နိုင်ငံတကာ ခရီးသည် အဝင်အထွက် အများဆုံး ဂုဏ်ပုဒ်ကို အင်ချွန်းလေဆိပ် ပထမဆုံးအကြိမ် ပိုင်ဆိုင်လာ

တောင်ကိုရီးယားရဲ့ အင်ချွန်း နိုင်ငံတကာ လေဆိပ်ဟာ ကမ္ဘာပေါ်မှာ နိုင်ငံတကာ ခရီးသည် အဝင်အထွက် အများဆုံး၊ အလုပ်အများဆုံး လေဆိပ်အဖြစ် ပထမဆုံးအကြိမ် ရပ်တည်ခဲ့ပါတယ်။

တောင်ကိုရီးယား နိုင်ငံရဲ့ အဓိက အဝင်အထွက် တံခါးပေါက်လို့ တင်စားနိုင်တဲ့ အင်ချွန်းလေဆိပ်ဟာ အခုနှစ် ပထမ ၆ လအတွင်း နိုင်ငံတကာ ခရီးသွားပြည်သူ ၃၈.၄ သန်းကို ဝန်ဆောင်မှု ပေးခဲ့ပါတယ်။ ဒါကြောင့်လည်း ဗြိတိန်နိုင်ငံ၊ လန်ဒန်မြို့မှာရှိတဲ့ ဟိဿရိုးလေဆိပ်ကို ကျော်ပြီး ကမ္ဘာ့ နိုင်ငံတကာ ခရီးသွား အဝင်အထွက် အများဆုံး လေဆိပ်တွေ စာရင်းရဲ့ နံပါတ် ၁ နေရာကို ရယူလာခဲ့တာ ဖြစ်ပါတယ်။

ဟိဿရိုးကတော့ အခုနှစ် ပထမဆုံး ၆ လအတွင်း နိုင်ငံတကာ ခရီးသွား ၃၇.၇၉ သန်းကို ဝန်ဆောင်မှု ပေးခဲ့ပါတယ်။ အင်ချွန်းနဲ့ ဟိဿရိုးတို့ရဲ့ နောက်မှာတော့ စင်ကာပူရဲ့ ချန်ဂီလေဆိပ်က နိုင်ငံတကာ ခရီးသွား ဦးရေ ၃၄.၅၃ သန်းနဲ့ တတိယအဖြစ် ရပ်တည်ခဲ့ပါတယ်။

အမေရိကန်နဲ့ အီရန်ကြားက စစ်ရေးပဋိပက္ခကြောင့် အရှေ့အလယ်ပိုင်း ဒေသတွင်း ခရီးသွားတွေက ပျံသန်းမှု လမ်းကြောင်းတွေ ပြောင်းလဲ ရွေးချယ်လာတာကလည်း အင်ချွန်းလေဆိပ်ရဲ့ ခရီးသည် ဝန်ဆောင်မှု ကိန်းဂဏန်းတွေ တိုးလာခြင်းကို အထောက်အပံ့ ဖြစ်စေခဲ့ဖွယ် ရှိပါတယ်။

Public Service Announcement

အာရပ်စော်ဘွားများ ပြည်ထောင်စု (ယူအေအီး) နိုင်ငံမှာရှိတဲ့ ဒူဘိုင်း နိုင်ငံတကာ လေဆိပ်ကတော့ နှစ်ပတ်လည် နိုင်ငံတကာ ခရီးသွားဧည့်သည် ဝန်ဆောင်မှုတွေ စာရင်းကို ထုတ်ပြန်ချိန်မှာ သိသိသာသာ ကျဆင်းမှုတွေ တွေ့ရဖွယ် ရှိပါတယ်။ ဒူဘိုင်းလေဆိပ်ဟာ ၂၀၂၄ နဲ့ ၂၀၂၅ ခုနှစ်တွေမှာ နိုင်ငံတကာ ခရီးသွားဧည့်သည် အများဆုံး စာရင်းရဲ့ ဒုတိယ နေရာကို ရရှိခဲ့ပါတယ်။

ဟိဿရိုးကတော့ အဲဒီ ၂ နှစ်မှာ အဆင့် ၅ နဲ့ အဆင့် ၇ နေရာတွေ အသီးသီး ရပ်တည်ခဲ့ပြီး အင်ချွန်းရဲ့ အဆင့်ကတော့ ၁၂ နဲ့ ၁၃ ပါ။ အရင်က နိုင်ငံတကာ ခရီးစဉ်တွေမှာ ဒူဘိုင်း လေဆိပ်ကနေတဆင့် လေယာဉ်ပြောင်းစီးတဲ့ ခရီးသည် အများအပြားဟာ အခုအခါမှာ အင်ချွန်း လေဆိပ်ကို ပြောင်းလဲ အသုံးပြုလာနေကြောင်း သိရပါတယ်။

အင်ချွန်းလေဆိပ်ကို ၂၀၀၁ ခုနှစ်မှာ စတင်ဖွင့်လှစ်ပြီး နိုင်ငံတကာက မြို့ကြီးတွေနဲ့ ဒေသတွေ ၁၅၈ ခုဆီကို လေယာဉ်ခရီးစဉ်တွေ ပျံသန်း ပြေးဆွဲပေးနေကြောင်း သိရပါတယ်။

ကိုးကား: BBC