ရဲဘော် တစ်ရာကျော်အတွက် ခြေတုတွေတပ်ဆင်ပေးနိုင်ခဲ့တဲ့ မင်းမော်ကွန်းရဲ့ မွေးနေ့လက်ဆောင်ကမ်ပိန်း

ဇူလိုင်-၂၈၊၂၀၂၆။ ဆဏ်း/People’s Spring

နွေဦးတော်လှန်ရေးမှာ ကိုယ်လက်အင်္ဂါစွန့်လွှတ်ခဲ့ရတဲ့ ရဲဘော်တွေအတွက် ရည်ရွယ်ပြုလုပ်ခဲ့တဲ့ မင်းမော်ကွန်းရဲ့ မွေးနေ့လက်ဆောင် ကမ်ပိန်းက ရရှိငွေတွေနဲ့ ရဲဘော် တစ်ရာကျော်အတွက် ခြေတုတပ်ဆင်ပေးနိုင်ခဲ့တယ်လို့ Artists’ Shelter က အသိပေးထားပါတယ်။

မွေးနေ့လက်ဆောင်ကမ်ပိန်းကနေ ရန်ပုံငွေ ကျပ်သိန်း ၆၃၀၀ ကျော်ရရှိခဲ့ပြီး ရခိုင်ပြည်နယ်မှာ ခြေတုလက်တုတပ်ဆင်ရေး တပ်ဆင်ရေးစင်တာတည်ဆောက်ဖို့ ငွေကျပ်သိန်း ၅၇၀ ကျော် မတည်ပေးခဲ့ကာ ရဲဘော် ၁၁၁ ဦးအတွက် ခြေတုတွေတပ်ဆင်ပေးနိုင်ခဲ့တယ်လို့ ဒီနေ့(ဇူလိုင်၂၈) သတင်းထုတ်ပြန်ထားတာပါ။

“တိုက်ပွဲအတွင်းမှာ နိုင်ငံနဲ့ ပြည်သူအတွက် ကိုယ်လက်အင်္ဂါ စွန့်လွှတ်ခဲ့ရတဲ့ ရဲဘော်တွေရဲ့ စိတ်ဓာတ်က ဘယ်တော့မှ ကျရှုံးမှာ မဟုတ်ပါဘူး။ အခု ရရှိလာတဲ့ ခြေတုတွေက ရဲဘော်တွေ မားမားမတ်မတ် ပြန်လည်ရပ်တည်နိုင်ဖို့အတွက် အကြီးမားဆုံး အားဖြည့်မှုတခု ဖြစ်စေခဲ့ပါတယ်။” လို့ အသိပေးထားပါတယ်။

Public Service Announcement

ဖေဖော်ဝါရီ ၂၆ ရက်မွေးနေ့ရှင် မင်းမော်ကွန်းရဲ့ မွေးနေ့လက်ဆောင်ကမ်ပိန်းက ဖေဖော်ဝါရီ ၂ ကနေ ၂၄ အထိပြုလုပ်ခဲ့တာပါ။

ကမ်ပိန်းTarget သိန်း ငါးထောင် ရည်မှန်းခဲ့ပေမယ့် ရန်ပုံငွေ ပိုမိုရရှိခဲ့တာဖြစ်ပါတယ်။

ကမ်ပိန်းမှာပါဝင်ခဲ့သူတွေကို မင်းမော်ကွန်းရဲ့ မွေးနေ့မှာ 24FM ကနေ သူရဲ့စိတ်ကူးကို ရိုက်ကူးပုံဖော်ထားတဲ့ The Rubbish ဇာတ်လမ်းတိုကို အခမဲ့ ပြသပေးခဲ့ပါတယ်။