စက်တင်ဘာ ၁၂၊ ၂၀၂၆။ ထားမြတ်/People’s Spring
အာဏာသိမ်းစစ်တပ်က ပစ(ပြည်သူ့စစ်မှုထမ်း)လို့ ခေါ်တဲ့ လူငယ်တွေကို အဓမ္မ စစ်သားစုဆောင်းမှု လုပ်ဆောင်နေတဲ့ အစီအစဉ်ကို နည်းမျိုးစုံနဲ့ တိုက်ဖျက်ရမှာ ဖြစ်ပြီး အဲဒီလို တိုက်ဖျက်ရာမှာ လူငယ်တွေ ပူးပေါင်းပါဝင်ကြဖို့ အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီး ဦးရည်မွန်က တိုက်တွန်းပါတယ်။
NUG ကာကွယ်ရေးဝန်ကြီးဌာနက ဒီကနေ့ စက်တင်ဘာ ၁၂ရက်ညပိုင်းမှာ ထုတ်ပြန်တဲ့ ဝန်ကြီး ဦးရည်မွန်နဲ့ ဦးမင်းကိုနိုင်တို့ရဲ့ အပြန်အလှန် စကားစုစည်းမှု အစီအစဉ်မှာ ပစအရေး၊ စစ်ရေးနဲ့ တော်လှန်ရေးဆိုင်ရာတွေကို ဆွေးနွေးခဲ့ရာ ပစအရေးနဲ့ပတ်သက်ပြီး အခုလို တိုက်တွန်းခဲ့တာပါ။
လူငယ်တွေကို အဓမ္မ စစ်သားစုတဲ့ကိစ္စ လက်ရဲဇက်ရဲ ကျူးလွန်လာတာဟာ ပြည်သူလူထုကို ထိခိုက်မှု များဖြစ်ပေါ်နေရကြောင်း ဦးမင်းကိုနိုင်က ပြောကြားပြီး ဒီအရေးအပေါ် NUG ကာကွယ်ရေးဘက်က ကိုင်တွယ်ဆောင်ရွက်မယ့် အခြေအနေကို မေးမြန်းရာ ဦးရည်မွန်က အခုလို ဖြေကြားပါတယ်။
Public Service Announcement
အကြမ်းဖက်စစ်အုပ်စုရဲ့ အဓမ္မ စစ်သားစုဆောင်းရေး ပစအစီအစဉ်ဟာ စစ်အုပ်စုအတွက် အသက်ရှုပေါက်ဖြစ်သလို တဖက်မှာလည်း ပစကို အားပြုနေရတာသည်ပင်လျင် အာဏာသိမ်းစစ်တပ်အတွက် အားနည်းချက်ဖြစ်ကြောင်း ဝန်ကြီး ဦးရည်မွန်က ပြောပါတယ်။
ပစလူငယ်တွေကိုယ်တိုင်လည်း သူတို့ဟာ အဓမ္မ စစ်ကျွန်ပြုခံထားရတယ်ဆိုတာ သိထားပြီး သူတို့ အသက်ကို စတေးခိုင်းပြီး အဓမ္မ သမားတွေ သက်ဆိုးရှည်ဖို့ လုပ်နေတယ်ဆိုတာ သိထားကြကြောင်း ဝန်ကြီး ဦးရည်မွန်က ပြောပါတယ်။
