခင်ဗျားဆီမလာတော့ဘူးလို့ အာမခံချက်မရှိဘူး။”လို့ ဇာတ်မင်းသားကြီး မိုးမင်းက ပြောပါတယ်။
ဒါ့အပြင် ယခုလက်ရှိ ဇာတ်သဘင်ဖျော်ဖြေပွဲတွေကို ဆက်တိုက်လုပ်နေတဲ့ စမ်းရေမိုးဇာတ်တည်ထောင်သူ ကိုအောင်ကျော်ထွန်းကိုလည်း သတိပေးခဲ့ပါသေးတယ်။
“အောင်ကျော်ထွန်းရေ။ မင်းအောင်မြင်နေတာကို ငါဘာမှမခံစားရပါဘူး။…မင်း အောင်မြင်မှုရနေတာကို အသိအမှတ်ပြုပါတယ်။ သဘင်ရဲ့ အနာဂတ်အတွက်လည်း ကောင်းပါတယ်။ နိုင်ငံရဲ့ အနာဂတ်အတွက်တော့ အဆင်မပြေပါဘူး။”လို့ မိုးမင်းက ရေးသားခဲ့ပါတယ်။
အောင်ကျော်ထွန်းရဲ့ လုပ်ရပ်တွေဟာ စစ်အာဏာရှင်အုပ်စုရဲ့ normalization လုပ်တဲ့နေရာမှာ အားပေးအားမြှောက်ပြုပြီးသားဖြစ်နေတယ်လို့ မိုးမင်းက ဝေဖန်ပါတယ်။ နိုင်ငံရဲ့အနာဂတ်အရေးနဲ့ မျိုးဆက်သစ် ရင်သွေးငယ်တွေအတွက် လုံးဝလက်ခံနိုင်စရာအကြောင်းမရှိဘူးလို့ မိုးမင်းက ရေးသားခဲ့ပါတယ်။
