စက်တင်ဘာ -၁၀၊၂၀၂၆။မိုမို/People’s Spring
တနင်္သာရီတိုင်း၊လောင်းလုံးမြို့နယ်မှာ နေအိမ်မီးမရှို့ဖို့တားတဲ့ အသက်(၉၀)ကျော်အရွယ်အဘိုးအို ၁ ဦးအပါအ၀င် အရပ်သား ၅ ဦးထက်မနည်းကို စစ်တပ်စစ်ကြောင်းက သတ်ဖြတ်ခဲ့တယ်လို့ ဒေသခံသတင်းရင်းမြစ်တချို့က ပြောပါတယ်။
ဒီကနေ့(စက်တင်ဘာ ၁၀ ရက်) မနက်ပိုင်းမှာ လောင်းလုံးမြို့အရှေ့ဘက်ခြမ်းက ကုန်းဇရပ်ရွာကို စစ်တပ်စစ်ကြောင်း၀င်ရောက်ပြီး သတ်ဖြတ်သွားတာလို့ ဆိုပါတယ်။
“အဖိုးက ရွာထိပ်အိမ်မှာနေတာ။သူ့အိမ်ကို မီးရှို့မယ်လုပ်တော့ ၀င်တားရင်း ပစ်သတ်ခံရတာလို့ သိရတယ်။ပြီးတော့ စစ်ကြောင်းက ဝေဒီရွာက နှစ်ဦးကို စိတ်မနှံ့သူနဲ့ ကောင်လေးတစ်ယောက်ကို သတ်သွားတယ်။နောက်ပြီး ကုန်းဇရပ်ကနေ လောင်းလုံးဘက်ပြန်ဆုတ်တဲ့ လမ်းမှာလည်း နှစ်ယောက်သတ်ခံရတယ်”လို့ ဒေသခံသတင်းရင်းမြစ်က ပြောပါတယ်။
Public Service Announcement
အင်အား ၁၀၀ ၀န်းကျင်ပါတဲ့ စစ်တပ်စစ်ကြောင်းက စက်တင်ဘာ ၈ ရက်က ပြင်းထိန်ကျေးရွာကနေ ဝေဒီကျေးရွာကို စစ်ကြောင်းထိုးခဲ့တာလို့ အသိပေးပါတယ်။
“မနေ့က တိုက်ပွဲဖြစ်တယ်။အထိနာတာတွေများတယ်။စစ်ကြောင်းထဲက အများစုက ပစ(စစ်မှုထမ်း)တွေ ။ဝေဒီကနေ စစ်ကြောင်းက လာလမ်းအတိုင်းမပြန်ရဲဘဲ ကုန်းဇရပ်ဘက်(ထား၀ယ်-လောင်းလုံးလမ်းမ)အတိုင်း ပတ်ပြန်တာ”လို့ မြေပြင်အခြေအနေကို သိရှိသူက ပြောပါတယ်။
စစ်တပ်စစ်ကြောင်း ဆုတ်ခွာမှုနဲ့ ဒေသခံတွေ သတ်ဖြတ်ခံခဲ့ရဝာာတွေနဲ့ပတ်သက်လို့ လောင်းလုံးမြို့နယ် ပကဖ၊ပလဖ နဲ့ ဒေသတွင်းစစ်ရေးတာ၀န်ရှိသူတွေကို လူထုနွေဦးက ဆက်သွယ်မေးမြန်းနေဆဲ ဖြစ်ပါတယ်။
လောင်းလုံးမြို့နယ်က မောင်းမကန်တပ်စခန်းကို တော်လှန်ရေးတပ်ဖွဲ့တွေသိမ်းပိုက်ပြီးတဲ့နောက် စစ်ကောင်စီက အင်အားဖြည့်ပြီး မြို့နယ်တွင်း မကြာခဏ စစ်ကြောင်းထိုးနေပါတယ်။
ဒေသတွင်း စစ်ရေးအချက်အလက်တွေအရ လောင်းလုံးမြို့နယ်မှာ စစ်တပ်က ခမရ(၄၀၆)၊ (၄၀၉)နဲ့ ခလရ(၂၆၇)တပ်ရင်းတွေ နဲ့ လှုပ်ရှားနေတာ ဖြစ်ပါတယ်။
