နီပေါနိုင်ငံမှာ ဖြစ်ပွားခဲ့တဲ့ ရုတ်တရက် ရေကြီးမှုမှာ ကလေးနှစ်ဦးကို လက်တွဲပြီး ပြေးလာရင်း အသက်ဘေးကနေ ကပ်လွတ်ခဲ့တဲ့ မိခင်တစ်ဦးရဲ့ ရင်ထိတ်စရာ အခြေအနေကို ဗီဒီယိုနဲ့ မှတ်တမ်းတင်နိုင်ခဲ့ပါတယ်။
ဩဂုတ် ၂၆ ရက်နေ့ မနက်ပိုင်းတုန်းက နီပေါနဲ့ တိဘက်ကုန်းမြင့်ဒေသ ထိစပ်တဲ့ နယ်စပ်နားမှာ ရေခဲမြစ် ကျိုးပျက်မှုကနေ တောင်ကျရေတွေ အလုံးအရင်း စီးဆင်းခဲ့ပြီး အသေအပျောက်တွေ၊ အပျက်အစီးတွေ ဆိုးဆိုးရွားရွား ဖြစ်ပေါ်ခဲ့ပါတယ်။
အဲဒီနေ့က နီပေါရဲ့ ဘတ်ရာဝါတီ ဒေသမှာ ရိုက်ကူးထားတဲ့ ဗီဒီယို တစ်ခုမှာတော့ တောင်ကျရေတွေနဲ့ စက္ကန့်နည်းနည်းလေးပဲ ခြားပြီး ထွက်ပြေး လွတ်မြောက်လာတဲ့ သားအမိ သုံးယောက်ရဲ့ ထိတ်လန့်စရာ အခြေအနေကို တွေ့ခဲ့ရပါတယ်။
ဗီဒီယိုထဲမှာတော့ အမျိုးသမီး တစ်ဦးဟာ အမြွှာလေးတွေလို့ ယူဆရတဲ့ သမီးလေး နှစ်ဦးကို လက်ဆွဲပြီး ကုန်းမြင့် တစ်နေရာဆီ အသည်းအသန် ပြေးတက်လာတာကို တွေ့ရပါတယ်။ နောက်တော့ သူ့ရဲ့နောက်ဖက် ကိုက်အနည်းငယ်လောက် အကွာမှာ ရွှံ့ရေတွေက ကန့်လန့်ဖြတ် အရှိန်အဟုန်နဲ့ ရောက်လာခဲ့ပါတယ်။ နောက်ခံ မြင်ကွင်းအရ ရေအားက အရမ်းပြင်းလို့ အဆောက်အအုံငယ် တစ်ခုပါ အောက်ခြေက ကျွတ်ထွက်ပြီး မျောပါသွားတာကို တွေ့ရပါတယ်။
Public Service Announcement
အဲဒီရေကြီးမှုတွေဟာ အခုနှစ်အတွင်း ကမ္ဘာပေါ်မှာ အသေအပျောက် အများဆုံး သဘာဝဘေးဆိုးကြီးတွေထဲက တစ်ခုအဖြစ် မှတ်တမ်းဝင်လာခဲ့ပါတယ်။ ရေကြီးမှုကြောင့် နီပေါနဲ့ တိဘက်မှာ လူပေါင်း ၁၁၀၀ ကျော် သေဆုံးပြီး ၄၅၀၀ ကျော် ပျောက်ဆုံးနေဆဲ ဖြစ်ပါတယ်။
ကိုးကား: CNN