“ပစဆိုတာကတော့ စစ်အုပ်စုအတွက် ဘယ်တော့မှ တိုက်ခိုက်ရေး အင်အားတခု ဖြစ်မှာ မဟုတ်ဘူးပေါ့ဗျာ။ ဒါသည်ပင်လျင် စစ်အုပ်စုရဲ့ အားနည်းချက်။ကျနော်တို့ တော်လှန်ရေးအဖွဲ့အစည်းတွေ အနေနဲ့လည်း ဒီအားနည်းချက်ကို ကောင်းကောင်းသိဖို့ လိုတယ်လို့ ကျနော်တို့ ယူဆပါတယ်။ ဒီအားနည်းချက်ကို ဖိနင်းပစ်နိုင်ဖို့ ပဲပေါ့။ ပစအင်အား ပစ အစီအစဉ်သာ ပျက်ယွင်းသွားမယ်ဆိုရင် စစ်အုပ်စု ဘာဆက်လုပ်မလဲပေါ့။ ဒါက တော်တော်လေး စိတ်ဝင်စားစရာကောင်းတဲ့ အနေအထားပါ။ပစအစီအစဉ် တိုက်ဖျက်ရေးက ကျနော်တို့ တော်လှန်ရေးအတွက်လည်း အရေးကြီးတဲ့ အလုပ်တခုဖြစ်မယ်။ ဒီအလုပ်အတွက် ကျနော်တို့ ပြည်သူတွေရော အရွယ်ရောက်ပြီး လူငယ်တွေရောပေါ့ ပူးပေါင်းပါဝင်ဖို့ အရေးကြီးလိမ့်မယ်လို့ ဒီလိုရှုမြင်ထားတာရှိပါတယ်” လို့ ဝန်ကြီး ဦးရည်မွန်က ပြောပါတယ်။
စစ်တပ်ရဲ့ အဓမ္မ စစ်သားစုဆောင်းပြီး လူငယ်တွေကို စစ်မြေပြင်မှာ အသုံးချနေတဲ့ လုပ်ရပ်ဟာ လူများစွာရဲ့ အသက်ကို စစ်ဗိုလ်ချုပ်တွေ က စတေးနေတာဖြစ်လို့ ပြည်သူတွေက ရရာနည်းနဲ့ ဆန့်ကျင်ကြဖို့ လိုတယ်လို့ ဦးမင်းကိုင်နိုင်က ပြောပါတယ်။ တယောက်ချင်းကိုယ်လွတ်ရုန်းလို့မရဘဲ တပြိုင်တည်း တခဲနက်ဆန့်ကျင်ရန်လိုအပ်တယ်လို့လည်း သူက ပြောပါတယ်။
ဝန်ကြီးဦးရည်မွန်ကလည်း အဓမ္မ စစ်သားစုဆောင်းခံရဖို့ အန္တရာယ်ရှိနေတယ်ဆိုရင် လူငယ်တွေအနေနဲ့ တော်လှန်ရေးနယ်မြေတွေကို လာနိုင်ကြောင်း ဖိတ်ခေါ်ထားတယ်လို့ အသိပေးပါတယ်။ တော်လှန်ရေးနယ်မြေရောက်ရင် တိုက်ခိုက်ရေးတာဝန်ထမ်းဆောင်ချင်တယ်ဆိုရင် PDF သို့မဟုတ် ပကဖမှာ ဝင်နိုင်အောင်စီစဉ်ပေးမှာ ဖြစ်သလို တိုက်ခိုက်ရေးတာဝန်မထမ်းလိုဘဲ ပညာရေး၊ လူထုကျန်းမာရေး၊ စစ်ဘေးရှောင်စောင့်ရှောက်ရေးကိစ္စ အပါအဝင် လူထုဝန်ဆောင်မှုတွေ မှာ ပါဝင်လုပ်ချင်ပါက လုပ်နိုင်အောင် စီစဉ်ပေးမယ်လို့လည်း ဝန်ကြီး ဦးရည်မွန်က ပြောပါတယ်။
နိုင်ငံရပ်ခြားထွက်ချင်ရင်လည်း ပြည်ပရောက် မြန်မာအသိုင်းအ၀ိုင်းတွေက တက်နိုင်သလောက်ကူညီစောင့်ရှောက်ပေးဖို့ နှိုးဆော်ထားတာရှိတယ်လို့ ဝန်ကြီးက ပြောပါတယ်။
“ဘယ်လိုပဲ ဖြစ်ဖြစ် စစ်အုပ်စုရဲ့ အသက်ရှုပေါက်ဖြစ်တဲ့ ပစ အဓမ္မစစ်သားစုဆောင်းတဲ့ အစီအစဉ်တော့ ကျနော်တို့ နည်းလမ်းစုံသုံးပြီး တိုက်ဖျက်ပစ်ဖို့ပဲပေါ့။ စစ်မြေပြင်မှာလည်း ဒါကို လက်ရှိ ဆောင်ရွက်နေတာဖြစ်ပါတယ်။” လို့ ဝန်ကြီး ဦးရည်မွန်က ပြောကြားပါတယ်။
ဒါ့အပြင် ရှေ့တန်းရောက် PDF ရဲဘော်တွေ ပကဖ ရဲဘော်တွေအားလုံးကိုလည်း နှိုးဆော်ထားပြီးဖြစ်ကာ ပစတွေအနေနဲ့ ပြည်သူ့ဘက်ပူးပေါင်းလိုပါက ဆက်သွယ်နိုင်မယ့် လိပ်စာတွေ အသိပေးသွားမယ်လို့ ဆိုပါတယ်။
အလွယ်တကူ ဆက်သွယ်နိုင်အောင် ဆက်သွယ်လာပါက လိုအပ်တဲ့ ချိတ်ဆက်မှုနဲ့ ကူညီစီစဉ်မှု စောင့်ရှောက်မှုများ ပေးနိုင်အောင် ပြင်ဆင်ထားတာရှိကြောင်း ဝန်ကြီး ဦးရည်မွန်က ပြောကြားပါတယ်။
စစ်ကောင်စီတပ်ကလည်း စစ်မြေပြင်မှာ စစ်သားအင်အားပြုန်းတီးမှုတွေကို အစားထိုးဖို့ လူငယ်တွေကို နည်းမျိုးစုံနဲ့ အဓမ္မစစ်သားစုဆောင်းမှုတွေလုပ်ဆောင်လျက်ရှိကာ ပစလို့ခေါ်တဲ့ စစ်မှုထမ်းတပ်သားသစ်တွေကို ရှေ့တန်းစစ်မြေပြင်တွေမှာ လူသားဒိုင်းအဖြစ် အသုံးချလျက်ရှိနေပါတယ်။
စစ်တပ်ရဲ့ ပစအစီအစဉ်ကို ပြည်သူတွေရော လူငယ်တွေရော ဖြစ်နိုင်တဲ့နည်းနဲ့ ဆန့်ကျင်ဖို့ ဝန်ကြီး ဦးရည်မွန်က ပြောပါတယ်။
“ ဒီအစီအစဉ်မှာ အလိုတူလို့ပဲ ဖြစ်ဖြစ် အလိုမတူလို့ပဲ ဖြစ်ဖြစ် ပူးပေါင်းပါဝင်မိတာမျိုးမဖြစ်ဖို့ ပေါ့ ဒါကိုတော့ လူထုအနေနဲ့ အထူးဂရုစိုက်ပေးဖို့ ဒီအချက်ကိုတော့ တိုက်တွန်းချင်ပါတယ်” လို့ ဝန်ကြီး ဦးရည်မွန်က ပြောကြားပါတယ်။
စစ်မြေပြင်ရောက်ပြီဆိုရင်တော့ သက်ညှာလို့ရမှာ မဟုတ်ကြောင်းလည်း ဝန်ကြီး ဦးရည်မွန်က ပြောပါတယ်။ စစ်မြေပြင်ရောက်ပါက ထိရောက်စွာ တိုက်ခိုက်ချေမှုန်းရတာ ရှိတာမို့ ပစလူငယ်တွေဘာလုပ်ရမယ်ဆိုတာ သိမယ်ထင်ကြောင်း သတိပေးပါတယ်။
“မလွှဲမရှောင်သာလို့ အဓမ္မစုဆောင်းခံရပြီဆိုရင်တော့ အခြေအနေပေးတာနဲ့ စစ်အုပ်စုတပ်ကို ဘယ်လို စွန့်ခွာမလဲ စဉ်းစားကြဖို့ပေါ့” လို့ ဝန်ကြီး ဦးရည်မွန်က ပစ လူငယ်တွေကို တိုက်တွန်းထားပါတယ်။
